Tongana nyen la e lingbi ti ndu bê ti azo so e yeke fa ye na ala?

1. Afango ye ti Jésus asara lani nyen na ndo ti azo so ayeke mä lo?

¹ Afango ye ti Jésus andu lani bê ti azo so ayeke mä lo. Na mbeni ngoi, na peko ti so lo zi nda ti Mbeti ti Nzapa na adisciple ti lo, tënë ni ‘andu’ bê ti ala mingi (Luc 24:32). Ndali ti so mango yanga ti Nzapa ayeke mbeni ye so alondo na bê, tongana nyen la e lingbi ti ndu bê ti azo so e yeke manda ye na ala ti pusu ala ti changé aye na yâ ti fini ti ala?—aRom. 6:17.

2. Sarango ye na ndara nga na kode ayeke mû maboko na e tongana nyen ti ndu bê ti azo so e yeke fa ye na ala?

² Sara ye na ndara nga bâ yâ ti ye nzoni: Ti ambeni zo, tongana e fa gi na ala ye so ayeke nzoni nga ye so ayeke sioni alingbi ti sara ye oko na ndo ti ala ape. Nga, ti diko na ala gbâ ti aversê so afa so atënë so ala mä na bê na ni ayeke na lege ni ape alingbi même ti sara si ala kpe e. Ti pusu mbeni zo ti yeda na tënë ti e, a lingbi e gi ti hinga ndani so zo ni amä na bê na mbeni ye wala ndani so lo yeke sara ye tongaso. Na lege ti ndara hunda ambeni tënë so alingbi ti sara si lo sigigi na atënë ti bê ti lo (aProv. 20:5). Tongana e sara aye so awe la e lingbi ti soro mbeni tënë na yâ ti Bible so alingbi ti ndu bê ti lo. Ni la, a lingbi e fa so e bi bê ti e na zo ni nga e kanga bê (aProv. 25:15). Zia e hinga so maïngo ti azo na lege ti yingo ayeke nde nde. A yeke nzoni e zia ngoi ti tene yingo ti Jéhovah apusu zo ni ti gbu li nga ti sara ye.—Marc 4:26-29.

3. Tongana nyen la e lingbi ti mû maboko na azo so e yeke fa ye na ala ti duti na anzoni sarango ye?

³ Mû maboko na ala ti duti na anzoni sarango ye: Aversê ti Bible so asara tënë na ndo ti anzoni ye so Jéhovah asara nga na ndo ti ndoye so lo yeke na ni alingbi ti mû maboko na azo so e yeke fa ye na ala ti duti na anzoni sarango ye. E lingbi ti sara kua na aversê tongana Psaume 139:1-4 wala Luc 12:6, 7 ti fa tongana nyen la Jéhovah ayeke bi bê ti lo na e oko oko kue. Tongana azo akiri singila ndali ti kota nzobe ti Nzapa, a yeke sara si ala kiri ti ye Nzapa mingi nga ti voro lo na bê ti ala kue (aRom. 5:6-8; 1 Jean 4:19). Nga, tongana ala hinga so sarango ye ti ala ayeke zia vundu na bê ti Jéhovah, a yeke pusu ala ti sara ye so anzere na lo nga ti mû gonda na iri ti lo.—Ps. 78:40, 41; aProv. 23:15.

4. Na ngoi so e yeke fa ye na azo, tongana nyen la e lingbi ti fa so e ne liberté so azo ayeke na ni ti mû desizion?

⁴ Jéhovah ayeke gbu zo na ngangu ti bata acommandement ti lo ape. Me, lo yeke iri azo na mbage ti lo na lege so lo yeke fa na ala aye ti nzoni so ala yeke wara tongana ala sara ye alingbi na awango ti lo (És. 48:17, 18). E yeke mû tapande ti Jéhovah na ngoi so e yeke fa ye na azo na mbeni lege so ayeke mû maboko na ala ti tene ala wani amû desizion. Tongana zo ni wani la abâ so a lingbi lo changé ye na yâ ti fini ti lo, ye ti peko ni ayeke ninga (aRom. 12:2). A yeke sara si lo ga nduru mingi na Jéhovah so ayeke “tara” wala so ayeke gi ti bâ ye so ayeke na yâ ti bê ti azo.—aProv. 17:3.