Mo lingbi ti sara si gigi ti mo ti kekereke aga nzoni, me tongana nyen?

MO LINGBI ti sara nyen ti tene gigi ti mo ti kekereke aga tâ nzoni? Mbeni ye ni ayeke ti tene mo sara kua na hingango ndo so mo yeke na ni ti bâ wala adesizion so mo yeke mû laso ayeke ga na mo aye ti nzoni so ayeke ninga wala pëpe.

E hinga so a lingbi ti duti ngangu na mo ti mû adesizion so ayeke sara nzoni na mo na yâ ti gigi ti mo kue. Ngbanga ti nyen? Ngbanga ti so azo mingi aye ti sara gi ye so anzere na ala laso laso. Na tapande, peut-être mo bâ so tongana mo sara ye ague oko na awango ti Bible, sewa ti mo ayeke duti na ngia (aÉphésien 5:22–6:4). Me ti tene a duti tongaso, a lingbi mo mû ngoi mingi ti duti lakue na tere ti sewa ti mo. Me na oko ngoi ni nga, ambeni zo ayeke tene na mo so a lingbi mo sara nga kua mingi na mo sara ngia. Na yâ ti aye mingi, mo yeke na ye use ti soro: wala ti sara ye ti bê ti mo na ti wara ngia dä gi teti kete ngoi, wala ti sara ye so mo yeke wara ngia dä teti lakue lakue. Mo yeke sara nyen ti soro tâ nzoni ye ni? E wa mo ti sara aye osio so ge.

1 Gi ti bâ aye so ayeke ga na peko ti adesizion ti mo

Tongana mo yeke na gbele mbeni desizion ti mungo ni, kanga lê ape me bâ aye ti pekoni ayeke duti ande so wa. Bible amû wango so, lo tene: “Zo ti ndara abâ ye ti sioni, na lo honde tere ti lo.” (aProverbe 22:3). Tongana mo bâ aye ni na nzoni lê, mo yeke mû ande pëpe mbeni desizion so alingbi ti sara sioni na mo. Nga, tongana mo bâ so desizion so mo ye ti mû ayeke ga na mo aye ti nzoni teti lakue lakue, a yeke pusu mo ti sara ye ague oko na ni.

Hunda tere ti mo, mo tene: ‘Desizion so mbi mû laso ayeke ga ande na mbi nyen na yâ ti ngu oko, wala même na yâ ti ngu 10 wala 20? A yeke sara si mbi duti na ngia wala na mawa? A yeke ga na mbi kpale na lege ti seni ape? Desizion ti mbi ni ayeke sara ande nyen na ndo ti sewa ti mbi?’ A yeke nga nzoni ti hunda tere ti mo: ‘Desizion ti mbi ni ayeke nzere ande na Nzapa la? A yeke sara ande nyen na ndo ti songo ti mbi na lo?’ Teti so Bible alondo na yanga ti Nzapa, a lingbi ti mû maboko na mo ti hinga ye so anzere na lo na ti sara hange na aye so peut-être mo bâ ni ape.​—aProverbe 14:12; 2 Timothée 3:16.

2 Mû peko ti azo senge senge pëpe

Ti azo mingi, ala yeke mû gi peko ti amba ti ala ahon ti tene ala wani la amû desizion. Me a yeke pëpe ngbanga ti so azo mingi ayeke sara ye tongaso tongaso si mo nga kue tongana mo sara ni a yeke ga na mo ye ti nzoni, ên-ën. Gi ti bâ aye ni mo wani, mû peko ti azo senge senge pëpe. Bâ tapande ti Nathalie.a Lo tene: “Mbi ye lani ti tene tongana mbi mû koli, mariage ti e aduti na ngia. Me mbi bâ so tongana mbi ngbâ ti sara ye so mbi yeke sara so, a yeke duti ngangu ande. Na ekole lani, akamarade ti mbi kue ahinga mbeti, me lakue ala yeke mû gi asioni desizion na yâ ti gigi ti ala. Kete ye, ala yeke changé acopin wala acopine. Mbi nga kue mbi tï na peko ti ala, mbi wara gbâ ti acopin, a sara si mbi yeke na ngia lani ti kete ape.”

Nathalie ato nda ti manda Bible na aTémoin ti Jéhovah. Lo tene: “Na aTémoin kâ, amaseka ayeke na ngia nga akoli na awali so asara mariage aye tere mingi. Atâa so a yeke lani kete ye na mbi ape, yeke na yeke mbi changé bango ndo ti mbi nga na dutingo ti mbi.” Ye ti pekoni ayeke so wa? Lo kiri lo tene: “Nzara ti bê ti mbi lani ayeke ti mû koli so mbi yeke ye lo mingi. A sara si mbi mû koli so mbi na lo e voro Nzapa oko. Mbi bâ so, sân Nzapa, e lingbi fade ti duti na ngia so mbi na koli ti mbi e yeke na ni so laso ape.”

3 Bâ ndo ayo

Ti tene mo bâ ndo ayo, a yeke nga nzoni ti hinga mbilimbili mara ti gigi wa mo ye ti wara ni nga leke aye ti si na ye ni so mo ye (aProverbe 21:5). Laso azo ayeke sara ngu 70 wala 80 na ndo ti dunia so. Tongaso, bâ gi ndo nduru ge ape, me bâ tere ti mo na yâ ti pendere gigi so Bible amû zendo ni, so ayeke fini ti lakue lakue.

Bible afa so na lege ti kuâ ti Christ Jésus, Nzapa aleke ti tene azo awara fini ti lakue lakue (Matthieu 20:28; aRomain 6:23). Nzapa atene so na yâ ti kete ngoi ye so lo leke ândö ndali ti azo na ndo ti sese ayeke ga tâ ye. Ni la, azo so aye Nzapa ayeke wara ande pasa ti ngbâ na fini lakue lakue na ndo ti sese so ayeke kiri ti ga pendere (Psaume 37:11; Apocalypse 21:3-5). Mo nga kue mo lingbi ti duti dä gi tongana mo bâ ndo ayo.

4 Gi ti si na aye so mo zia na gbele mo

Mo lingbi ti sara nyen ti wara fini ti lakue lakue ni? Kozoni kue, gi ti manda ye na ndo ti Nzapa (Jean 17:3). Tâ hingango ye ti Bible ayeke kpengba beku ti mo so, tâ tënë, ye so Nzapa amû zendo ni so ayeke ga tâ ye biani. Mara ti mabe tongaso ayeke pusu mo ande ti zia lege ti ambeni ye na ti sara ye so anzere na lê ti Nzapa.

Bâ tapande ti Michaël. Lo tene: “Mbi to nda ti sulêe na ti nyon mbangi na ngu 12. Mbi ga oko ti ambeni bandit, na ti mbi mbi tene mbi yeke kui kozo si mbi wara ngu 30. Ngonzo na vundu ahon ndo ti mbi, na mbi gi ti fâ tere ti mbi lege mingi. Na bê ti mbi lani mbi tene mbeni nzoni ye ayeke dä na yâ ti gigi so! Me mbi wara ni lani ape.” Lani tongana Michaël ayeke na lycée, mbeni mba ti lo bandit ni ato nda ti manda Bible na aTémoin ti Jéhovah. Michaël ayeda nga ti manda ni.

Ye so Michaël amanda na yâ ti Bible achangé bango ndo so lo yeke na ni na ndo ti gigi ti lo ti kekereke. Lo tene: “Mbi manda so ande sese ayeke ga paradis na so azo ayeke duti dä na siriri, mbeto ayeke sara ala ape. Mbi to nda ti bâ tere ti mbi na yâ ni. A sara si mbi ye ti duti na nzoni songo na Jéhovah, me ambeni ye atia mbi lani. Na peko ti so mbi to nda ti manda Bible, a si na ambeni ngoi mbi yeke sulêe, na même mbi sara lango-sioni.”

Michaël asara tongana nyen ti hon ndo ti akpale ti lo ni na ti changé biaku? Lo tene: “Zo so amanda Bible na mbi awa mbi lani ti diko Bible lâ na lâ na ti sara songo na azo so aye ti nzere na lê ti Nzapa. Me mbi bâ so angbene kamarade ti mbi angbâ lani ti sara ngangu na ndo ti mbi. Tongaso, atâa so ala yeke tongana aita ti mbi, mbi fâ yâ ti songo ti mbi na ala.”

Michaël azia na gbele lo ti sara ambeni ye so lo lingbi ti si dä na yâ ti kete ngoi. Ye so amû maboko na lo ti si na kota ye so lo zia na gbele lo, so ayeke ti leke dutingo ti lo alingbi na ye so Nzapa aye. Mo kue mo lingbi ti sara tongana lo. Sara na mbeti aye so mo zia na gbele mo ti si dä na yâ ti ambeni ngoi yongoro kâ, nga sara na mbeti ambeni ye so mo lingbi ti sara ti si dä. Fa aye ni so na azo so alingbi ti mû maboko na mo na yâ ni.

Ku pëpe ti manda ye na ndo ti Nzapa na ti sara ye so lo fa. Sara ambeni ye ti kono ndoye ti mo na mbage ti Nzapa nga na mbage ti Mbeti ti lo, Bible. Bible atene so zo so ayeke sara ye so Nzapa afa, fade ‘ye kue so zo so asara ayeke ga nzoni.’​—Psaume 1:1-3.

[Kete tënë na gbe ni]