Tongana nyen la Jéhovah ayeke bâ mbi?
1. Na lege wa Bible ayeke tongana mbeni tatara?
1 Fani oke la mo yeke bâ lê ti mo na tatara? Mingi ti e ayeke bâ lê na tatara lâ oko oko ngbanga ti so ayeke mû maboko na e ti leke tere ti e nzoni. Bible ayeke tongana mbeni tatara. Dikongo Bible ayeke mû maboko na e ti bâ zo ti e ti yâ ni, so Jéhovah ayeke bâ ni (1 Sam. 16:7; Jacq. 1:22-24). Mbeti ti Nzapa alingbi ti “hinga nda ti abibe ti bê ti zo nga na aye so bê ti zo ni aye ti sara.” (aHéb. 4:12). Tongana nyen la dikongo Bible lâ oko oko nga gbungo li na ndo ni alingbi ti mû maboko na e ti bâ ye wa la a lingbi e leke tongaso si e ga anzoni wafango tënë ahon ti kozo?—Ps. 1:1-3.
2. Tongana nyen la Bible alingbi ti mû maboko na e ti bâ sarango ye ti e wani?
2 Sara kua na Bible tongana mbeni tatara: Ambaï ti awakua be-ta-zo ti Jéhovah so ayeke na yâ ti Bible afa na e asarango ye wa la anzere na lo. Na tapande, David afa so lo yapu ti sara ye ndali ti iri ti Jéhovah (1 Sam. 17:45, 46). Sân mbeto Ésaïe ayeda na bê ti lo wani ti gue ti fa tënë na yâ ti mbeni territoire so ayeke ngangu (És. 6:8, 9). Kota ndoye so Jésus ayeke na ni na mbage ti Babâ ti lo ti yayu apusu lo ti bâ kusala ti fango tënë tongana oko ye so alingbi ti dë bê ti zo nga amû na zo ngia ahon ti bâ ni tongana mbeni nengo kungba (Jean 4:34). Akozo Chrétien ayapu lani mingi na kua ti fango tënë, ala zia bê ti ala kue gi na Jéhovah, na ala leke na bê ti ala ti kiri na peko ape (Kus. 5:41, 42; 2 aCor. 4:1; 2 Tim. 4:17). Gbungo li na ndo ti atapande tongaso alingbi ti mû maboko na e ti bâ aye so e zia na gbele e ti si dä na ti gi ti sara aye mingi na yâ ti kua ti Nzapa.
3. Ngbanga ti nyen a lingbi e pusu na peko ape aye so e doit ti changé ni?
3 Sara kue ti hon ndo ti awokongo ti mo: Biani, a yeke sara e nzoni ape tongana e bâ lê ti e na tatara na e girisa ti zi mbeni ye so ayeke nzoni ape. E lingbi ti hunda Jéhovah ti mû maboko na e ti bâ nzoni aye so e wani e zia na gbele e ti si dä nga ti mû maboko na e ti changé aye so a lingbi e changé ni (Ps. 139:23, 24; Luc 11:13). Ndali ti so ngoi so angbâ ayeke mingi ape nga fini ti azo ayeke na yâ ti kpale, a yeke nzoni e pusu na peko ape aye so e doit ti changé ni.—1 aCor. 7:29; 1 Tim. 4:16.
4. Nyen la ayeke si na mbeni zo so abâ tere ti lo na yâ ti Mbeti ti Nzapa nga lo sara ngangu ti sara ye alingbi na ye so lo manda?
4 A yeke ye so ayeke na bê ti zo la Jéhovah ayeke bâ ni na ayeke kota ahon ye so lê ti zo abâ (1 Pi. 3:3, 4). Nyen la ayeke si na mbeni zo so abâ tere ti lo na yâ ti Mbeti ti Nzapa nga lo sara ngangu ti sara ye alingbi na ye so lo manda? Lo “ga pëpe mbeni zo so amä tënë ni gi na mê na lo girisa ni, me mbeni zo so asara ye alingbi na tënë ni, fade lo yeke duti na ngia tongana lo sara ye alingbi na ni.” (Jacq. 1:25). Biani, e yeke wara ande ngia nga e yeke ga anzoni wafango tënë ndali ti so e yeke “za gloire ti Jéhovah tongana ti tatara”.—2 aCor. 3:18.