A-Témoin ti Jéhovah amä na bê na nyen?

A-Témoin ti Jéhovah amä na bê so “atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa, na a yeke nzoni”. (2 Timothée 3:16). E hinga so Bible la apeut ti aidé e ti hinga Zo so asara e nga ti duti na ngia na yâ ti gigi ti e.

Bible atene: “Si ala lingbi hinga gi Mo oko ayeke, Mo so iri ti Mo ayeke [Jéhovah, FD], Mo so Mo yeke Lo Ti Nduzu Ahon Kue na ndo sese kue.” (Psaume 83:19). Ni la, e yeke voro gi Jéhovah Nzapa oko, nga teti so e yeke aTémoin ti lo, e yeke sara kue ti fa iri ti lo na azo.—Ésaïe 43:10-12.

Teti so e yeke aChrétien, e mä na bê so Jésus, so ayeke “Molenge ti Nzapa”,a aga lani na sese ge na lo ga Messie ni (Jean 1:34, 41; 4:25, 26). Na peko ti so Jésus akui lani, Nzapa azingo lo, na lo kiri na yayu (1 aCorinthien 15:3, 4). Na pekoni, lo ga Gbia ti Royaume ti Nzapa (Apocalypse 11:15). Royaume ni so ayeke mbeni tâ gouvernement so ayeke sara ande si sese aga Paradis (Daniel 2:44). Bible atene: “Azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”—Psaume 37:11, 29.

E aTémoin ti Jéhovah e mä na bê so andia ti Bible ayeke sara nzoni na azo même laso (Ésaïe 48:17, 18). A yeke ndali ni la si e yeke sara kue ti sara ye alingbi na andia ni so. Na tapande, teti so Bible atene na e ti kpe aye kue so apeut ti buba yâ ti li ti e nga na tere ti e, e yeke nyon manga wala mbangi pëpe (2 aCorinthien 7:1). E yeke kpe nga ti sara aye so Bible ake, aye tongana gango ngbâa ti sämba, sarango lango-sioni nga na nzi.—1 aCorinthien 6:9-11.