Mbeni mungo maboko so a yeke ngangu pëpe ti wara ni
1. Nyen la alingbi ti sara si mbeni zo awoko na lege ti yingo?
1 Anna, mbeni ita-wali so koli ti lo ayeke Témoin pëpe na so asara mbeni kua ti nginza so amû ngoi ti lo mingi, abâ so a yeke kete ye pëpe ti ga lakue na bungbi, ti sigigi na fango tënë nga ti manda Tënë ti Nzapa. Atâa so lo ngbâ ti ndoye Jéhovah, lo zia ti fa tënë. Ye ti nzoni ni ayeke so, lo wara mungo maboko na lege ti yingo na mbage ti a-ancien so ayeke bi bê na zo.
2. Na lege wa aChrétien kue alingbi ti duti mbeni mungo maboko so a yeke ngangu pëpe ti wara ni?
2 Ti yeda ti tene aita amû maboko na e na lege ti yingo afa so e zia bê na ndo Jéhovah mveni. Na tapande ti Jésus so asara ye na nzobe, a-ancien ayeke gi alege kue ti wa nga ti mû maboko na azo so awara akpale na yâ ti kusala ti ala ti Chrétien (1 aThes. 5:14). Fani mingi, gi mbeni nzoni tënë so aluti na ndo ti mbeni versê so ayeke dë bê ti zo alingbi. Ti gi ti mû maboko na azo so awoko teti kete ngoi na lege ti yingo ayeke kungba ti aChrétien kue, me gi a-ancien pëpe (1 aThes. 1:1; 5:14). Kite ayeke dä pëpe so mingi ti e ahinga ngangu so mbeni nzoni “tënë so zo atene so alingbi na lege ni,” wala na tâ ngoi ni alingbi ti sara na ndo ti mbeni zo.—aProv. 25:11; Es. 35:3, 4.
3, 4. A hunda ti sara aye wa tongana e ye ti mû maboko na amba ti e? E lingbi ti sara ni tongana nyen?
3 Mû li ni: Ti bi bê na azo so ayeke na bezoin ti mungo maboko ahunda ti tene e la e mû li ni, e bâ mawa ti zo ni na e sara ye na bê kue. Tongana Jonathan aga ti hinga so David ayeke na yâ ye ti vundu, lo londo “na lo gue na David na yâ ti gbako so, na lo sara si David akpengba”. (1 Sam. 23:15, 16). Mû maboko na azo na nzobe. Atënë so afa tâ bingo bê na zo aga na aye ti nzoni mingi. Na ndo ni, Jésus afa polele so a hunda ti tene e zia pëpe ti sara ye na bê kue nga na bibe ti si na mbeni ye ti nzoni tongana e ye ti kiri na mbeni ita ti e na nzoni lege (Luc 15:4). Ti duti na tâ nzara ti mû maboko na mbeni ita ti e ayeke pusu e ti ngbâ lakue ti mû maboko na lo atâa e bâ ye ti pekoni hio pëpe.
4 So tâ ye ti gonda tongana e mû li ni ti tisa amba ti e, na tapande amba ti e ti Bungbi ti Mandango Buku, ti sigigi na e na fango tënë! Tongana e mû maboko na mbeni mba ti e wakua ti Jéhovah ti mû mbage na fango tënë, e lingbi peut-être ti mû ngoi ni so ti wa lo ti bi tere mingi na yâ kusala ti Nzapa. Apendere ngoi so e yeke mû ti sara kusala ti Jéhovah na tere ti mba ayeke tâ mbilimbili ye ti mungo wâ na ala so aye ti kiri ti wara nzoni bango ndo na lege ti yingo.
5. Na yâ ti ambeni ye, maboko wa a-ancien alingbi ti mû?
5 Ye so a leke na ndoye: Ti ala so a ninga kete ala sigigi na fango tënë pëpe wala ala ga pëpe na bungbi, ala yeke na bezoin ti mbeni mungo maboko so ayeke nde ti tene mabe ti ala akpengba. Ala yeke peut-être na bezoin ti tene a manda Bible na ala na yâ ti buku Voro oko tâ Nzapa, Ga ndulu na Jéhovah wala Bible afa nyen biani? Teti so zo ni awara batême awe, mingi ni a hunda pëpe ti tene zo ni amanda buku ni a ninga. A lingbi Komite ti Kusala ti kongregation aduti nduru ti bâ zo wa la ayeke na bezoin ti mara ti mungo maboko so.—Bâ “Akiringo Tene na Ahundango Tene ti I” na yâ Kusala ti Royaume ti mai 1999.
6. Tongana nyen si mbeni ita-wali akiri awara ngangu na lege ti yingo?
6 Anna, so a sara tënë ti lo fade, ayeda na ngia na bê na aye so a-ancien aleke ti tene mbeni ita-wali so akpengba na lege ti yingo amanda Bible na lo. Gi so ala sara étude ni fani osio a mû maboko na lo ti kiri ti ga nduru na Jéhovah. Lo kiri lani lo to nda ti ga na bungbi na lo fa nga nzara ti lo ti kiri ti sepela Jéhovah Nzapa na gbele azo kue. Ita-wali biazo so amû maboko na Anna nga na fango tënë na lege so lo gue na lo ti sara a-étude ti lo juska Anna abâ so lo lingbi ti fa tënë da na da. Mungo maboko na nzobe ayeke ye so lo yeke tâ na bezoin ni ti tene lo kiri lo fa tënë.
7. Aye ti nzoni wa aga tongana e kpengba amba ti e na lege ti yingo?
7 Ti kpengba ala so ayeke na bezoin ti mungo maboko ayeke ga na adeba nzoni na azo kue. Zo so a mû maboko na lo ayeke wara ngia ti ga nduru na Jéhovah na ti bi tere na yâ ti akusala ti bungbi ti Lo. A-ancien ayeke na ngia ti bâ mara ti zo tongaso ague na li ni na lege ti yingo (Luc 15:5, 6). Tongana azo kue abi bê na amba ti ala, azo ti yâ ti kongregation ni kue ayeke duti beoko na songo ti ala ayeke kpengba mingi (aCol. 3:12-14). E yeke tâ na anda ti tënë ti sara ye tongana ti Jéhovah, lo so ayeke mbeni mungo maboko so a yeke ngangu pëpe ti wara ni!—aEph. 5:1.