Ye ti vundu asi

OWEN, mbeni kete molenge ti koli ti ngu use na ndambo, ayeke sala lani ngia na da na ndo ti sukulango ngu. Kâ, lo wara lege ti ndu armoire ti ayorö so ayeke na nduzu, so babâ na mama ti lo abâ ti ala atene tïtî lo alingbi ti si dä pëpe. Na popo ti ayorö ni, lo wara mbeni ngbenda so apika lê ti lo. Lo zi yanga ni na lo nyon ye so ayeke na yâ ni. Kota vundu asi.

Na yâ ti ngbenda ni, mbeni sioni yorö ayeke dä, na mawa ni ayeke so kete Owen awara kuâ. Vundu ahon ndo ti babâ na mama ti lo. Babâ ti lo, Percy, ague na église ti lo ti gi dengo bê. Lo hunda bua ni: “Ngbanga ti nyen ye tongaso asi?” Mokonzi-nzapa ni atene na lo: “Nzapa ahiri kete ange ti lo na yayu.” Babâ ni so kuâ anzi oko molenge ti lo, bê ti lo awoko kue na mango tënë so, na lo bâ so a yeke na lege ni oko pëpe. A yeke Nzapa si aye ti tene mara ti kota kpale tongaso asi? Percy, so bê ti lo anze kue, atene so ti ni na église ahunzi awe.

Na gbungo li na ndo ye so asi so, Percy ahunda tele ti lo: ‘Molenge ti mbi ayeke bâ pasi na ndembe so? Fade mbi kiri ti bâ lo mbeni lâ?’

Peut-être mo nga mo yeke hunda tele ti mo na ndo ye so ayeke si tongana zo akui, nga wala lege ayeke dä ti wara tele mbeni lâ ande na asongo ti e so akui awe. Tënë ti Nzapa, Bible, akiri tënë na ahundango tënë so. A yeke wara na yâ ni akiringo tënë so ayeke polele na so adë bê ti azo kue so mara ye ti ngangu so asi na ala awe. Me ahon so kue, Bible afa pendere beku so Nzapa azê na e: beku ti zingongo ti azo so akui.

A yeke nzoni mo diko atënë so aga na peko ti hinga ye mingi na ndo pendere beku so.