Ye azo

Kpale ni

A yeke ka gï hio tongaso la bibe ti kengo zo ayeke hon ape. A hunda ngoi nga na effort ti zi bibe so gï tongana ti so a hunda ngoi nga na effort ti tene kobela ahon na terê ti mbeni zo. Nyen la mo peut ti sara ti zi bibe ti kengo zo senge senge?

Mama-ndia ti Bible

Foto: 1. Mbeni koli so ayeke zo ti Asie azi porte na mbeni koli so ayeke zo vuko so agbu café na maboko ti lo. 2. Oko zo vuko so akangbi café ni na amba ti lo ti place ti kua, na wali ti kodro ti Inde so a fa fade foto ti lo kozo so ayeke na milieu ti azo ni.

“Ala yü ndoye, ndali ti so ndoye ayeke kamba so abungbi ye mbilimbili.”—ACOLOSSIEN 3:14.

Versê so aye ti tene nyen? Tongana zo asara nzoni na amba ti lo asara si ala yeke sara songo. Tongana e yeke sara ye na ndoye na mbage ti amba ti e mingi, e yeke zia lege ti kengo azo senge senge. Tongana e yeke gi ti ye azo mingi, a yeke aidé e ti zi asioni pensé so e yeke na ni na ndö ti ala.

Ye so mo peut ti sara

Foto: 1. Mbeni wali ti kodro ti Inde angbâ ti aidé mbeni mbakoro-wali so ayeke munzu ti yô kungba ti lo na temps so ala yeke monté escalier. 2. Mbakoro-wali ni so ayeke munzu so aga na ye ti tengo ni na voizin ti lo so ayeke zo ti Asie so a fa foto ti lo fade so.

Gbu li ti mo na ndö ti ambeni mbilimbili ye so mo peut ti sara ti fa so mo ye azo so peut-être mo yeke na sioni pensé na ndö ti ala. Mo bezoin ti sara akota ye ape. Tara ti sara ambeni ye so a fa na gbe ni ge so:

Grâce na akete kete ye so mo sara na ndoye, yeke yeke bibe ti kengo zo senge ayeke hon na bê ti mo

Mo peut ti londo ti zia place ti duti na zo ni, wala ti zi porte na lo.
Tara ti causé kete na ala, même si ala hinga yanga ti kodro ti mo nzoni ape.
Tongana ala sara mbeni ye so mo comprendre ape, kanga bê.
Tongana ala yeke fa aproblème ti ala na mo, gi ti comprendre ala.

Bâ mbeni vrai ye so asi: Nazaré (Guinée-Bissau)

“Kozo mbi yeke na sioni bango ndo na ndö ti awande. Mbi mä a tene mingi ti awande ayeke tene mvene na gouvernement ti wara nginza wala ti tene a aidé ala, nga ala yeke sara ye ti sioni mingi. Ye so asara lani si a yeke ngangu na mbi ti ye ala. Mbi pensé mbi tene kengo zo senge senge la ape, ngbanga ti so mingi ti azo abâ ala tongaso.

“Ambeni ngoi na pekoni, mbi ga ti bâ so ye so mbi sara so ayeke kengo zo senge senge la. Atënë ti ndara so ayeke na yâ ti Bible a-aidé lani mbi ti sara ye na ndoye mingi na mbage ti ala. Fadeso mbi yeke kpe ala kpengo encore ape. Me tongana mbi tingbi na ala mbi yeke bara ala nga mbi yeke causé na ala. Mbi yeke gi ti hinga ala nzoni. Fadeso, mbi yeke na nzoni pensé na ndö ti ala, nga a nzere na mbi ti duti na terê ti ala.”