Tongana Nyen ti Luti Ngangu na yâ Mabe?
1 Ngbele ye na ngoi so e yeke na yâ bungbi ti Jéhovah, aguengo na li ni ti e na lege ti yingo aga na e ngia mingi. Ye oko, a lingbi e ngbâ ti gue na li ni na lege ti yingo ti tene e ngbâ lakue ‘tongana keke so gere ni alï na sese, so amaï na akpengba na yâ mabe.’ (aCol. 2:6, 7) Mingi na popo ti e ague na li ni na lege ti yingo, me ambeni aglisa lege teti ala ‘luti ngangu pepe na yâ mabe.’ (1 aCor. 16:13) Tongana nyen ti bata tele ti e yongoro na ye ti sioni so?
2 Akusala ti yingo so a sala lakue: Zia e leke mbeni nzoni programme teti akusala ti yingo na yâ bungbi ti Jéhovah, teti a mu aye mingi so atia e na lege ti yingo. Atene ti kpengba zo so e wara na ngoi ti abungbi ti kongrégation nga na akota bungbi amaï konongo ti e na lutingo ti e nzoni na lege ti yingo, gi tongana biani e yeke lakue dä ti wara aye ti nzoni so aga na lege ni. (aHéb. 10:24, 25) Tongana e bata ngoi lakue ti diko Bible, Tour ti Ba Ndo na Réveillez-vous! nga abuku so agi nda ti “kobe so akpengba” so alondo na yâ ti Tene ti Nzapa, fade agunda ti e ti yingo ayeke lï ngangu mingi na sese. (aHéb. 5:14) E zia na gbele e aye ti yingo na e sala kua ngangu ti wara ni; fade adeba nzoni ni ayeke duti teti lakue lakue.—aPhil. 3:16.
3 Mungo maboko ti afon e abiazo: Zia e kono yâ ti bungbi ti asongo ti e na azo ti yingo so ayeke abiazo ti kongrégation. Zia e gi ti hinga a-ancien nzoni ahon, teti mbilimbili a yeke ala si alingbi ti kpengba e. (1 aThes. 2:11, 12) Zia e mä wango nde nde kue so ala lingbi ti mu na e. (aEph. 4:11-16) Aserviteur ti mungo maboko aye nga si afon ala akpengba na yâ mabe; ku pepe ti wara atene ti kpengba zo na mbage ti ala.
4 Mo ye ti wara mungo maboko na yâ ti kusala ti fango tene? Sala tene ni na a-ancien na hunda maboko. Peut-être mo lingbi ti wara mungo maboko na lege ti programme “Apionnier amu maboko na ambeni zo.” Mo wara batême ade ti ninga pepe? Mandango buku Notre ministère nga salango ye alingbi na awango ni ayeke pusu mo ti gue na li ni ti ga biazo na lege ti yingo. Mo yeke na amolenge? Tongana a yeke tongaso, kpengba lakue dutingo ti yingo ti ala.—aEph. 6:4.
5 Teti e ga tongana keke so gere ni alï na sese na e kpengba na yâ mabe, e ba so e yeke ndulu mingi na Jéhovah na e yekia songo ti wâ ti aita ti e ti koli na ti wali. A yeke tongaso si e lingbi ti luti na gbele abira so Satan ayeke sala, na ti kpengba beku ti e na yâ mbeni kekereke ti lakue lakue.—1 Pierre 5:9, 10.