Mbeni Matabisi so Akete Molenge Alingbi ti Si dä

¹ Ababâ na mama mingi ayeke dabe ti ala na matabisi so ayeke la ni ti ala na ngoi so, tongana ala dë molenge so ayeke kono na yâ tâ tene, ala yeke mu mbage ti ala na akapa ti kangbingo apériodique. A zia na sese kusala so na yâ ti akongrégation na ngu 1949. Lango oko na yâ yenga oko oko, alingbi azo kue amu tele ti ala mbilimbili na kusala ti kangbingo Tour ti Ba Ndo na Réveillez-vous! na ndo lege, da na da, magasin na magasin, wala na lege kue so ayeke nde. Mbilimbili, apendere so ayeke awafango tene ayeke ku la ni na bê kue lango so teti a yeke mu lege na ala ti mu mbage na kusala so legeoko na akota zo ti kongrégation. A yeke la ni tongaso teti mo na ngoi so mo dë molenge?

² Sala si amolenge ti mo amu mbage ti ala dä: Akete molenge so ayeke ndulu pepe ti to nda ti mbeni lisoro na ndo Bible na mbeni yanga-da alingbi ti mu apériodique na azo. A hunda na ala gi ti manda mbeni lisoro so akpengba pepe na so amu andulu tene use wala ota. Peut- être, gi salango tene kete na ndo kozo lembeti ni ayeke lingbi awe. Azo mingi ayeke yeda na ngia ti wara apériodique so akete molenge ti e ayeke fa, na fani mingi, ala yeke sala nzoni tene na ndo bê ti mbilimbili nga na nzoni tambela ti ala. Na mungo maboko kete, a yeke mbeni kusala so amolenge alingbi ti sala ni nzoni mingi; na lege so, ala yeke ga na mungo maboko ti kota ngele na yâ kusala ti kangbingo tokua ti Royaume. Biani, tongana amolenge ti ala ayeke kono ande, ababâ na mama ayeke ye ti mu maboko na ala ti gue na li ni, na ti maï kode ti ala ti fango tene.

³ Manuel ato nda ti fa tene da na da na ngoi so lo yeke gi na ngu ota. Ababâ na mama ti lo amu maboko na lo ti manda na li mbeni ndulu tene ti fango ni. Na mungo mbage na wâ na kusala ti fango tene na tele ti babâ na mama ti lo, lo yeke kangbi ti apériodique, abrochure na atract mingi. Lo yeke fa nga tene na lege kue so azi. Mbeni lâ so ababâ na mama ti lo ague na lo na yâ mbeni parc ti tene lo sala ngia, lo gue lo mveni ti kangbi atract na azo so ayeke kâ. Na lege ti wâ ti lo na yâ kusala ti fango tene, Manuel, atä so lo ngbâ lakue pendere mingi laso, ayeke tâ lingu ti mungo wâ teti ababâ na mama ti lo nga teti kongrégation ni kue.​—aProv. 22:6.

⁴ Na ndo Calendrier des Témoins de Jéhovah 2000, a fa samedi tongana ‘lango ti apériodique.’ Ababâ na mama, e tisa i ti kiri ti fa nzala ti i teti kusala so, na ti mu maboko na amolenge ti i ti tara matabisi so lakue lakue tongana lege ayeke dä.