Akiringo Tene na Ahundango Tene ti I

◼ A yeke na lege ni ti tene azo so abungbi ti mä tene apika sako na ambage oko oko kue ti ekole ti kusala wala ti bungbi ti kusala?

Azo so abungbi ti mä tene so ayeke aTémoin ti Jéhovah ahinga biani ti yekia ye. So ala ye ti yekia ngangu so aita ti ala asala nga diskur so ala mu na ndo ti estrade ayeke mbeni nzoni ye. Na ngoi ti e, na ambeni mbage ti sese, aita afa bê ti kiri singila ti ala na lege ti pikango sako. Me a lingbi pikango sako ni aga gango, a londo na bê. Nga, fani mingi a yeke fango na gigi bê ti yekiango mbeni ye so a sala ka lakue pepe. Ni la, na ngoi ti akota bungbi ti e, so aba nga akota bungbi ti circonscription, tongana a leke aprogramme so ayeke nde teti aita, na aita ti e ti koli amu tele nga na ngangu ti ala kue na adiskur ti ala, e ba so ngoi na ngoi azo so abungbi ti mä tene apika sako pepe gi na nda ti diskur ni me nga na ngoi so lo ngbâ ti sala devoir ni.

Me a lingbi a sala tongaso na yâ aDa ti Royaume ti e? Biani, ndia alingbi ti duti dä pepe ti ke ni tongana bê ti azo ni so asi na singila apusu ala ti pika sako. Me mingi ni, e yeke pika sako ndali ti adiskur so pepe, teti so, na mbeni mbage, a lingbi ti ga hio mbeni ye so a sala gi tongaso na a glisa tâ nda ni.

Ye oko, mbeni ye ayeke dä so e kue na yâ aDa ti Royaume ti e e lingbi ti sala ti fa tâ bê ti kiri singila ti e teti angangu so mbeni wamungo diskur ni asala, na so ayeke ti dengi mê na ngoi ti diskur ni, ti bata lê ti e na ndo ti wamungo diskur ni nga ti fa na lege ti lê ti e so e yeke mä atene ti lo na e yeke wara ye ti nzoni dä. Nga, fani mingi e ba so lege ayeke dä ti sala lisoro na wamungo diskur ni na peko ti bungbi, na fango na lo so e yekia diskur ti lo.