E Fa Iri ti Jehovah na Ndo Sese Kue
1 Tongana Jésus amu kungba na adisciple ti lo ti duti atémoin ti lo “juska na nda ti sese kue,” lo mu na ala awe tapande ni. (Kus. 1:8) Atä ngoi wala ndo so lo tingbi azo dä, lo yeke sala tene na ala na ndo ye so Nzapa aleke ti sala teti azo. Legeoko na Jésus, bungbi ti ngba ti be-ta-zo asala kusala na aye nde nde mingi ti tene ‘sese ni kue ahinga hiri ti Jéhovah.’—Es. 12:4, 5.
2 Ye so a sala giriri awe: Na yâ ti angu so ahon, a su ambeni diskur na yâ ti ambeti-sango; a fa “Photo-Drame de la Création” na azo kutu mingi; a sala kusala na akutukutu so ayeke na a-haut-parleur; a sala nga kusala mingi na afonono so atambela na ni nga, asi na mbeni ngoi, a sala kusala na lege ti radio, so kue ti fa nzoni tene. Biani, a ba lakue na nene ni gango ndulu na azo, si a lingbi ti ba peko ti nzala ti tene so ala fa na gigi. Tongaso, fango tene da na da aduti mbeni lege so ayeke nzoni mingi ti fa iri ti Jéhovah na ndo kue.—Kus. 5:42.
3 Ye so ayeke sala laso: Teti alege so azo aduti na fini ague na li ni lakue, azo ayeke na ngoi mingi pepe, nga na akodoro mingi, a yeke ngangu ti wara azo na da ti ala. Mingi pepe ayeke ndulu ti mu ngoi ti diko na ti gbu li na ndo aye ti yingo. Tongaso a lingbi e gbian kusala ti e alingbi na ni. Atä so e ngbâ lakue ti sala vizite na azo da na da, a wa e ti gue na ndo so ala yeke dä na ti ‘leke bê ti e’ ti kiri tene ti beku ti e. (1 Pierre 3:15) So ti tene a lingbi e sala ngangu ti fa tene na afon e na place ti kua, akamarade ti e, azo so e tingbi ala na lege, na yâ ti a-parc wala na ndo so akutukutu aluti dä, na yâ ti ando ti dengo buze, wala na ambeni ndo so a lingbi ti wara azo dä. Na lege ti mungo maboko ti Jéhovah, fade angangu so e sala ayeke lë lengo. Mo yeke mu mbage ti mo ti wara azo na ndo so ala yeke dä?
4 Tongana a yeke ti fa iri ti Jéhovah na yâ territoire ti e, e ba tongana senge ye pepe lege kue so azi. Na ziango bê kue na ndo Jéhovah ti gboto azo ti mbilimbili na mbage ti lo, e sala kusala ti e kue; fade e yeke wara ngia mingi dä.—Jean 6:44.