A Lingbi ti Tene Nyen na Mbeni Hindou?
1 Tongana ti so mo hinga peut-être awe, a wara gbâ ti aHindou na yâ ti akodoro mingi. Tongaso, peut-être mbeni lâ mo yeke tingbi ande na mbeni Hindou na fango tene. A lingbi ti sala nyen na yâ mara ti ye tongaso?
2 Dabe mo na atene so ge: Amissionnaire so ayeke fa ka tene na aHindou atene so a hunda pepe ti manda ye mingi na ndo ti Hindouisme. Na fango tâ tene polele nga na ndara, fani mingi a yeke zingo nzala ti mä tene ni. Hunda kozoni ti sala tene na mokonzi ti sewa ni. Tongana lo yeda, a yeke duti ande ngangu pepe ti sala lisoro na tanga ti azo ti sewa ni. Na tongo nda ni, kpe ti fa so mo ga na mbeni tene so ayeke kota ahon atene ti mabe ti zo ni wala so mo ye ti sala lisoro na ndo ti oko tâ Nzapa wala ti mbeti ti nzoni-kue so aninga ahon atanga ni kue. Teti so aHindou mingi abi bê ti ala so Bible ayeke mbeni buku so alondo na mbage ti do, mo lingbi ti hon ndo ti sioni bibe so na fango so lo mu mbage ti a-Colon pepe nga ti kota ti mbeni mara na ndo ti mbeni mara nde pepe.
3 Sala kusala na anzoni gbakuru: A sala abrochure use mbilimbili teti aHindou. A pete brochure Pourquoi adorer Dieu en amour et en vérité? na yanga ti Gujarati nga na Pendjabi. A pete brochure so kota li ti tene ni ayeke Nos problèmes — Qui nous aidera à les résoudre? na ambeni yanga ti kodoro 11 ti a-Indien. A lingbi ti wara abrochure use so na Français. Abrochure “Voici, je fais toutes choses nouvelles” na Nzapa abi be ti lo biani na ndo ti e? afa nga ngangu ti ala ti lê alengo na yâ fango tene na azo so amä na bê na atene ti aHindou. Brochure Ahunda na buku Hingango Ye ayeke nga agbakuru so asala kusala nzoni ti mu li ni na yâ ti amandango Bible.
4 Leke mbeni ndo so alingbi ti mä tele dä: A yeke ngangu pepe ti leke mbeni ndo so alingbi ti mä tele dä na aHindou. Ala mä na bê so e yeke na yâ ngoi so sioni asi na kota mbage ni awe, na so fade Nzapa ayeke lungula akpale ti sese so na lâ ti mbeni kota ye ti ngangu so fade mbeni ngoi ti tâ tene ayeke ga na pekoni. A yeke ye ti mungo ngia ti ba kamba so ayeke na popo ti atene ti mabe so nga na afango ye ti Bible na ndo tene ti lâ ti nda ni, ti kota ye ti vundu na ti fini sese so ayeke ga. Teti mingi ti aHindou aba fini tongana mbeni molongo ti akpale so yorö ni ayeke dä pepe, ala sala nzala ti atene so andu fini ti sewa, kengo ndia, nzoni dutingo nga na ye so ayeke si na peko ti kuâ. Ba afango ye use so mo lingbi ti tara ni.
5 Ye so alingbi ti gbu bê ti mbeni babâ ti sewa:
◼ “Mbi yeke sala vizite na azo so agi bê ti ala na ndo ti dutingo ti sewa na yâ ti akodoro mingi laso. Ti mo, a hunda nyen ti bungbi asewa beoko? [Zia zo ni akiri tene.] Ambeni zo ahinga ye so ambeti ti aHindou atene na ndo ti sewa, me ala wara lege lâ oko pepe ti haka ni na ye so Bible atene na ndo ni. Mbi ye ti diko na mo bibe so ayeke na aColossien 3:12-14.” Na peko ti so mo diko aversê ni awe, fa na zo ni chapitre 15 ti buku Hingango Ye na tene: “Mbi yeke duti ande na ngia ti mu ambeni kete ngoi ti diko chapitre so legeoko na mo.”
6 Bê ti mbeni pendere ayeke duti ande peut-être na ngia ti mä atene so:
◼ “Mo mä na bê biani na Nzapa. Ti mo, ye wa Nzapa abata teti e?” Zia zo ni akiri tene. Na pekoni, diko Genèse 1:28 na tene: “Mingi ti ambage ti sese ayeke na wungo ti azo so ahon ndo ni na ayeke nga na akpale mingi. Mo bi bê ti mo so Wasalango ye ayeke na nzala ti mu maboko na e ti kaï akpale ti e?” Na peko ti so e mä kiringo tene ni awe, e sala kusala na mbeni mbeti so alingbi na ni.
7 Anzoni lengo so a wara: Mbeni Hindou so ngu ti lo ayeke 22 asala lisoro na mbeni ita-wali so afa tene na yâ ti gala na lo hunda na ita-wali ni mbeni mandango Bible. Lo fa na lo so, a sala ngu miombe awe, lo mä la ni mbeni lisoro na popo ti mama ti lo na ita-wali ni. Atâ kiringo tene ti Bible na akpale ti azo asala ye mingi na ndo ti lo, me teti mama ti lo asala nzala ti tene ni pepe, lo ba so lo de pendere mingi ti bi bê na ndo ti tâ tene lo mveni. Tongana lo ga biazo awe, lo ye fadeso ti hinga ye mingi ahon. Pendere-koli so abuba ngoi ti lo senge senge pepe. Na yâ ti alango 23 senge, lo manda buku Hingango Ye na, nze osio na peko ti tingbingo tele ti lo na ita-wali ni na gala, lo hunda ti wara batême!
8 Mbeni ita-koli ato nda ti manda Bible na mbeni Hindou so lo tingbi lo na yâ ti mbeni train. Mariage ti lo ayeke na yâ ti kpale. Koli so aye ti nyon nga samba mingi. Lo yeda ti tene Témoin ni akiri aba lo na da ti lo ti gi nda ti awango ti Bible na ndo ti fini ti sewa. Afango ye ti anzoni salango ye ti Bible agbu bê ti lo, na lo yeda ti manda Bible. Lo to nda ti ga na abungbi legeoko na sewa ti lo kue. Na pekoni, ala sala tene ti tâ tene na akamarade nga na asewa ti ala. Fadeso, azo omene na popo ti azo so ayeda na tâ tene.
9 Ye so bê ti Nzapa aye ayeke ti tene “mara ti azo nde nde kue alingbi sö kuâ na awara tâ hingango ye ti tâ tene.” (1 Tim. 2:4, NW) Tene so andu nga akoli na wali so ayeke na yâ ti lege ti vorongo so ayeke ti aChrétien pepe, tongana Hindouisme. Tongana aHindou ayeke na yâ ti territoire ti mo, ngbanga ti nyen ti sala pepe vizite na ala na yâ ngoi kete na ti sala ye alingbi na ambeni wango ti article so?