‘Lo sara si ngia asi bê ti e’

Jéhovah ayeke pensé na e la? Wala pasi so e azo e yeke bâ so asara ye oko na lo ape? Ye so Bible atene na ndo ti ahundango ndo so adë bê ti e. Ti tâ tënë ni, Nzapa ayeke pensé na e azo, nga lo ye si e duti na ngia. Lâ oko oko Nzapa asara si azo kue, même azo so ahinga pëpe nzoni so lo sara na ala, abâ nzoni na peko ti gbâ ti anzoni ye so lo mû na e. Bâ tënë so bazengele Paul atene na ndo ni.​—Diko Kusala 14:16, 17.

Na gbele azo ti gbata ti Lystre so ayeke voro tâ Nzapa ape, Paul atene: “Na yâ ti angoi so ahon, lo zia lege na amara kue ti mû alege ti bê ti ala, atâa so lo ngbâ gi tongaso pëpe, me lo fa mbeni tënë ti témoin na ndo ti lo na lege ti anzoni ye so lo sara na mungo na ala ngu-nzapa so alondo na nduzu, angoi so alê ti kobe ayeke lë dä mingi nga na akobe mingi mingi na lo sara si ngia asi bê ti ala.” Azo so ayeke mä lani Paul amä yâ ti tënë so tongana nyen?

A yeke ngangu pëpe na azo ti Lystre ti mä yâ ti tënë ti Paul so, ndali ti so ala yeke lani azo ti fango yaka, sese so ala yeke dä awoko pendere nga ngu ayeke dä nzoni. Me tongana ti so Paul atene na ala, Nzapa la asara si ngu-nzapa apika nga si angoi so alê ti kobe ayeke lë ayeke dä. Tongaso, tongana kobe ti yaka ti azo ti Lystre alê gbani nga ala yeke te nzoni kobe, so ayeke peko ti nzoni bê ti Nzapa la.

Tënë so Paul atene na azo ti Lystre so afa na e ambeni kpengba tënë na ndo ti Jéhovah Nzapa.

Jéhovah amû na e liberté ti sara ye so e ye. Versê ni atene so Jéhovah azia lege na amara kue “ti mû alege ti bê ti ala”. Mbeni mbeti so a sû ni ti mû maboko na azo so ayeke kiri peko ti Bible afa so tënë ni so aye nga ti tene “ti sara ye so ala ye” wala “ti sara ye so ala bâ ayeke nzoni na lê ti ala.” Jéhovah agbu zo na ngangu pëpe ti voro lo. Lo mû na e liberté ti sara ye so e ye.​—Deutéronome 30:19.

Jéhovah aye si e hinga lo. Paul atene so Nzapa aduti gi tongaso pëpe, me “lo fa mbeni tënë ti témoin na ndo ti lo”. Mbeti so e sara tënë ni fade atene so tënë ti Paul so aye nga ti tene “Nzapa afa polele na azo so lo Nzapa ni lo yeke tongaso.” Aye so Nzapa asara afa “asarango ye ti tere” ti lo so zo alingbi ti bâ ni ape, ye tongana ndoye, ndara, ngangu nga na nzoni bê ti lo (aRomain 1:20). Jéhovah afa aye mingi na ndo ti lo wani na yâ ti Bible (2 Timothée 3:16, 17). Aye so kue afa polele so lo ye si e hinga lo.

Jéhovah aye si e duti na ngia. Paul atene so Nzapa amû na e ‘akobe mingi mingi na lo sara si ngia asi bê ti e.’ Même mbeni wasiokpari so ahinga Jéhovah ape alingbi ti te ye alingbi na lo nga lo duti kamême na ngia na yâ ti fini ti lo. Me Nzapa aye si e duti na tâ ngia lakue lakue. E yeke wara tâ ngia ni so gi tongana e gi ti hinga tâ tënë na ndo ti lo Nzapa nga e sara ye alingbi na ni na yâ ti fini ti e.​—Psaume 144:15; Matthieu 5:3.

Lango oko oko, Jéhovah ayeke mû aye ti nzoni na e kue. Ni la, e wa mo ti gi ti hinga tongana nyen mo lingbi ti kiri singila na Nzapa so lo mû na e ‘akobe mingi mingi na lo sara si ngia asi bê ti e.’