I amaseka, i sepela Jéhovah!

“Na sese, i sepela L’Eternel, i . . . apendere koli na amasia.”​—PSAUME 148:7, 12.

MINGI ni, amaseka ahinga nzoni aye so ade a zia lege na ala pëpe ti sala ni. Mingi ti ala alingbi hio ti fa na mo wungo ti ngu so ala yeke wara ni ande awe si a yeke mû yanga na ala ti fâ lege gi ala oko, ti duti na gigi juska a si na mbeni ngbonga ti bï si ala gue ti lango wala ti kpe na kutukutu. Ngoi na ngoi, mbeni maseka alingbi ti bâ so mingi ti aye so lo hunda ti wara ni hio, kiringo tënë so lo wara ayeke lakue so: “Ku mo kono si.”

² I amaseka, i hinga so ababâ na mama ti i abâ so a yeke lege ti ndara ti lu akatikati so, peut-être ti bata i nzoni. Nga, i hinga biani so bê ti Jéhovah ayeke nzere tongana i mä yanga ti ababâ na mama ti i (aColossien 3:20). Ye oko, na ndo akatikati nde nde kue so a zia na i, a si na i lani awe ti bâ so ade tâ gigi ti i ato nda ni pëpe? Même aye kue so ayeke tâ kota mingi, a kanga lege na i ti sala ni juska i kono awe si? A yeke tongaso oko pëpe! Mbeni kua ayeke dä so a yeke sala ni laso, na so ayeke kota mingi ahon ye kue so i lingbi ti ku ti sala. A zia lege na i amaseka ti ga ti sala kua so? Ye so ayeke tâ nzoni mingi ayeke so Nzapa Ti Nduzu Ahon Kue atisa i biani ti sala ni!

³ E yeke sala tënë ti kua ti nyen ge? Bâ atënë ti yâ ti versê ti kota li ti tënë ti article so: “Na sese, i sepela L’Eternel, i . . . apendere koli na amasia, ambakoro koli na amolenge.” (Psaume 148:7, 12). Bâ kota matabisi so mo yeke na ni: mo lingbi ti sepela Jéhovah. Mo so mo yeke maseka, mo yeke na kota ngia ti mû mbage na kua so? Amaseka mingi ayeke na kota ngia ti sala ni. Ti hinga nda ni so a yeke kota ye ti duti na ngia mingi ti sala kua so, zia e bâ ahundango tënë ota. Kozoni, ngbanga ti nyen a lingbi mo sepela Jéhovah? Use ni, tongana nyen mo lingbi ti sepela lo nzoni mingi? Na ota ni, tâ nzoni ngoi ti to nda ti sepela Jéhovah ayeke lawa?

Ngbanga ti nyen ti sepela Jéhovah?

⁴ Mbeni kota nda ti tënë ti sepela Jéhovah ayeke so lo yeke Wasalango ye. Psaume 148 ayeke mû maboko na e ti luti mingi na ndo tâ tënë so. Bâ kete: tongana mo ga ndulu na mbeni groupe ti azo so ayeke he na lego oko mbeni bia so ayeke pendere nga andu bê, tele ti mo ayeke nzere wala ayeke nzere pëpe? Ka tongana atënë ti yâ ti bia ni ayeke atënë so mo hinga a yeke tâ tënë, a fa abibe so mo hinga so ayeke anene tënë, abibe so ayeke zia ngia na bê ti zo nga anzere mingi? Mo yeke duti ande na nzara ti manda atënë ti bia ni nga ti bungbi na azo ni ti he ni? Mingi ti azo na popo ti e ayeke sala tongaso. Psaume 148 afa so a yeke mara ti ye so la mo yeke na yâ ni, me ti so mo yeke na yâ ni so ayeke tâ pendere mingi. Psaume so ayeke fa gbâ ti azo so ala kue ayeke sepela Jéhovah na lego oko. Ye oko, tongana mo diko psaume so, mo yeke bâ mbeni ye so ayeke tâ nde mingi. Ye ni ayeke nyen?

⁵ Mingi ti aye so ayeke sepela Nzapa na so a sala tënë ti ala na yâ Psaume 148 alingbi ti sala tënë pëpe wala ti fa nda ti ye pëpe. Na tapande, e yeke diko tënë ti lâ, nze, atongoro, pupu ti ngangu, ahoto na akete hoto so ayeke sepela Jéhovah. Tongana nyen si aye so, so ayeke na fini pëpe, ayeke sepela Jéhovah? (versê 3, 8, 9). Biani, akeke, anyama so ayeke na yâ ti ngu nga na anyama ti gigi ayeke sala nga gi tongaso (versê 7, 9, 10). Mo bâ pendere lindango ti lâ awe? wala nze so aga ngbongboro ni kue awe si ayeke hon na popo ti gbâ ti atongoro? Ka ti anyama so ayeke sala ngia na popo ti ala nga na ti mbeni ndo so ayeke pendere? Tele ti mo ayeke nzere tongana mo bâ anyama so, wala bê ti mo adö ngangu ti bâ pendere ndo so? A yeke na lege so si mo “mä” bia ti sepela so alondo na mbage ti aye so Nzapa aleke. Aye kue so Jéhovah aleke adabe ti e so lo yeke Wasalango ye ti ngangu ahon kue, nga so na yâ ti dunia kue zo oko pëpe ayeke na mara ti ngangu, mara ti ndara wala mara ti ndoye tongaso.​—aRomain 1:20; Apocalypse 4:11.

⁶ Psaume 148 asala nga tënë ti a-ange nga na azo so ayeke sepela Jéhovah. Na versê 2 ni, e wara tënë ti “a-ange” so ayeke sepela Jéhovah. Na versê 11, a tisa azo tongana agbia nga na ajuge, so ala yeke na ngangu na ndo azo, ti ga ti sepela Nzapa. Tongana a-ange so ayeke azo ti ngangu mingi ayeke na kota ngia ti sepela Jéhovah, senge zo ti sese ayeke na droit ti bâ tele ti lo so lo yeke tâ kota mingi na lo lingbi pëpe ti sala tongaso? Na pekoni, na versê 12 nga na 13, a tisa i amaseka nga ti ga ti sepela Jéhovah. Bê ti mo ayeke pusu mo ti sala ni?

⁷ Gbu li na ndo tapande so. Tongana mo yeke na mbeni kota kamarade ti mo so peut-être lo hinga ti pika ballon wala mozoko nzoni mingi, wala lo hinga ti sala apendere dessin, mo yeke sala tënë ti lo na azo ti sewa ti mo nga na ambeni kamarade ti mo pëpe? Biani, mo yeke sala ni. Legeoko nga, mandango ye na ndo aye kue so Jéhovah asala alingbi nga ti pusu e ti sala tongaso. Na tapande, Psaume 19:2, 3 atene so lê ti nduzu so asi singo na atongoro ayeke pusu zo ti “sala tënë”. Ti e, tongana e yeke gbu li na ndo akota ye ti dongo bê so Jéhovah asala, e lingbi pëpe ti gbanzi tele ti e ti sala tënë ti Nzapa ti e na azo.

⁸ Mbeni kpengba nda ti tënë ti sepela Jéhovah ayeke so lo ye si e sala ni. Ndali ti nyen? Ndali ti so lo yeke na bezoin ti tene azo asepela lo? Ên-ën. Ngoi na ngoi, e azo e yeke na bezoin ti tene a gonda e, me Jéhovah ayeke kota mingi ahon e (Esaïe 55:8). Lo yeke nga na kite pëpe na ndo lo mveni wala na ndo dutingo ti lo (Esaïe 45:5). Ye oko, lo ye si e sepela lo. Nga, tongana e sala ni, a nzere na lo mingi. Ngbanga ti nyen? Zia e bâ anda ti tënë use. Kozoni, lo hinga so e yeke na kota nzara ti sepela lo. Lo zia mbeni nzara ti ye ti yingo na yâ e, nzara ti vorongo lo (Matthieu 5:3). A yeke nzere na Jéhovah mingi ti bâ e na kaïngo nzara so, tâ gi legeoko tongana ti so tele ti babâ na mama ti mo ayeke nzere ti bâ mo na tengo kobe so ala hinga atene a yeke sala nzoni na mo.​—Jean 4:34.

⁹ Use ni, Jéhovah ahinga so ambeni zo ayeke na bezoin ti mä e na sepelango lo. Bazengele Paul asû tënë so na maseka-koli Timothée: “Mo bata lege ti mo, na mo bata tënë so mo yeke fa. Mo sala ye so lakue; teti na yâ kusala so, fade mo sö mo mveni na ala so amä mo.” (1 Timothée 4:16). Biani, tongana mo fa ye na azo na ndo Jéhovah Nzapa, mo yeke sepela lo, na azo ni alingbi nga ti hinga Jéhovah. Mara ti hingango ye so alingbi ti mû lege na ala ti sö fini ti ala na ti wara fini ti lakue lakue!​—Jean 17:3.

¹⁰ Mbeni ota nda ti tënë ti sepela Jéhovah ayeke dä. Dabe mo na tapande ti kpengba kamarade ti mo so. Tongana mo mä so azo adü mvene na li ti lo, adiko asioni tënë na iri ti lo, mo yeke londo ti gonda lo pëpe? Ti bâ nzoni, a diko sioni tënë mingi na iri ti Jéhovah na yâ sese so (Jean 8:44; Apocalypse 12:9). Tongaso, ala so aye lo, bê ti ala apusu ala ti tene tâ tënë na ndo lo, na tongaso ala buba yâ ti amvene so a tene na iri ti lo. Mo nga mo ye ti fa ndoye nga na singila ti bê ti mo na mbage ti Jéhovah, na ti fa so mo ye lo duti Gbia ti mo, me pëpe Satan, kota wato ti lo? Mo lingbi ti sala aye so kue gi na sepelango Jéhovah. Tongaso, hundango tënë ni ayeke so: Mo yeke sepela lo tongana nyen?

Lege so ambeni maseka asepela Jéhovah ândö

¹¹ Bible afa so fani mingi amaseka ayeke sala tâ ye ti nzoni mingi na sepelango Jéhovah. Na tapande, mbeni maseka-wali ti Israël ayeke dä so azo ti Syrie agbu lo na ngbâa. Na wali so lo yeke sala kua na gbe ti lo, lo fa tënë na mbito pëpe na ndo Elisée prophète ti Jéhovah. Ndali ti tënë so lo fa, a sala mbeni miracle, nga a fa mbeni kpengba tënë na ndo Jéhovah (2 aGbia 5:1-17). Na ngoi so lo de lani kete, Jésus nga afa tënë na mbito pëpe. Na popo ti aye kue so asi na ngoi so lo de kete na so a lingbi ti sû pekoni na yâ Mbeti ti Nzapa, Jéhovah asoro gi mbeni oko: a yeke ti so tongana lo yeke na ngu 12, na mbito pëpe, Jésus ahunda tënë na azo so ayeke fa tënë ti Nzapa na temple na Jérusalem si li ti ala kue akpe ndali ti hingango ye so lo yeke na ni na ndo tënë ti Jéhovah.​—Luc 2:46-49.

¹² Tongana lo kono awe, Jésus nga azia nzara ti sepelango Jéhovah na bê ti amolenge. Na tapande, gi ambeni lango kete kozoni na kuâ ti lo, Jésus amû mbeni ngoi ti duti na temple na Jérusalem. Bible atene so lo sala “ye ti kpene” kâ. Lo tomba ala so asala si ndo so ayeke nzoni-kue aga dû ti azo ti nzi. Lo sava azo so lê ti ala wala mbeni mbage ti tele ti ala abuba. Bê ti azo kue so ayeke kâ, mbilimbili amokonzi-nzapa, alingbi fade ti pusu ala ti sepela Jéhovah nga na Molenge ti lo, Messie ni. Ye oko, mawa ni ayeke so a mä atënë ti sepela so pëpe na yanga ti mingi ti azo so ayeke dä na ngoi ni so. Ala hinga so Nzapa la atokua Jésus, me mbito ti amokonzi-nzapa asala ala. Ye oko, mbeni groupe ti azo asala tënë na mbito pëpe. Mo hinga ala? Bible atene: “Tongana akota sacrificateur na amaître ti ndia abâ ye ti kpene so [Jésus asala], na amolenge so ayeke tene na kongo na yâ Temple, Hosanna na Molenge Ti David! bê ti ala aso mingi, ala tene na [Jésus], Mo mä tënë so ala yeke tene?”​—Matthieu 21:15, 16; Jean 12:42.

¹³ Aprêtre so ayeke ku ti tene Jésus atene na amolenge so ayeke gonda lo ti kanga yanga ti ala. Lo sala ni? Oko pëpe! Jésus akiri tënë na aprêtre ni: “Biani; i diko na mbeti lâ oko pëpe? Na lege ti tënë so asigigi na yanga ti amolenge na ti ala so ade ti nyon me, Mo sala si tënë ti merci [wala ti gonda] aga ye so alingbi kue.” Biani, atënë ti sepela so alondo na amolenge ni anzere mingi na Jésus nga na Babâ ti lo. Amolenge so asala mbeni ye so akota zo kue so ayeke dä na ngoi ni so alingbi fade ti sala. Na yâ ti li ti amolenge so, ye kue ayeke polele. Ala bâ koli so asala aye ti kpene, lo sala tënë na wâ nga na mabe, lo fa na gigi kota ndoye teti Nzapa nga na azo ti lo. Lo yeke tâ zo so lo tene lo yeke: “Molenge ti David” so a mû zendo ti lo, Messie ni. Tongana futa ti mabe ti ala, amolenge ni awara même matabisi ti sala si mbeni prophétie aga tâ tënë.​—Psaume 8:3.

¹⁴ Aye wa e lingbi ti manda na ndo atapande tongaso? Atapande so afa atene amaseka alingbi ti duti akpengba zo ti sepelango Jéhovah. Mingi ni, tâ tënë ayeke sigigi polele nga hio na lê ti ala, ala yeke fa na wâ nga na bê ti ala kue aye so ala mä na bê dä. Ala yeke nga na matabisi so a fa ni na aProverbe 20:29: “Ngangu ti apendere koli ayeke gloire ti ala.” Biani, i amaseka, i yeke na ngangu, so ayeke tâ kpengba nzoni ye so e yeke na ni ti sepela Jéhovah. Tongana nyen i lingbi mbilimbili ti sala kua na amatabisi tongaso?

Tongana nyen mo lingbi ti sepela Jéhovah?

¹⁵ Ti duti zo so ayeke sepela Nzapa nzoni ayeke mbeni ye so alondo na bê ti zo. Mo lingbi pëpe ti sepela Jéhovah nzoni tongana mo yeke sala ni ndali ti so azo aye si mo sala ni. Girisa pëpe so komandema so ayeke kota ahon atanga ni kue ayeke so: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue.” (Matthieu 22:37). Mo wara lege awe ti hinga Jéhovah na lege ti mandango Tënë ti lo mo mveni? Nzoni ye so ayeke ga na peko ti mara ti mandango ye tongaso ayeke dutingo na ndoye ti Jéhovah na yâ bê ti mo. Oko lege ti fango ndoye so na gigi ayeke na sepelango lo. Tongana aye so apusu mo ti sala ye ayeke polele nga aluti nzoni awe, mo yeke fadeso ndulu ti sepela Jéhovah na wâ.

¹⁶ Ti fadeso, même kozo si mo gbu li na ndo ye so mo yeke tene ande, gbu li na ndo lege so mo yeke sala ye ande. Tongana fade maseka-wali ti Israël ti ngoi ti Elisée ayeke mbeni molenge so lo yeke na sioni yanga, lo yeke kpe zo pëpe wala lo yeke sala ye na lege ni pëpe, mo pensé so azo ti Syrie so agbu lo ayeke mä tënë so lo tene na ndo prophète ti Jéhovah? Oko pëpe. Legeoko nga, peut-être azo ayeke mä mo nzoni mingi tongana ala bâ so mo yeke kpe zo, mo yeke sala ye na lege ni nga salango ye ti mo ayeke nzoni (aRomain 2:21). Bâ mbeni tapande.

¹⁷ Na ekole mbeni maseka-wali ti ngu 11 na Portugal atingbi na mbeni tara so andu salango amatanga so ague nde na yingo-ti-hinga ti lo so Bible afa lege na ni. Na nengo tele, lo fa na zo so afa mbeti na lo ngbanga ti nyen lo ke. Me wafango mbeti ni ahe lo. Tongana ngoi ayeke hon, lakue lakue wafango mbeti ni ayeke tara ti zia kamene na lê ti lo na hengo bungbi ti vorongo ti lo. Ye oko, maseka-wali so angbâ ti ne lo. Ngu mingi na pekoni, maseka-wali so asala kua tongana pionnier, wakua ti ngoi kue. Na mbeni kota bungbi, lo bâ azo so ayeke wara batême na lo hinga mbeni oko. A yeke ngbele zo so afa mbeti na lo! Na peko ti so ala gbu tele na ngia, fini ita-wali ni atene na lo maseka-wali ni so ni girisa lâ oko pëpe salango ye ti lo na nengo zo. Mbeni Témoin asi lani na yanga-da ti lo, na wafango mbeti ni asala tënë ti salango ye ti ngbele élève ti lo so. Ni la na pekoni, a to nda ti manda Bible na lo, na wali so ayeda na tâ tënë. Tongana ti so tapande so afa, salango ye ti mo alingbi ti duti mbeni kpengba lege ti sepela Jéhovah!

¹⁸ Ngoi na ngoi mo bâ so na ekole a yeke ngangu ti to nda ti sala lisoro na ndo aye so mo mä na bê dä? Gi mo oko la mo yeke na bibe so pëpe. Ye oko, mo mveni mo lingbi ti sala ye mingi ti tene azo ahunda mo ande na ndo atënë ti mabe ti mo. Na tapande, tongana ndia ake ni pëpe na mbeni ye oko akanga lege na ni pëpe, mo lingbi ti ga na ambeti ti Nzapa na ekole nga ti diko ni na ngoi ti hungo tele wala na angoi so lege azi ti sala ni. Amba ti mo alingbi ti hunda mo na ndo ye so mo yeke diko. Na kiringo tënë na ala nga na fango na ala aye so anzere na mo na yâ ti article ni wala buku so mo yeke diko, mo lingbi ti bâ so hio mo to nda ti mbeni nzoni lisoro. Girisa pëpe ti hunda atënë, ti hinga aye so amba ti mo élève ni amä na bê na ni. Mä ala nzoni, fa na ala ye so mo manda na yâ ti Bible. Tongana ti so a sigigi na yâ ti aye so ayeke na lembeti 29, amaseka mingi asepela Nzapa na ekole. Ye so asala si ala wara kota ngia nga a mû maboko na azo mingi ti hinga Jéhovah.

¹⁹ Fango tënë da na da ayeke mbeni nzoni lege so ahon atanga ni kue ti sepela Jéhovah. Tongana ade mo mû mbage ti mo dä pëpe, ngbanga ti nyen mo zia ni na gbele mo pëpe? Tongana mo yeke sala ni fadeso, ambeni ye ayeke dä so mo lingbi ti zia na gbele mo ti wara? Na tapande, ahon ti tene gi oko tënë na yanga ti da oko oko, gi alege ti gbian yâ ti fango tënë ti mo si a ga nzoni, hunda babâ na mama ti mo nga na aTémoin so ayeke na akode mingi ti wara anzoni wango. Manda tongana nyen ti sala kua mingi na Bible, ti sala avizite so ayeke nzoni nga ti to nda ti mbeni étude (1 Timothée 4:15). Tongana mo yeke sepela Jéhovah mingi na alege so, kode ti mo ayeke lë ande lengo mingi, nga mo yeke wara ande ngia mingi na yâ fango tënë ti mo.

Lawa si mo lingbi ti to nda ti sepela Jéhovah?

²⁰ Na popo ti ahundango tënë ota so e bâ na yâ article so, kiringo tënë ti ndangba hundango tënë ni akpengba oko pëpe. Bâ kiringo tënë ti Bible so ayeke polele: “Fadeso, mo dabe mo na Lo so acréé mo, na lâ ti pendere ti mo.” (Zo-ti-fa-tene 12:3). Biani, a yeke fadeso ngoi ti to nda ti sepela Jéhovah. A yeke ngangu oko pëpe ti tene: “Mbi ngbâ kete mingi ti sepela Jéhovah. Ade mbi hinga ye mingi pëpe. Mbi ku mbi kono si.” Mo yeke pëpe kozo zo ti wara mara ti bibe so. Na tapande, maseka Jérémie atene ândö na Jéhovah: “Aï, Seigneur L’Eternel! bâ, mbi hinga lege ti sala tënë pëpe, teti mbi de molenge.” Jéhovah adë bê ti lo so mbeni nda ti tënë ti sala mbito ayeke pëpe (Jérémie 1:6, 7). Legeoko nga, e yeke na mbeni ye oko pëpe ti sala mbito ni tongana e yeke sepela Jéhovah. Mbeni ye ti sioni so alingbi ti si na e na so Jéhovah alingbi pëpe ti zi ni kue ayeke pëpe.​—Psaume 118:6.

²¹ Ni la, e mû wango so na i amaseka: ku pëpe ti sepela Jéhovah! Fadeso, so mo yeke maseka, a yeke tâ nzoni ngoi ti mû mbage ti mo na kota kua so ahon atanga ni kue so a yeke sala ni laso na ndo sese kue. Tongana mo sala ni, mo yeke ga membre ti mbeni ye so ayeke pendere mingi: sewa ti azo so ayeke sepela Jéhovah na yâ ti dunia kue. Jéhovah ayeke na kota ngia so mo yeke na yâ ti sewa so. Bâ tënë so wasungo psaume atene ni na Jéhovah na gbe ti yingo vulu: “Azo ti Mo amû ala mveni na nzobe, na lâ ti bira ti Mo, ala yü ye ti pendere ti nzoni-kue; apendere ti Mo ayeke tongana mamio ti ndapelele.”​—Psaume 110:3.

²² Angu ti mamio so ayeke za na ngoi so lumière asigigi na ndapelele ayeke pendere mingi. A dë pendere, a yeke za zango nga a lingbi ti diko ni pëpe ndali ti so a yeke gbâ ni gbâ ni. A yeke tongaso la Jéhovah ayeke bâ i amaseka so i ngbâ be-ta-zo ti sepela lo na lâ ti aye ti ngangu so. Biani, bê ti Jéhovah ayeke tâ na ngia mingi so mo soro ti sepela lo (aProverbe 27:11). Tongaso, i amaseka, zia i sepela Jéhovah na alege kue!

Mo yeke kiri tënë tongana nyen?

• Ambeni kota nda ti tënë ti sepela Jéhovah ayeke so wa?

• Na yâ ti Bible, atapande wa afa so amaseka alingbi ti sepela Jéhovah nzoni mingi?

• Tongana nyen amaseka alingbi ti sepela Jéhovah laso?

• Lawa amaseka alingbi ti to nda ti sepela Jéhovah? Na ngbanga ti nyen?

[Ahundango tënë ti manda na ye]

1, 2. (a) Amaseka mingi ahinga aye wa so a kanga lege na ala ti sala ni? (b) Ngbanga ti nyen a lingbi bê ti amaseka aso pëpe teti akatikati so ababâ na mama ti ala azia na ala?

3. Jéhovah atisa amaseka ti mû mbage na mbeni kua so ayeke nde. Kua ti nyen? Ahundango tënë wa e yeke bâ ni fadeso?

4, 5. (a) Na lege ti Psaume 148, e yeke na yâ ti pendere ye wa? (b) Aye so Jéhovah aleke na so ayeke sala tënë pëpe wala ayeke fa nda ti tënë pëpe alingbi ti sepela lo tongana nyen?

6, 7. (a) Psaume 148 asala tënë ti azo wa so ayeke sepela Jéhovah? (b) Ngbanga ti nyen bê ti e alingbi ti pusu e ti sepela Jéhovah? Mû mbeni tapande.

8, 9. Ngbanga ti anda ti tënë wa Jéhovah aye si e sepela lo?

10. Ngbanga ti nyen bê ti e ayeke pusu e ti sepela Nzapa?

11. Na yâ ti Bible, atapande wa afa so amaseka alingbi ti sala tâ ye ti nzoni mingi na sepelango Jéhovah?

12, 13. (a) Ngoi kete kozoni na kuâ ti lo, aye wa Jésus asala na yâ ti temple? Na aye so lo sala asala nyen na ndo azo so ayeke kâ? (b) Jésus abâ atënë ti sepela ti amolenge so tongana nyen?

14. Tongana nyen akpengba nzoni ye so amaseka ayeke na ni ayeke mû lege na ala ti sepela Nzapa?

15. Ti sepela Jéhovah tâ nzoni, a lingbi kota ye so apusu zo ti sala ye aduti nyen?

16, 17. Tambela ti mo ayeke sala nyen na yâ sepelango Jéhovah? Mû mbeni tapande.

18. Mbeni maseka alingbi ti sala nyen tongana lo yeke na mbito kete ti to nda ti sala lisoro na ndo Bible nga na ndo Jéhovah Nzapa?

19. Tongana nyen amaseka alingbi ti ga azo so ayeke wara nzoni ye mingi na lege ti fango tënë da na da?

20. Ngbanga ti nyen a lingbi amaseka atene pëpe so ala de kete mingi ti sepela Jéhovah?

21, 22. Ngbanga ti nyen a haka amaseka so ayeke sepela Jéhovah na angu ti mamio? Ngbanga ti nyen hakango ye so ayeke ye ti mungo wâ na zo?

[Afoto na lembeti 25]

Tongana kamarade ti mo ahinga mbeni ye nzoni mingi, mo yeke sala tënë ni na ambeni zo pëpe?

[Foto na lembeti 27]

Amba ti mo élève alingbi ti sala nzara ti atënë ti mabe ti mo

[Foto na lembeti 28]

Tongana mo ye si fango tënë ti mo aga nzoni ahon ti kozo, hunda aTémoin so ayeke na akode mingi ti wara anzoni wango