Araison so e yeke na ni ti duti na espoir na ngu 2023: Bible atene nyen na ndö ni?

So ngu 2023 akomanse, e kue e espéré ti tene e na azo ti sewa ti e, e duti nzoni. Ngbanga ti nyen la e peut ti duti na nzoni bango ndo na ndö ti kekereke?

Bible amû beku na zo

Nzoni tënë so Bible afa ayeke so akpale ti e ayeke gï teti kete ngoi nga so aga nduru ti hunzi awe. Ti vrai ni, ‘a sû [Bible] ti tene a fa ye na e, si na lege ti. . . dengo bê so alondo na yâ ti Mbeti ti Nzapa e duti na beku.’—aRomain 15:4.

• Ti hinga ye mingi na ndö ti azendo ti Bible, diko article “Une espérance réelle pour des jours meilleurs.”

Beku so apeut ti aidé mo laso

Beku so Bible amû na e ayeke tongana ‘kale ti bateau ndali ti fini ti e.’ (aHébreu 6:19, kete tënë na gbe ni). Beku so apeut ti kpengba e. A peut ti aidé e ti gbu lê ni na yâ ti akpale ti e laso, ti duti na nzoni bango ndo nga ti duti na ngia teti lakue lakue. Na tapande:

• Bâ tongana nyen la beku so Bible amû a-aidé mbeni koli ti hon ndö ti sioni sarango ye. Bâ vidéo Gigi ti mbi anzere lani na mbi encore ape.

• Bâ tongana nyen la beku so Bible amû apeut ti aidé e tongana mbeni zo so e ye lo akui. Bâ vidéo Dë bê ti azo so sewa ti ala akui.

Kpengba beku ti mo

Mingi ti azo aye ti tene anzoni ye asi, me ala yeke sûr ape so aye so ala yeke ku ni kungo so ayeke si ande biani. Me azendo ti Bible ayeke ti lo nde. Ngbanga ti nyen? Ngbanga ti so azendo so Bible amû alondo na Jéhovah Nzapaa wani, “so alingbi ti tene mvene pëpe.” (Tite 1:2). Gï Jéhovah la ayeke na ngangu ti sara ye alingbi na azendo ti lo; lo peut ti “sara ye kue so lo ye ti sara.”—Psaume 135:5, 6.

E wa mo ti wara aye ti nzoni na lege ti beku so Bible amû so zo alingbi ti sara confiance na ni. Mo peut ti kpengba confiance so mo yeke na ni na beku so Bible amû na lege so mo ‘gi nda ti Mbeti ti Nzapa nzoni.’ (Kusala 17:11). Ti hinga ye mingi na ndö ni, manda Bible mo wani na lege ti cours biblique particulier. Komanse ngu 2023 na mbeni nzoni bango ndo na ndö ti gigi ti kekereke!