Ala yeke kuku na gbele yanda pëpe

MO DABE ti mo na amaseka-koli ota so? Ala yeke azo wa? Ala yeke amba ti Daniel so ake lani ti te kobe so ayeke sioni ndali ti ala. Azo ti Babylone airi ala Sadrac, Mésac na Abed-Nego. Bâ ala fadeso. Ala ke ti kuku na gbele kota yanda tongana azo kue. Ngbanga ti nyen? Zia e bâ nda ni.

Mo dabe ti mo na andia so Jéhovah azia na mbeti so a iri ni aKomandema Bale-oko? Kozo komandema ni atene: ‘Mo voro mbeni nzapa nde pëpe, gi mbi oko.’ Amaseka-koli ota so ayeke sara ye alingbi na komandema so, atâa so a yeke kete ye pëpe ti sara tongaso.

Nébucadnezzar, gbia ti Babylone, airi akota zo mingi ti ga ti voro yanda so lo leke. Lo tene na ala, lo tene: ‘Tongana ala mä toto ti trompette, ti harpe na ti ambeni ye ti mozoko nde nde, ala kuku na sese na ala sambela yanda ti lor so. Zo kue so akuku pëpe na lo sambela yanda ni pëpe, fade a yeke mû lo na lê ni lê ti bi lo na yâ ti four ti wâ so agbi ngangu.’

Tongana Nébucadnezzar amä so Sadrac, Mésac na Abed-Nego ake ti sambela yanda ni, ngonzo agbu lo ngangu. Lo tene a ga na ala na lo. Lo kiri lo hunda na ala ti sambela yanda ni. Me amaseka-koli so azia bê ti ala na Jéhovah, na ala tene na Nébucadnezzar: ‘Nzapa ti e so e voro lo alingbi ti sö e. Même tongana lo sö e pëpe, e yeke kuku na gbele yanda ti lor ti mo ni pëpe.’

Tongana Nébucadnezzar amä tënë so, ngonzo akiri agbu lo ahon ndo ni. Mbeni four ti wâ ayo na lo pëpe. Tongaso lo tene: ‘Ala kiri azia wâ dä ahon ti kozoni lege mbasambala!’ Na pekoni, lo hunda na ambeni ngangu turugu ti lo ti gbe amaseka-koli ota so na kamba na ti bi ala na yâ ti four ti wâ so. Wâ ti four ni agbi ngangu mingi si a fâ angangu turugu so. Me ti amaseka-koli ota so a bi ala na lê ti wâ so, ye wa asi na ala?

Gbia Nébucadnezzar abâ ndo na yâ ti four ni, na mbeto asara lo mingi. Lo hunda, lo tene: ‘E kanga fade akoli ota na e bi ala na yâ ti four ti wâ so pëpe?’

Awakua ti lo akiri tënë, ala tene: ‘En, e kanga ala ota fade.’

Gbia ni atene: ‘Me mbi bâ azo osio ayeke tambela na yâ ti wâ ni. Kamba oko ayeke na tere ti ala pëpe, na wâ ni agbi nga ala pëpe. Osio zo ni so akpa mbeni nzapa.’ Gbia ni ague nduru na yanga ti four ni na lo dekongo, lo tene: ‘Sadrac, Mésac na Abed-Nego, awakua ti Nzapa ti Nduzu Ahon Kue, ala sigigi!’

Tongana ala sigigi awe, azo ni kue abâ so wâ agbi ala oko pëpe. Tongaso, gbia ni atene: ‘Zia azo kue agonda Nzapa ti Sadrac, ti Mésac na ti Abed-Nego! Lo tokua ange ti lo ti bata ala na fini teti so ala yeke kuku pëpe na gbele mbeni yanda ti voro ni, me ala yeke voro gi Nzapa ti ala oko.’

Amaseka-koli so azia na e tâ mbeni nzoni tapande ti dutingo be-ta-zo na Jéhovah.