Ti sala ye na nzobe afa so mo bi bê na azo
1 Mbeni ita-wali adabe ti lo na ndo kozo tingbingo ti lo na mbeni ita-wali Témoin. Kozoni, lo ye tënë ti aTémoin ti Jéhovah pëpe. Lo dabe ti lo, lo tene: “Mbi girisa ye so e sala tënë na ndo ni lani, me aye so angbâ na li ti mbi ayeke nzobe so lo fa na mbage ti mbi, ngia so lo yeke na ni ti wara mbi nga so lo yeke na tâ be-ti-molenge. Asalango ye ti lo agboto mbi na mbage ti lo.” Atënë so afa so a yeke kota ye ti tene e fa tâ bingo bê na azo so e yeke fa tënë na ala.—aPhil. 2:4.
2 Ndoye asala nzobe: Mbeni lege so e lingbi ti fa ndoye na azo ayeke ti sala nzobe na ala (1 aCor. 13:4). Mbeni zo ti nzobe ayeke gi ti sala aye so ayeke mû maboko na amba ti lo. Tâ tënë, tongana e yeke fa tënë na azo, e yeke sala nzobe na ala. Ye oko, tâ bingo bê na azo andu aye mingi ahon gi ti fa tënë na ala. A ndu nga dutingo ndulu ti sala kamarade, anzoni salango ye ti e, mango ala nzoni, tënë so e yeke tene nga lege so e yeke tene na ni, na même aye so ala yeke bâ na lê ti e. Aye so kue afa so e bi bê na ala biani.—Mat. 8:2, 3.
3 Tâ bingo bê na azo ayeke pusu e ti gi ti sala aye so ayeke mû maboko na ala. Mbeni ita-koli pionnier ayeke fa lani tënë da na da. Lo wara mbeni mbakoro so ayeke womua. Tongana womua ni ahinga so lo yeke Témoin ti Jéhovah, lo ke ti mä lo na lo tene so na ngoi so lo yeke pika yanga-da, ni luti fade na ndo ti mbeni ye ti zi ampoule. Ita-koli ni atene: “A yeke nzoni pëpe ti tene mo sala ye so gi mo oko.” Womua ni ayeda ti tene lo mû maboko na lo, na ita ni ague azi ampoule ni, lo zia mbeni na place ni na pekoni lo hon. Kete na pekoni, molenge ti womua ni ti koli aga ti bâ lo, na womua ni atene na lo ye so asi. Ye so ita ni asala apika bê ti molenge ti lo ni mingi na a sala si molenge ni agi peko ti ita ni ti kiri singila na lo. Ala sala mbeni nzoni lisoro, na molenge ni ayeda ti manda Bible.
4 Tongana e fa nzobe na azo, e fa na gigi ndoye so Jéhovah ayeke na ni na mbage ti ala na nga e yeke sala si tokua ti Royaume aga pendere na lê ti ala. Tongaso, zia lakue “e fa na gigi e yeke azo ti kusala ti Nzapa, na lege ti . . . nzobe”.—2 aCor. 6:4, 6.