Fa na awamandango Bible ti bâ na nene ni apendere sarango ye ti Jéhovah
1 Na yâ ti fango tënë ti e, e yeke sara ye mingi ahon gi ti fa na azo akozo gere ti tâ tënë ti Bible. E yeke mû maboko na ala ti bâ Jéhovah tongana tâ zo nga ti bâ na nene ni apendere sarango ye ti lo so mara ni ayeke use pëpe. Tongana azo ti nzoni bê amanda tâ tënë na ndo Nzapa, ye so ayeke sara ngangu mingi na ndo ti ala na ayeke pusu ala ti gbian fini ti ala “si [ala] tambela na lege so alingbi na Seigneur, ti mû ngia na Lo na yâ ye kue”.—aCol 1:9, 10; 3:9, 10.
2 Fini gbakuru ti mandango na ye: Gi na tongo nda ni, buku Bible afa agboto lê na ndo asarango ye ti Jéhovah. Tâ gi na kozo chapitre ni, e yeke wara akiringo tënë na ahundango tënë so: Nzapa ayeke bi bê ti lo nga na mo la? Nzapa ayeke tongana nyen? Zo alingbi biani ti ga nduru na Nzapa? Oko chapitre ni afa nga so Jéhovah ayeke nzoni-kue (par. 10), lo yeke mbilimbili nga lo yeke bâ mawa ti zo (par. 11), lo yeke na ndoye (par. 13), lo yeke na ngangu (par. 16), nga lo sara be-nzoni na grâce, lo yeke nduru ti pardone, ngonzo ti lo alondo fade pëpe nga lo yeke be-ta-zo (par. 19). Paragraphe 20 atene na nduru tënë: “Tongana mo ngbâ gi ti manda ye na ndo Jéhovah, lo yeke ga gi tâ zo na li ti mo, na mo lingbi ande gi ti ndoye lo na ti bâ tere ti mo nduru na lo.”
3 Tongana nyen si e lingbi ti sara kusala na buku Bible afa ti mû maboko na azo so ayeke manda Bible ti ga nduru na Jéhovah? Na peko ti so e na wamandango ye ni e bâ mbeni paragraphe so agboto lê na ndo mbeni oko ti asarango ye ti Jéhovah, e lingbi ti hunda lo: “Mbage so afa na mo nyen na ndo Jéhovah?” wala “Tongana nyen si mbage so afa so Jéhovah ayeke bi bê ti lo na mo?” Tongana ngoi na ngoi e yeke hunda mara ti atënë so na ngoi ti étude ni, e yeke fa na awamandango Bible ti gbu li na ndo ti ye so ala manda nga ti bâ na nene ni apendere sarango ye ti Jéhovah.
4 Sara kua na encadré ti dango bê: Na hunzingo ti chapitre oko oko, tisa wamandango ye ni ti sara tënë na akode ti lo mveni na ndo atënë oko oko ti yâ ti encadré “Ye so Bible afa.” Gboto lê ti lo na ndo aversê so a fa atënë ti yâ ni pëpe. Ti pusu wamandango ye ni ti fa na gigi ye so ayeke na yâ ti bê ti lo, mo lingbi peut-être ti hunda lo: “Mo tene ti mo nyen na ndo ye so Bible afa na ndo tënë so?” Na sarango tongaso, mo yeke gboto lê na ndo ti angbongboro tënë ti yâ ti chapitre ni. Na ndo ni, a yeke mû lege na mo ti hinga nzoni aye so wamandango Bible ni amä na bê biani na ni. Ye so ayeke mû maboko na wamandango ye ni ti to nda ti lë songo na Jéhovah.