Ala sepela Jéhovah na ekole
NA NDO lê sese kue, amaseka Témoin ti Jéhovah awara lege ti sepela Nzapa na ekole na lege ti tënë ti yanga ti ala nga na tambela ti ala. Bâ ambeni tapande ti aye so asi so afa wâ so ala yeke na ni.
Na Grèce, a mû na mbeni maseka-wali Témoin ti Jéhovah mbeni devoir ti sala na ndo bubango ti pupu so angoro sese. Na pekoni so lo gi na yâ ti Index des publications de la Société Watch Tower, lo wara nzoni article na yâ ti Réveillez-vous!, so lo fa ni na hunzingo ti atënë ti lo tongana gunda ti devoir ti lo. Wafango mbeti na lo (so ayeke mbeni wali) atene na lo so a yeke oko ti apendere devoir so ade ni diko pëpe. Na pekoni, wafango mbeti ni asala kusala na atënë ti yâ ti devoir ni na ngoi ti mbeni bungbi ti kua, na a tambela nzoni. Ita maseka-wali ni aleke na bê ti lo ti mû na lo a-Réveillez-vous! mingi, so na popo ni a-article so li ti tënë ni ayeke “Les enseignants: que ferions-nous sans eux?” Na pekoni, wafango mbeti ni agonda Réveillez-vous! ni na klase, na ambeni élève ni akomanse ti hunda ni. Ita ni aga na apériodique na ekole ti mû lege na a-élève ni ti diko ambeni nde.
Na Bénin (Afrika), mbeni maseka-wali Témoin atingbi lani na mbeni tara so ayeke nde. Lakue, ababâ na mama ti a-élève ti ekole ti lo ayeke futa ka awafango mbeti ti fa na amolenge ti ala ambeti so akpengba ti leke ala teti kizama. Ye oko, awafango ye ni asoro andapelele ti samedi ti mû fango ye ni. Me, ita maseka ni atene: “Samedi na ndapelele ayeke lango so kongregation kue ayeke fa na tënë. A yeke tâ nzoni lango ti yenga ni teti mbi, na mbi lingbi ti mû ni ti sala na mbeni ye nde pëpe!” Babâ ti lo, mbeni Témoin ti Jéhovah so ayeke bata lo gi lo oko, ayeda na lo na lo tene ni yeke tara ti gi ambeni mba ti ni na ambeni wafango mbeti nde ti changé kapa ni. Me ala kue ake. Maseka-wali ni amû desizion ti mû mbage na afango ye ni pëpe, me ti gue na fango tënë. Akamarade ti lo ti klase ahe lo, na pusungo lo ti zia fango tënë na ti voro Nzapa ti lo. Ala bâ ti ala lani atene lo yeke bi ande kizama ni na ngu. Ye oko, na nda ni, groupe ti a-élève kue so a yeke fa mbeti na ala awara kizama ni pëpe, me ita maseka-wali ni awara ti lo ni. Yanga ti azo kue akanga. Fadeso, a-élève ni ayeke tene na lo: “Ngbâ ti voro Nzapa ti mo.”
Na République tchèque, a hunda lani na mbeni molenge-wali ti ngu 12 ti leke mbeni devoir na ndo mbeni buku so lo yeke diko ni dikongo. Mama ti lo awa lo ti mû buku Koli so ahon tanga ti azo kue ti sala na ni. Lo komanse tënë ti lo ni na ahundango tënë: “Ala tene ti ala nyen? Mbeni zo ayeke dä so ahon tanga ti azo kue?” Lo fa zo wa ayeke Jésus, fini ti lo na sese nga na afango ye ti lo. Na pekoni, lo sala tënë na ndo chapitre so li ni atene “Wango teti mungo pardon.” Wafango mbeti ti lo ni adekongo: “So ayeke pendere devoir so ade mbi mä na yanga ti mo pëpe!”, na lo yeda na ngia ti mû mbeni buku ni oko. Ambeni mba ti lo élève ni ahunda nga ti wara mbeti ni. Na ndade ni, bê ti molenge-wali ni asi lani na ngia ti kangbi buku ni 18.
Amaseka tongaso awara ngia mingi ti sepela Jéhovah na ekole. Zia e kue e mû tapande ti wâ so amaseka so ayeke na ni.