Ti Mo, Mo Yeke Duti Ande Dä?
1 Mbeni Témoin so aninga na yâ tâ tene atene: “Tongana kozo lango ti assemblée ahon mo, biani! a yeke mingi awe!” Lo ye ti tene nyen? Kozo lango ni ayeke tongo nda ti mbeni kota matanga ti yingo, so bungbi ti Jéhovah aleke ndali ti e. (Es. 25:6) Na lege ti gango ti e na kozo lango ni, e fa so e yeke na mara ti bibe ti wasungo psaume so: “Mbi yeke na ngia tongana ala tene na mbi, Zia e gue na da ti L’Eternel.”—Ps. 122:1.
2 Na ngu so ahon, na ngoi ti ambeni kota bungbi ti district “Atene ti Prophétie ti Nzapa,” wungo ti azo so aga na vendredi ayeke na gbe ni mingi ahon ti azo so aga na samedi nga na dimanche. So ti tene aTémoin mingi amä pepe adiskur so afa akota bibe so andu tene ti prophétie. Pendere dutingo na aita ti ala ti koli na ti wali ahon nga ala.
3 E zia lege pepe na kusala ti e ti mu ngoi kue: Ambeni aga peut-être na vendredi pepe ngbanga ti so ala ye ti wara kpale na ndo ti kua ti ala pepe. Ye oko, aTémoin mingi aba so a-patron ti ala aye biani ti mu mbeni lango senge na ala me gi tongana a sala tene ni na ala alango mingi kozoni. Lekengo na bê ti mbeni ita-wali so ayeke pionnier ti gue na abungbi kue nga na a-assemblée kue agbu bê ti patron ti lo mingi; na ye so apusu lo ti ga na mbeni lango ti assemblée ni kue!
4 Tene pepe na bê ti mo so, atä tongana nyen, patron ti mo ayeke ke ande ti zi lege na mo, nga so ti gue pepe na mbeni lango oko ti kota bungbi ni agbian ye oko pepe. Na mango na bê dä biani, leke tele ti mo ti fa nda ni na lo na ndara, na lege ti Mbeti ti Nzapa, ngbanga ti nyen guengo ti mo na kota bungbi ni ayeke mbeni kota mbage ti vorongo ti mo. (aHéb. 10:24, 25) Na pekoni, zia bê ti mo kue na yâ azendo ti Jéhovah na duti na beku so a yeke mu ande na mo aye ti mitele so mo hunda tongana mo zia aye so atia mo na lege ti yingo na kozo ndo.—Mat. 6:33; aHéb. 13:5, 6.
5 A yeke kota ye mingi ti bi bê na ndo “aye so ayeke nzoni ahon.” (aPhil. 1:10, 11; Ps. 27:4) Ye so apusu e ti leke tele ti e kozoni ti wara aye ti nzoni mingi na lege ti kota ye so Jéhovah aleke. To nda ni fade fadeso na leke na bê ti mo ti tene mo nga, mo ga na ngoi ti alango ota ti kota bungbi ni.