Ngbâ ti fa tënë ti Nzapa na mbito pëpe
1 E aChrétien so e yeke awafango tënë, e hinga so a yeke azo kue pëpe si ayeke mä e (Mat. 10:14). Atâa so ambeni ake ti mä e, e yeke ngbâ lakue ti fa nzo tënë (aProv. 29:25). Ye wa ayeke mû maboko na e ti ngbâ ti fa tënë ti Nzapa na mbito pëpe?
2 Bazengele Paul abâ so tongana a haka ni na tanga ti aye kue, “a yeke nzoni ahon ti hinga Christ Jésus”. Tongaso, tongana lo fa tënë, lo fa so lo ‘hinga ye ni biani’ na bê ti lo kue (aPhil. 3:8; 1 aThes. 1:5). Atâa so ambeni zo abâ tënë so lo yeke fa tongana mbeni ye so ane pëpe na nga mbeni buba ye, lo hinga lani so “a yeke ngangu ti Nzapa ti sö azo kue so amä na bê”. (aRom. 1:16). Ni la, atâa a gi ti kanga lege na lo, lo ngbâ ti “fa tënë na mbito pëpe na yâ [ngangu ti] Seigneur”.—Kus. 14:1-7; 20:18-21, 24.
3 Gunda ti ngangu ti e: A yeke pëpe na ngangu ti Paul mveni si lo fa tënë lani na mbito pëpe. Paul asala tënë ti lo mveni nga na Silas tongana lo sû atënë so na mbeti: ‘Tongana e hu pono awe, na ala sala ye ti kamene na e na kodoro ti Philippes, e yeke na mbito pëpe na yâ Nzapa ti e ti fa Tene-nzoni ti Nzapa na i na yâ tiri mingi.’ (1 aThes. 2:2; Kus. 16:12, 37). Na ndo ni, tongana lo yeke na da ti kanga na Rome, Paul ahunda ti tene amba ti lo asambela ndali ti lo si lo lingbi ti ngbâ ti fa nzo tënë ‘na mbito pëpe, me na lege so alingbi.’ (aEph. 6:18-20). Teti so lo zia bê na ndo ngangu ti Jéhovah, me ti lo mveni pëpe, a mû lege na Paul ti ngbâ ti fa tënë na mbito pëpe.—2 aCor. 4:7; aPhil. 4:13.
4 Ti e laso nga a yeke legeoko tongaso. Mbeni ita-koli ayeke na mbito ti fa na amba ti lo ti place ti kua so lo yeke Témoin ti Jéhovah, nga ti fa tënë na ala. Lo sambela Jéhovah ti mû na lo ngangu, na pekoni lo to nda ti fa tënë. Lo fa tënë na mbeni mba ti lo ti place ti kua so kozoni ake ti mä lo. Me tongana lo sala tënë na ndo ti londongo ti akuâ, tënë ni anzere na zo ni na lo yeda ti manda Bible. Na peko ti ye so, ita ni ayeke gbu alege kue so azi na lo ti fa tënë. Ita so asala kua fadeso na mbeni ndo nde. Na place ti kua so, na yâ ti ngu 14, lo mû maboko na azo 34 ti wara batême. Legeoko nga, e hinga na bê ti e kue so fade Jéhovah ayeke mû ngangu na e ti ngbâ ‘ti fa tënë ti lo na mbito pëpe’.—Kus. 4:29.