Ti gue da na da aga na aye ti nzoni na zo

¹ “Mo gue, mo hon na yâ kodoro, mo hon na yâ Jérusalem, na mo zia marque na ndo lê ti azo so abima, ala so atoto teti ye kue ti sioni mingi so azo asala na yâ ni.” So ayeke lani lege so koli so ayeke na nza ti écrivain asala na kusala ti lo so alondo na Jéhovah na yâ tanga ti ngoi so angbâ na Jérusalem ti giriri.​—Ezéch. 9:2-11.

² Laso, na ndo sese, aTémoin ti Jéhovah ayeke sala mbeni mara ti kusala tongaso na lege ti mbeni kota kapa ti fango nzo tënë da na da na azo, na gingo ala so aye ti manda tâ tënë nga na gbotongo mê ti azo so aye ti mä ni pëpe. Mo yeda na kusala ti songo fini so? Mo yeke mû mbage ti mo dä kue tongana ti so dutingo ti mo amû lege na mo ti sala?

³ A yeke bâ futa ti angangu kue so e yeke sala na yâ kusala so na lege so azo saki mingi ayeke wara mungo maboko ngu oko oko ti manda tâ tënë. E mveni nga e wara gbâ ti aye ti nzoni na ngoi so lakue lakue nga na bê kue e mû mbage na kusala ti fango tënë da na da. Tongana nyen? Bâ aye so ge:

• A maï bê ti kiri singila ti e teti tâ tënë. Na mungo mbage mingi na fango tënë da na da, e yeke ga ti bâ “azo so abima, ala so atoto teti ye kue ti sioni mingi so azo asala.” E hinga na bê kue so aprophétie ti Bible ayeke ga tâ tënë, na e yeda so oko yorö ti akpale ti sese mobimba ayeke gi Royaume ti Jéhovah na lege ti Jésus Christ.

• A mû maboko na e ti lë lengo ti yingo na ti fa ni kue na gigi nzoni. A ndu biani lengo ti yingo kue tongana ndoye, tâ ngia, siriri, be-nze-pepe, nzobe, bê ti sala nzoye, be-biani, tâ be-ti-molenge na ngangu ti kanga nzara ti tele; aye so ayeke mû lege na e ti luti na gbele kpale ti fango tënë da na da na ti ngbâ ti sala ni.​—aGal. 5:22-24.

• A mû maboko na e ti hon ndo ti mbito ti zo. Mo dabe mo na salango ye ti mo na ngoi so mo sigigi ti kozoni da na da? Yeke yeke, e ga ti bâ so kota ye ni ayeke ti fa nzo tënë na ti gboto mê ti azo, na tongana e bâ popo ti aye ni, azo nga na akengo tënë ti ala aga biani ye senge na lê ti e. Tongana Jérémie, e hinga so Jéhovah ayeke mû maboko na e, na ye so asala si mabe ti e akpengba.​—Jér. 1:17-19.

• A sala si e duti na tâ be-ti-molenge. Fade fade, e bâ so a yeke pëpe na lege ti ngangu ti e wala kode ti e si e sala kua so. Nde na so, na ngoi kue so e duti na tâ be-ti-molenge na e “ke pëpe” nga e ‘e kiri na peko pëpe’, fade Jéhovah ayeke mû na e “yanga so ahinga ti sala tënë” na fade e hinga “lege ti sala tënë”.​—Es. 50:4-6.

• A kpengba ngangu so e yeke na ni ti fa nda ti tâ tënë. Ti sala kusala nzoni na épée so yanga ni ayeke use na aza mingi, Tënë ti Nzapa, e yeke na bezoin ti sala kua na ni fani mingi. Tongana e sala kua na Bible da na da, e yeke bâ so lo ‘yeke na fini, na lo yeke na ngangu ti sala ye’.​—aHéb. 4:12.

• A yeke mû ngangu na zo na lege ti yingo nga na lege ti mitele. Mungo mbage lakue na fango tënë da na da amû maboko na e ti ngbâ ti duti na donzi na lege ti yingo na amû na e nzoni yingo-ti-hinga, ye so akono ngia ti e. Ti azo mingi, atambela so na lege ti mitele asala nzoni na seni ti ala.

⁴ Na bango aye ti nzoni mingi so kusala ti fango tënë da na da aga na ni na azo so amä e nga na e mveni, biani e yeke na anda ti tënë kue ti ‘sala ni lakue,’ so ti tene ti mû mbage kue dä lakue lakue.​—1 Tim. 4:16.