Kobe ti Seigneur aye ti tene ye mingi teti mo?

KOBE ti Seigneur ayeke kota ye na angbâ lakue ti tene ye mingi teti mo? Ti hinga ni, zia e bâ kozoni ye so kota ngoi so aye ti tene teti Jésus Christ, lo mveni.

Jésus abungbi lani na abazengele ti lo 12 na yâ ti mbeni da-nduzu na Jérusalem ti sala matanga ti Pâque na lakui ti lango 14 ti Nisan ti ngu 33. Na peko ti so ala te kobe ti Pâque awe, Judas wakango zo azia da ni ti sigigi ti gue ti kä Jésus (Jean 13:21, 26-30). Jésus asala kozo matanga ti “Kobe ti Seigneur” na tanga ti abazengele 11 (1 aCorinthien 11:20). A sala nga tënë ni tongana Matanga ti Dango Bê, teti so Jésus atene ândö na adisciple ti lo: “I sala so ti dabe i na Mbi.” So ayeke gi oko matanga so a hunda na aChrétien ti dabe ti ala na ni lakue.​—1 aCorinthien 11:24.

Na ambeni ndo, azo aleke mbeni monument wala afa mbeni lango so ayeke nde ti dabe lakue na mbeni zo wala na mbeni ye so ayeke kota mingi. Na tapande so, Jésus asala lani matanga ti kobe ti dango bê, mbeni kobe so alingbi ti sala kusala tongana dango bê, ti mû maboko na adisciple ti lo ti dabe ti ala na akpengba ye so asi na kota lango ni so. Teti azo so ayeke ga ande, kobe ti dango bê so alingbi ti dabe ti ala na ndo kota nda ti ye so Jésus asala giriri na bï ni so, mbilimbili afä so lo sala kusala na ni. Afä wa Jésus asala lani kusala na ni, na ala ye ti tene nyen? Zia e bâ mbaï so Bible afa na ndo ye so a sala lani na bï ti ngu 33.

Afä ti aye so ayeke nzoni-kue

“Lo kamata mapa, na tongana Lo mû merci awe, Lo fâ yâ ni na Lo mû na ala, Lo tene, Mapa so ayeke [“fä ti”, NW] tele ti Mbi, so Mbi mû teti i; i sala so ti dabe i na Mbi.”​—Luc 22:19.

Tongana Jésus akamata mapa na lo tene, “so ayeke [“fä ti”, NW] tele ti Mbi”, lo ye ti fa so mapa so mama ni ayeke dä pëpe ayeke lani fä ti mitele ti lo so ayeke na sioni oko pëpe, so lo mû “teti fini ti sese so.” (Jean 6:51). Atâa so ambeni wasungo Bible atene “so ayeke [na Grec es·tinʹ] tele ti Mbi”, Greek-English Lexicon of the New Testament ti Thayer atene so tënë so aye mingi ti tene “ti duti fä, aye ti tene.” A ye ti fa so mbeni ye aduti fä ti mbeni ye nde.​—Matthieu 26:26.

A yeke nga tongaso teti kopo ti vin. Jésus atene: “Kopo so ayeke [“fä ti”, NW] fini mbele na yâ mênë ti Mbi, mênë so a sa teti i.”​—Luc 22:20.

Na yâ mbaï ti Matthieu, Jésus atene lani na ndo kopo ti vin: “Teti so ayeke [“fä ti”, NW] mênë ti Mbi, mênë ti mbele so asa na sese teti azo mingi teti pardon ti siokpari.” (Matthieu 26:28). Jésus asala kusala na vin so ayeke na yâ ti kopo tongana fä ti mênë ti lo mveni. Mênë ti lo so lo tuku ayeke lani gunda ti “fini mbele” teti adisciple so a sa yingo na ndo ti ala, so ayeke komande ande na lo tongana agbia na aprêtre na yayu.—Jérémie 31:31-33; Jean 14:2, 3; 2 aCorinthien 5:5; Apocalypse 1:5, 6; 5:9, 10; 20:4, 6.

Vin so ayeke na yâ kopo asala nga kusala tongana mbeni dango bê so mênë ti Jésus so lo tuku ayeke duti ande gunda ti ye so lo leke teti “pardon ti siokpari”, ye so ayeke zi lege na azo so ayeke te mapa na ayeke nyon vin ni ti wara fini na yayu tongana ahéritier na tele ti Christ. Biani, ala so a hiri ala ti gue na yayu, mbeni wungo so ayeke kete, a yeke gi ala oko si ayeke te mapa na ayeke nyon vin na ngoi ti Mémorial.​—Luc 12:32; aEphésien 1:13, 14; aHébreu 9:22; 1 Pierre 1:3, 4.

Ye oko, ye ni ayeke tongana nyen teti mingi ti ambeni disciple ti Jésus so ayeke pëpe na yâ fini mbele ni? Ala so ayeke “ambeni ngasangbaga” ti Seigneur so ayeke ku kungo, pëpe ti komande na Christ na yayu, me ti wara ngia teti lakue lakue na ndo sese so ayeke ga paradis (Jean 10:16; Luc 23:43; Apocalypse 21:3, 4). Tongana ‘aChrétien be-ta-zo mingi so asi singo’ so ‘ayeke sala kusala ti nzoni-kue na Nzapa lâ na bï’, bê ti ala anzere ti duti azo ti bê ti kiri singila na ngoi ti matanga ti Kobe ti Seigneur. Ala fa na lege ti atënë nga na asalango ye ti ala: “Salut ayeke ti Nzapa ti e so aduti na ndo trône, na ti Molenge Ti Ngasangbaga ni.”​—Apocalypse 7:9, 10, 14, 15.

Fani oke?

“I sala so ti dabe i na Mbi.”​—Luc 22:19.

A lingbi a sala Mémorial fani oke ti dabe na kui ti Christ? Jésus asala lani tënë mbilimbili na ndo ni pëpe. Ye oko, teti so lo sala matanga ti Kobe ti Seigneur na lango 14 ti Nisan, na lakui ti Pâque, so amolenge ti Israël ayeke sala ka ngu oko oko, a yeke polele so Jésus aye lani ti tene a sala Mémorial ni na lege so nga. Atâa so, ngu oko oko, amolenge ti Israël ayeke sala matanga ti zingo ala na gbe ti ngbâa ti Egypte, ngu oko oko aChrétien ayeke sala matanga ti zingo ala na gbe ti siokpari na kui.​—Exode 12:11, 17; aRomain 5:20, 21.

Tënë ti salango matanga fani oko na yâ ti ngu oko oko ti dabe na mbeni kota ye so asi ayeke biani nde pëpe na ngobo ti salango ye ti azo. Na tapande, bi bê na ndo lege so mbeni koli na wali so asala mariage awe ayeke sala matanga ti mariage ti ala wala lege so mbeni kodoro ayeke sala matanga ti mbeni kota ye so asi na yâ mbaï ti kodoro ni. Mingi ni, ayeke sala ka matanga ni fani oko na yâ ti ngu na ngoi ti matanga ti kota lango ni. Mbeni ye so agboto lê ayeke so, teti asiècle mingi na peko ti Christ, a hiri lani azo so atene ala yeke aChrétien a-Quartodéciman so ti tene “Azo ti lâ 14 ni” ngbanga ti so ala yeke sala lani matanga ti dango bê na kui ti Jésus fani oko na yâ ngu oko na lango 14 ti Nisan.

Kete matanga, me so ayeke na nene ni mingi

Bazengele Paul afa lani so ti sala matanga ti Kobe ti Seigneur alingbi ande ti mû lege na adisciple ti Jésus ti ‘fa tënë ti kui ti Seigneur.’ (1 aCorinthien 11:26). Tongaso, matanga ti dango bê so ayeke gboto ande lê na ndo kpengba kusala so Jésus, na lege ti kuâ ti lo, asala na yâ gango tâ tënë ti aye so Nzapa aleke ti sala.

Na ngbango be-ta-zo juska na kuâ, Jésus Christ afa mbilimbili Jéhovah Nzapa tongana Wasalango ye ti ndara na ti ndoye nga tongana Gbia ti mbilimbili. Nde na atënë ti Satan nga na salango ye ti Adam, Jésus afa na gigi so zo alingbi ti ngbâ be-ta-zo na Nzapa même na gbe ti akota kpale.​—Job 2:4, 5.

Kobe ti Seigneur ayeke mû nga maboko ti dabe, na lege ti bê ti kiri singila, na ndoye ti Jésus so agbanzi ye na tele. Atâa na yâ ti akota tara, Jésus angbâ lani ti mä mbilimbili yanga ti Babâ ti lo. Na lege so lo lingbi ti mû fini ti lo so ayeke mbilimbili-kue ti kanga ndo ti kota ngele ti siokpari ti Adam. Tongana ti so Jésus lo mveni afa, lo ga lani “ti mû fini ti Lo tongana wen teti azo mingi.” (Matthieu 20:28). Tongaso, a lingbi ti pardone siokpari ti ala kue so aduti na mabe na Jésus, na ti mû na ala fini ti lakue lakue so ague legeoko na ye so Jéhovah aleke ândö teti azo.—aRomain 5:6, 8, 12, 18, 19; 6:23; 1 Timothée 2:5, 6.a

Atënë so kue ayeke gboto nga lê na ndo nzoye ti Jéhovah so asi singo nga na nzobe ti lo so lo leke aye teti salut ti azo. Bible atene: “Ndoye ti Nzapa asi na e giriri na lege so: Nzapa ato Molenge ti Lo ngengele oko na sese so, si e lingbi wara fini na lege ti Lo. Na lege so e bâ ndoye: a yeke e so andoye Nzapa giriri pëpe, me a yeke Lo so andoye e, na Lo to Molenge ti Lo ti ga sacrifice-ti-futa teti siokpari ti e.”​—1 Jean 4:9, 10.

So tâ pendere matanga ti Dango Bê! A yeke polele na ahunda ye mingi pëpe ti tene a sala na matanga ni. Ni la, a lingbi ti sala ni na ndo sese kue, na yâ ti angoi nde nde. Ye oko, matanga ni ayeke na afä so alingbi na angbâ lakue ti duti tâ ye ti dango bê teti angu mingi.

Aye ti tene nyen teti mo?

Sandaga ti kui ti Seigneur ti e Jésus Christ ahunda ye mingi na lo nga na Babâ ti lo Jéhovah. Teti so lo yeke mbilimbili-kue, Jésus alingbi pëpe ti kui tongana e so e yeke kui ngbanga ti siokpari ti Adam (aRomain 5:12; aHébreu 7:26). Lo lingbi lani ti duti na fini ti lakue lakue. A lingbi pëpe ti mû fini ti lo, même na ngangu, gi tongana lo yeda ti tene a fâ lo. Lo tene: ‘Zo oko alungula fini ti Mbi na tïtî Mbi pëpe, me Mbi zia fini so na bê ti Mbi mveni.’​—Jean 10:18.

Ye oko, Jésus, na bê kue, amû lani fini ti lo so ayeke mbilimbili-kue tongana mbeni sandaga “si na lege ti kui Lo lingbi futi lo so ayeke na ngangu ti mû kui, so atene, zabolo; na Lo lingbi zi ala kue so ayeke angbâa ti mbito ti kui na lâ ti fini ti ala kue.” (aHébreu 2:14, 15). Ndoye ti Christ so agbanzi ye na tele asigigi polele na lege ti mara ti kuâ so lo mveni, lo yeda ti kui. Lo hinga lani biani tongana nyen lo lingbi ande ti bâ pasi na ti kui.​—Matthieu 17:22; 20:17-19.

Matanga ti Dango Bê ayeke dabe e nga na ndo kota fä ti ndoye so ade a sala ni lâ oko pëpe, so Jéhovah, Babâ ti e ti yayu afa na gigi. A yeke tâ ye ti vundu teti lo so “asi na be-ti-ndoye na be-nzoni” ti mä na ti bâ lani “totongo ngangu na ngule” ti Jésus na yâ yaka ti Gethsémané, ti bâ so a pika lo sioni, a zia lo na ndo keke ti pasi, na so lo gue ti kui yeke yeke (Jacques 5:11; aHébreu 5:7; Jean 3:16; 1 Jean 4:7, 8). Ti gbu gi li na ndo kuâ ti lo, même na ngoi ti e, asiècle mingi na pekoni, ayeke zia vundu na bê ti azo mingi.

Tara ti gbu li so Jéhovah Nzapa na Jésus Christ afuta mara ti kota ye ti ngele tongaso teti e awasiokpari! (aRomain 3:23). Lâ oko oko, e yeke luti na gbele dutingo ti e ti wasiokpari na dutingo mbilimbili-kue pëpe ti e so amû vundu mingi. Ye oko, na lege ti mabe na yâ sandaga ti kota ngele ti Jésus, e lingbi ti hunda pardon na Nzapa (1 Jean 2:1, 2). Ye so amû lege na e ti wara ngia na salango tënë ti bê ti e kue na Nzapa na ti duti na mbeni nzoni yingo-ti-hinga (aHébreu 4:14-16; 9:13, 14). Na ndo ni, e lingbi ti wara tâ beku ti duti na yâ mbeni paradis na ndo sese teti lakue lakue (Jean 17:3; Apocalypse. 21:3, 4). Aye so nga na ambeni deba nzoni mingi, ayeke aye ti peko ti kota kusala ti gbanzingo ye na tele ti Jésus.

E fa bê ti kiri singila teti Kobe ti Seigneur

Kite ayeke pëpe so Kobe ti Seigneur ayeke tâ mbeni pendere fango na gigi “kota grâce ti Nzapa”. Ye so Jéhovah Nzapa aleke teti sandaga ti kota ngele, so aga nzoni na lege ti ndoye ti Jésus so agbanzi ye na tele, ayeke biani “matabisi ti Lo so zo alingbi fa nda ni kue pëpe!” (2 aCorinthien 9:14, 15). Mara ti nzoye ti Nzapa tongaso, so lo sala ni na lege ti Jésus Christ, ayeke pusu mo pëpe ti duti na kota bê ti kiri singila so aninga?

E yeke na beku so a yeke duti tongaso. Ni la, e tisa mo na wâ ti bungbi na aTémoin ti Jéhovah ti sala matanga ti Dango Bê na kuâ ti Jésus. Na ngu so, a yeke sala ande matanga ti Dango Bê so na mercredi lango 16 ti avril na peko ti lindango ti lâ. Fade aTémoin ti Jéhovah ti vaka ti mo ayeke fa na mo mbilimbili ngbonga ni na ndo ti salango kota matanga ni.

[Kete tënë na gbe ni]

[Kete tënë/Afoto na lembeti 6]

“SO AYEKE TELE TI MBI” WALA “SO AYEKE FÄ TI TELE TI MBI”?

Tongana Jésus atene lani ‘Mbi yeke yanga da’ na, “Mbi yeke tâ Vigne”, zo oko pëpe alingbi ti pensé so lo yeke lani tâ mbeni yanga da wala tâ mbeni vigne (Jean 10:7; 15:1). Legeoko nga, tongana Jésus atene: “Kopo so ayeke fini mbele”, e lingbi ti tene pëpe so kopo ni mveni ayeke lani tâ fini mbele. Tongaso nga, tongana lo tene so mapa ni ‘ayeke lani’ tele ti lo, a yeke polele so mapa ni ayeke fä ti tele ti lo. Ni la, Bible ti Charles B. Williams atene: “So ayeke fä ti tele ti mbi.”​—Luc 22:19, 20.

[Foto na lembeti 5]

Mapa so mama ni ayeke dä pëpe na vin ni ayeke afä so alingbi, ti mitele ti Jésus so sioni oko ayeke dä pëpe nga ti mênë ti lo so lo tuku

[Foto na lembeti 7]

Matanga ti Dango Bê ayeke mbeni fä ti kota ndoye so Jéhovah Nzapa na Jésus Christ afa lani na gigi