“E Fa Tene Awe Fani Mingi na yâ Territoire ti E!”
1 Mo bi bê ti mo mbeni lâ awe so a fa tene fani mingi na yâ territoire ti mo si azo so ayeke tongana angasangbaga ayeke dä mbeni pepe? Peut-être mo bi bê ti mo awe: ‘Mbi hinga tongana nyen azo ni ayeke kiri ande tene. Ngbanga ti nyen ti kiri ti ba azo so asala nzala ti tene ni pepe?’ A yeke tâ tene so a fa tene awe fani mingi na yâ aterritoire mingi. Ye oko, a lingbi a ba ni na nzoni lê, pepe na sioni lê. Ngbanga ti nyen? Ba anda ti ye osio so a mu na gbe ni ge.
2 A kiri tene na asambela ti e: Jésus atene: “Le-kobe ti yaka ayeke mingi biani, me azo ti kusala ayeke mingi pepe. Tongaso i sambela Mveni ti le-kobe ni si Lo to azo ti kusala ti fâ le-kobe ti Lo.” (Luc 10:2) Teti angu mingi e toto na Jéhovah ti mu maboko na e mingi ahon. Na ando mingi, e kiri e wara fadeso ambeni wakua na ndo ni, na e fa tene na yâ territoire ni mingi ahon. A lingbi ye so afa atene Jéhovah akiri tene na asambela ti e azia ngia na bê ti e pepe?
3 Ti ngbâ ti fa tene alë anzoni lengo: Même na yâ ti aterritoire so a fa tene dä fani mingi, azo ayeda na tokua ti Royaume na awara mbeni hingango ye na ndo ti tâ tene. Tongaso, a lingbi e ngbâ ti sala vizite na ala fani mingi na bibe ti wara azo mingi ti bê ti mbilimbili. (Es. 6:8-11) Legeoko tongana ti so adisciple ti Jésus ti kozo siècle asala giriri, ‘gue lakue’ na mbage ti azo so ayeke na yâ ti territoire so a mu na mo, na salango ngangu ti zingo nzala ti ala ti mä tene ti Royaume ti Nzapa.—Mat. 10:6, 7.
4 Na Portugal, teti yenga oko oko, akongregation mingi afa tene na yâ territoire ti ala kue, me ala ngbâ lakue ti wara azo so ayeke tongana angasangbaga. Mbilimbili mbeni ita-wali ayeke na mbeni nzoni bango ndo. Lo tene: “Lâ oko oko na ndapelele, kozoni ti gue na fango tene, mbi sambela Jéhovah ti mu maboko na mbi ti wara mbeni zo so ayeke sala nzala ti manda Bible.” Mbeni lâ lo leke ti manda Bible na azo so asala kusala na mbeni ndo ti lekengo kua-li. Ye oko, na pekoni, gi zo oko si aga teti mandango ye ni. Zo so atene: “Atanga ni asala nzala ti tene ni pepe, me mbi, mbi sala nzala ni.” Na yâ ti nze oko, lo mveni lo manda Bible na azo use. Ngoi kete na pekoni lo wara batême, na lo bi tele ti lo na yâ kusala ti pionnier!
5 A yeke sala kusala ni: A yeke fa nzo tene, tongana ti so Jésus asala tene ni giriri. (Mat. 24:14) Même na ando so azo “amä [e] pepe,” kusala ti e ti fango tene ayeke gboto mê ti ala. E ku ti tene ambeni zo ayeda pepe wala même ti tene ala ke tâ tene. Ye oko, a lingbi a gboto biani mê ti azo tongaso na ndo fango ngbanga ti Jéhovah so ayeke ga.—Ezéch. 2:4, 5; 3:7, 8, 19.
6 Ade e hunzi pepe: A yeke ti e pepe ti fa lawa a lingbi e kaï kusala ti fango tene. Jéhovah ahinga mbilimbili lawa si a yeke hunzi. Lo hinga wala ambeni zo na yâ territoire ti e ayeke dä so alingbi ti yeda biani na nzo tene. Laso, ambeni zo atene so tene ni anzere na ala pepe, me ambeni ngangu gbiango ye na yâ fini ti ala, tongana glisango mbeni kusala, kota kobela, kui ti mbeni zo so ala ndoye lo mingi, alingbi ti sala si ala dengi mê mingi ahon na ambeni ngoi nde. Ndali ti sioni bibe wala ngbanga ti so ala yeke na ngoi oko pepe ti mä e, biani azo mingi ade amä lâ oko pepe ye so e fa. Ti kiri ti sala afini vizite na ala na nzobe fani mingi alingbi ti sala si ala hinga na ala dengi mê na ni.
7 Azo so aga abiazo awe na yâ angu so ahon ade ti ninga pepe na so ayeke fadeso na sewa ti ala mveni ayeke ba fini na nene ni mingi na ayeke hunda atene so gi Tene ti Nzapa oko si alingbi ti kiri tene dä. Mbeni mama so ade pendere atisa aita-wali use na da ti lo na lo tene: “Na ngoi so mbi de kete molenge, mbi lingbi la ni ti gbu nda ni oko pepe ngbanga ti nyen mama ti mbi ayeke tomba aTémoin na lo tene na ala so tene ni anzere na lo pepe, na ngoi so ye kue so ala ye ti sala ayeke gi ti sala lisoro na ndo ti Bible. Na ngoi ni kâ mbi leke na bê ti mbi so tongana mbi ga biazo, mbi mu koli, na mbi wara sewa ti mbi mveni, mbi yeke hunda ande na aTémoin ti Jéhovah ti ga na ti fa nda ti Bible na mbi.” A yeke ye so lo sala, na a mu ngia mingi na aita-wali so lo tisa ala.
8 Mo lingbi ti lë lengo mingi ahon? A lingbi ti duti lakue pepe gi azo so e sala vizite na ala si asala si e ba e tene a yeke ngangu ti sala kusala na yâ ti territoire fani mingi. Ngoi na ngoi a lingbi ti duti gi e mveni. E yeke to nda ni na anzoni bibe pepe? Ye so alingbi ti sala ye na ndo bango ndo ti e nga peut-être na ndo lege so ayeke sala na tene nga na lê ti e. Duti na nzoni bango ndo nga fa na lege ti lê ti mo ngia so mo yeke na ni. Tara mbeni fini kode ti fango ye. Gbian yâ ti fango ye ti mo, na sala ngangu ti maï ni. Peut-être mo lingbi ti gbian akozo hundango tene ti mo wala ti sala kusala na mbeni versê nde na yâ lisoro ti mo. Hunda na ambeni ita-koli na aita-wali nde ti fa ye so ala ba ayeke lë lengo mingi na yâ ti territoire ni. Fa tene na awafango tene nga na apionnier nde nde, na ba ye so asala si kusala ti ala alë lengo mingi.
9 Jéhovah ayeda na ahiri deba nzoni na ndo ti kusala ti fango tene ti Royaume, nga mungo mbage ti e na ni afa na gigi ndoye so e yeke na ni na mbage ti lo nga na mbage ti azo so ayeke ndulu na e. (Mat. 22:37-39) Tongaso, zia e sala kusala ti e kue, pepe na salango si bê ti e anze ti sala kusala na yâ territoire fani mingi.