E ye ti bata anzoni ye so a sara ândö

MBAÏ ti aTémoin ti Jéhovah aninga nga asi singo na gbâ ti aye ti nzoni na lege ti yingo. Nde na ambeti ti e so ayeke mû lege na e ti hinga ye nzoni na ndo ti mbaï ti awakua ti Jéhovah, e lingbi nga ti hinga ni na lege ti afoto, alettre, atondo ti ambeni Témoin, nga na ambeni gbakuru so azo aleke ni so andu vorongo Jéhovah, kusala ti fango tënë nga na mbaï ti e. Me ye ti nzoni wa la e yeke wara na batango mara ti agbakuru tongaso, nga nzoni ye wa la e yeke wara tongana e gi ti hinga mbaï ti e? Biani, na ngoi ti azo ti Israël a yeke ti ababâ ti sewa ti fa na amolenge ti ala andia ti Jéhovah nga na apendere kusala ti lo tongaso si ala “zia bê ti ala na Nzapa”.​—Ps. 78:1-7.

Ngbene ye giriri gingo nda ti ye na yâ ti angbene mbeti so a bata ni amû maboko ti tene ye so Jéhovah aleke ti sara aga tâ tënë. Na tapande, tongana awato agi lani ti kanga lege na kusala ti temple so a yeke sara ni na Jérusalem, azo ague na ndo so a yeke bata angbene mbeti dä na Ecbatane, kota gbata ti kodoro ti Médie, ala gi kota mbeti so Gbia Cyrus asû maboko dä so amû lege ti kiri ti leke temple ti Jérusalem (Esdras 6:1-4, 12). A yeke tongaso la a kiri a leke lani temple ti gue oko na ye so bê ti Nzapa aye. Wasungo Évangile Luc so ‘agi nda ti aye kue mbilimbili, ngbene ye so aye ni ato nda ni’ asara nga kusala na angbene mbeti so a bata ni.​—Luc 1:1-4.

Bebungbi ayeke bi bê ti lo mingi na mbaï ti awakua ti Jéhovah. Mbeni membre ti Bebungbi asara tënë na ndo ti nene ti batango ambeti nga na ye ti héritier ti e na lege ti yingo. Lo tene tongana e hinga mbaï ti e, a yeke mû ngangu na e nga e yeke ngbâ lakue ti gue na li ni. A yeke ndali ni la ade ti ninga pëpe, na kota ndokua ti aTémoin ti Jéhovah na Brooklyn, New York, a zia na sese Ndokua so ayeke bâ lege ti batango angbene ye. Ndokua ni so ayeke na gbe ti komité ti sungo ambeti.

“ALBUM TI AFOTO TI SEWA TI E” NGA NA “AYE TI HÉRITIER” TI E

Tongana ngoi ayeke hon, e yeke girisa na ndo ti ambeni ye, na peut-être mingi ti e aye ti duti na mbeni tondo na ndo ti azo kue ti yâ ti sewa ti ala. Na yâ ti ndokua so, a yeke sara kua ngangu na ndembe so ti bata ambeti ti e so ayeke tongana mbeni mosoro nga na aye ti héritier ti e so wungo ni angbâ lakue ti gue gi guengo na li ni nga a yeke ga na ambeni na ndo ni. A lingbi ti bâ afoto so a bata ni nzoni na yâ ti ndokua so tongana mbeni mbage ti “album ti afoto ti sewa ti e.” Na popo ti aye so a bata ni kâ, a yeke wara nga akozo mbeti ti e, apendere mbaï ti akozo Témoin ti ngoi ti e nga na ambeni ye ti souvenir so ngere ni ayeke kota mingi. Aye so ayeke tongana “aye ti héritier” so amû na e lege ti hinga mbaï ti bungbi ti Jéhovah nga amû maboko na e ti ku na bê kue mbeni nzoni gigi ti kekereke teti sewa ti e ti yingo.

E tisa mo ti bi lê na yâ ti Ndokua so ayeke bâ lege ti batango angbene ye na lege ti fini article so iri ni ayeke “Sango na ndo ti mbaï ti bungbi ti e.” Article so ayeke sigigi ngoi na ngoi na yâ ti Tour ti Ba Ndo ti mandango ni. Na tapande, na yâ ti Tour ti Ba Ndo ti mandango ni ti peko, e leke ti sigi na mbeni tondo so a-image ayeke dä so ayeke kiri tënë na ahundango ndo so: Valise so ândö aita ayeke zia buku L’Aurore du Millénium dä ayeke nyen? Azo wa la asara kusala na ni lani? A sara kusala na ni na ngoi wa nga ndali ti nyen?

Aye so a bata ni na Ndokua so ayeke bâ lege ti batango angbene ye so ayeke tongana album ti angbene foto na ayeke fa na e aye mingi na ndo ti e nga na awakua ti Jéhovah so ayeke kozo na e. A sara tënë na ndo ti mabe ti ala nga na sarango ye ti ala na mbeto pëpe, angia nga na akpale so zo ayeke wara na sarango na Babâ ti e ti yayu so ayeke sara ye na ndoye. A sara nga tënë na ndo ti fango lege ti Nzapa nga na maboko so lo yeke mû lakue na azo ti lo (Deut. 33:27). E yeke na beku so Jéhovah ayeke iri tënë nzoni na ndo ti ngangu so e yeke sara lakue ti bata mbaï ti bungbi ti e tongaso si e ngbâ lakue beoko nga e wara ngangu ti sara ye so bê ti lo aye.

[Encadré/​Foto na lembeti 31]

Bango aye ni nzoni

Na ngoi ti sungo ambeti ti e, wala ti sarango avidéo wala ti sarango ambeni ye nde so aluti na ndo ti Bible, azo ti sungo ambeti ni, ala so ayeke sara avidéo nga na ambeni zo ti gingo nda ti ye ayeke sara kusala na aye so ayeke na Ndokua so ayeke bâ lege ti batango angbene ye. Ni la, Ndokua so ayeke bâ lege ti batango angbene ye ayeke sara ngangu ti bungbi nga ti bata gbâ ti angbene ye so alondo na afiliale, andokua so ayeke na yâ ti aBéthel, acongrégation, ambeni zo nga na ambeni ndokua so ayeke na yâ ti akodoro. Zia e gi ti bâ ambeni kusala ti ndokua so.

A wara aye ni nga a bâ ni nzoni: Lakue tongana a wara ambeni ngbene ye so a yeke ngangu ti wara mara ni, a yeke zia ni na ndokua so. Mingi ti aye ni so alondo na azo so afami ti ala asara na Jéhovah teti angu mingi. Ti bâ aye ni so nzoni nga ti haka ni na ambeni ayeke mû maboko na e ti kiri ti hinga nzoni mingi aye so asi ândö na yâ ti bungbi ti Jéhovah nga na azo so ayeke na fini na ngoi ni so.

A leke aye ni na molongo ni: Na yâ ti Ndokua so ayeke bâ lege ti angbene mbeti a yeke wara aye saki na saki, ambeni ye ni aninga ahon ngu ngbangbo oko. A yeke mara ti aye nde nde la ayeke na yâ ni so a lingbi a leke ni na molongo ni tongaso si a sara na kusala mbeni lâ.

Lekengo peko ti aye ni nga batango ni: Ambeni mbeti nga na aye so mbeni ye alingbi ti buba ni hio, a sara kusala na ambeni kode so ayeke nzoni mingi ti leke peko ni nga ti bata ni. A mû aye tongana abuku, afoto, ambeni lembeti ti ambeti-sango, afilm nga na akasete a zia na ndo ti ordinateur. Tongaso, zo alingbi ti bâ ni na ndo ti ordinateur. Ye so amû lege ti bata atâ mbeti ni nga na aye so ayeke ngbene ni si zo andu ni pëpe ndali ti abuba.

A bata aye ni na mbeni lege so zo alingbi ti wara ni: A bata angbene ye so na ordre nga na mbeni lege so asara si aye alingbi ti girisa pëpe. A sara nga kue ti tene lumière abuba ni pëpe nga si gugu asigi dä pëpe. A sara kusala na mbeni kode ti zia aye ni so kue na ndo ti ordinateur. Ye so ayeke mû lege na zo ti gi nda ti ye na ndo ti apendere mosoro ti giriri so na ndo ti ordinateur na ti wara ni.

[Afoto na lembeti 32]

1. Mbeti so afa tënë ti “Photo-Drame de la Création.” 2. Liste ti a-abonnement. 3. Oto so haut-parleur ayeke na ndo ni. 4. Couverture ti Tour ti Ba Ndo ti lango 15 ti avril ngu 1912. 5. Mbeti ti kanga ti J. F. Rutherford. 6. Micro ti radio WBBR. 7. Phonographe. 8. Valise so a zia abuku dä. 9. Anote so mbeni zo amû. 10. Mbeti so a tokua na J. F. Rutherford.