Akobe ni abe awe ti tene a ko ni
1. Kpengba kusala wa a yeke sara ni na ndembe so?
1 Lani na peko ti so lo fa tënë na mbeni wali ti Samarie, Jésus atene na adisciple ti lo: “Ala yô lê ti ala na nduzu na ala bâ ayaka ni, akobe ni abe awe ti tene a ko ni.” (Jean 4:35, 36). Kua ti kongo lê ti kobe ti yingo ato nda ni lani awe, na Jésus abâ kozoni awe so kua so ayeke mû ande ndo ti sese kue. Ngbene ye na yayu ka, ndo so lo yeke dä, Jésus angbâ lakue ti mû mbage ti lo mingi na kusala ti kongo lê ti kobe so (Mat. 28:19, 20). So kusala so ayeke gue ti hunzi hunzingo, aye wa afa so a yeke ngbâ ti sara ni mingi?
2. Guengo na li ni wa afa so a yeke sara kusala ti kongo lê ti kobe na ndo ti sese kue mingi?
2 A ko lê ti kobe na ndo ti sese kue: Na ngu ti kusala 2009, tongana a mû awafango tënë 100, awafango tënë 3 tongaso aga na ndo ti wungo ti awafango tënë na ndo ti sese kue. Tongana a mû awafango tënë 100 na yâ ti akodoro so a kanga lege na kusala ti fango tënë dä awafango tënë 14 aga na ndo ti wungo so. Wungo ti a-étude so aita ayeke sû nze na nze na yâ ti rapport ahon 7 619 000: wungo so ayeke kota ahon wungo ti awafango tënë kue na tongana a mû a-étude kue so aita asara kozo na ngu 2009, wungo so ahon ni na 500 000. Tongana kusala so ayeke mû ndo hio hio na yâ ti gbâ ti akodoro, a yeke na bezoin ti gbâ ti amissionnaire. Aterritoire so ayeke tene mbeni yanga ti kodoro nde dä ayeke ndo so aye ayeke maï mingi dä na lege ti yingo nga amû yâ ti akodoro mingi. A yeke polele so Jéhovah ayeke sara si kusala ti kongo lê ti kobe so ague na li ni hio na alango ti nda ni so (És. 60:22). Mo yeke na nzoni bango ndo na ndo ti “akobe” so ayeke na yâ ti territoire ti mo?
3. Ambeni ita alingbi ti tene nyen na bango kusala ti kongo lê ti kobe ni na yâ ti territoire ti ala?
3 Kongo lê ti kobe ni na ndo so mo yeke dä: Peut-être ambeni ita alingbi ti tene: “Aye ayeke maï nzoni pëpe na yâ ti territoire ti e.” A yeke tâ tënë so na bango ambeni territoire aye ayeke maï dä nzoni pëpe tongana ti ambeni wala aye amaï dä tongana ti kozo pëpe. Ambeni ita alingbi ti tene so mingi ti azo ayeda na tënë ni awe na yâ ti territoire ni na ye so ala yeke sara fadeso ayeke ti gi gi tanga ti azo so angbâ mingi pëpe so. A yeke biani tongaso?
4. Nzoni bango ndo wa a yeke nzoni e duti na ni na ndo ti fango tënë? na ngbanga ti nyen?
4 Ngbene ye so ato nda ni juska ti hunzi na ni, ngoi ti kongo lê ti kobe ayeke ngoi so kua ayeke dä mingi. Bâ na yâ ti tënë ti Jésus lo hunda ti sara ye hio, lo tene: “Akobe ti fango ni ayeke mingi, me azo ti kua ni ayeke mingi pëpe. Tongaso, ala hunda mingi na Wa ti kua ni ti tokua azo ti kua ti fâ akobe ti yaka ti lo.” (Mat. 9:37, 38). Jéhovah, so ayeke Wa ti kua ni, la ayeke sara si alê ti kobe ni ayeke maï na ngoi so lo ye nga na ndo so lo ye (Jean 6:44; 1 aCor. 3:6-8). Kua ti e ayeke nyen? Bible akiri tënë: “Na ndapre mo lu le-kobe ti mo, na lakui mo duti senge pëpe.” (Zo-ti. 11:4-6). Ni la, na ngoi so kua ti kongo lê ti kobe ni ayeke gue ti hunzi ayeke ngoi ti duti senge la pëpe!
5. Ngbanga ti nyen a yeke nzoni e ngbâ ti fa tënë na ngia na bê na yâ ti aterritoire so na bango ni mo bâ mo tene azo ayeke mä e dä pëpe?
5 Ngbâ ti ko alê ti kobe ni: Atâa so a sara territoire ti e fani mingi nga na bango ni mo bâ mo tene azo ayeda na tënë ni pëpe, a yeke senge pëpe si e ngbâ ti sara kusala so na ngia na bê na ti sara ni hio (2 Tim. 4:2). Akota gbiango ye so ayeke si na yâ ti dunia so asara si azo ayeke changé bango ndo ti ala na ndo ti aye na ala yeke gbu li ti ala mingi na ndo ti kekereke ti ala. Tongana amaseka ayeke kono, peut-être ala yeke na bezoin ti duti na siriri nga ti wara siriri ti bê. So e yeke ngbâ lakue ti sara kusala ni alingbi ti pika bê ti ambeni zo. Ni la, azo so amä e lani pëpe alingbi ande ti mä e. Même azo so ake na mbana ti mä tënë ti e, a yeke nzoni e fa tënë ni na ala.—Ezéch. 2:4, 5; 3:19.
6. Tongana territoire ti e ayeke mbeni tara ndali ti e, nyen la ayeke mû ande maboko na e ti ngbâ ti fa tënë na ngia na bê?
6 Tongana territoire ti e ayeke mbeni tara ndali ti e, nyen la ayeke mû ande maboko na e ti ngbâ ti fa tënë na ngia na bê? Peut-être na ndo ti fango tënë da na da e lingbi ti fa tënë na ambeni lege nde tongana na ando ti dengo buze. Wala e lingbi ti sara kusala na akode nde nde ti fango tënë si e wara ambeni fini kode ti fango tënë. E lingbi ti changé programme ti e ti fango tënë na e fa tënë na lakui wala na ambeni ngoi nde so peut-être azo mingi ayeke na yanga-da. Peut-être e lingbi ti manda mbeni fini yanga ti kodoro tongaso si e lingbi ti fa nzoni tënë na azo mingi. E lingbi nga ti kono yâ ti kusala ti e na sarango kua ti pionnier permanent. Wala e lingbi ti gue na mbeni ndo so azo ti sarango kua ti kongo lê ti kobe ni ayeke dä mingi pëpe. Tongana e yeke na nzoni bango ndo na ndo ti kua ti kongo lê ti kobe ni, e yeke sara ande ngangu ti mû mbage ti e mingi na yâ ti kpengba kusala so.
7. Juska lawa la a yeke nzoni e ngbâ ti sara kua ti bungbingo alê ti kobe so?
7 Azo ti fango yaka ayeke na ngoi mingi pëpe ti bungbi akobe ti yaka ti ala ndo oko, tongaso ala yeke wu tere ti ala pëpe wala ala yeke sara kua ni gi yeke yeke pëpe juska kua ni ahunzi na ni. Kua ti kongo lê ti kobe ti yingo ahunda ti duti na mara ti bibe so, so ayeke ti sara ye hio hio. Juska lawa la a yeke nzoni e ngbâ ti sara kua ti bungbingo alê ti kobe so? Juska “na lâ ni so aye ti ngoi so ayeke gue ti hunzi” nga juska na “nda ni.” (Mat. 24:14; 28:20). Na tapande ti Wakua ti Jéhovah so ahon atanga ni kue, e ye ti hunzi kusala so a mû na e so (Jean 4:34; 17:4). Zia e ngbâ ti fa tënë na ngia na bê nga ti duti na nzoni bango ndo juska na nda ni (Mat. 24:13). Kua ti kongo lê ti kobe ni ade ti hunzi pëpe!
[Kete tënë na lembeti 2]
Ngbene ye so ato nda ni juska ti hunzi na ni, ngoi ti kongo lê ti kobe ayeke ngoi so kua ayeke dä mingi