Mo ke zo senge senge awe?

Azo apeut ti ke amba ti ala ndali ti kodro ti ala, couleur ti poro ti terê ti ala, mara ti ala, yanga ti kodro ti ala, bungbi ti Nzapa ti ala, wala ndali ti so ala yeke koli wala wali, wala ndali ti moyen ti ala. Ambeni ake azo ndali ti ngu ti ala, hingango ndo ti ala, mbage ti terê ti ala so abuba wala ndali ti forme ti ala. Me, ala hinga ape so ala yeke ke azo senge senge la.

Eskê mo kue mo yeke ke zo senge senge? Mingi ni e yeke pensé ka so gï amba ti e la ayeke ke azo senge senge, me e ape. Me ti tâ tënë ni, e kue na yâ ti ambeni ye, e yeke ke ka azo senge senge. David Williams so ayeke wafango mbeti na da senda-gi atene so tongana azo ayeke na sioni pensé na ndö ti groupe ti ambeni zo, na si ala tingbi na mbeni zo ti yâ ti groupe ni, sarango ye ti ala ayeke changé na mbage ti zo ni so sân ti tene ala hinga.

Bâ tënë so Jovica atene na ndö ti mbeni kete mara so ayeke na yâ ti kodro so lo vivre dä na Europe. Lo tene: “Ti mbi lani, mbeni nzoni zo ayeke na yâ ti mara ni so ape. Me mbi hinga ape so, so a yeke kengo zo senge senge la ndali ti so tënë ni so ayeke vrai.”

Agouvernement mingi alu andia ti kanga lege na azo ti ke amba ti ala senge senge, me kue gbä. Raison ni ayeke so, andia ni so ayeke ti kanga lege gï na aye so azo ayeke sara me na aye so azo ayeke pensé ape. Andâ ti vrai ni, kengo zo senge senge ayeke komanse na yâ ti bê ti zo. Eskê e peut ti zi bibe ti kengo zo senge senge na yâ ti bê ti e?