“A yeke ngbanga ti e ti mä Nzapa ahon ti mä azo”

‘Nzapa ti e alingbi zi e’

A LEKE lani mbeni kota yanda ti lor na benyama ti Dura so ayeke peut-être nduru na gbata ti Babylone. A yeke sara mbeni kota matanga ndali ti yanda ni; na ngoi ti matanga ti ziango yanda ni nde, a hunda na akota zo ti kodoro ni so aga ti kuku na gbele yanda ni tongana ala mä toto ti aye ti mozoko nde nde. Gbia Nebucadnetsar aye si matanga ni aduti mbeni ye so apika bê ti azo mingi. Tongaso, lo mû yanga ti tene zo kue so ake ti voro yanda ni, a bi lo na yâ ti four so amû wâ ngangu. Zo wa la akpa ti ke lani yanga so gbia amû?

Bê ti azo so aga adö ti bâ so awakua ti Jéhovah ota, Sadrac, Mésac na Abed-Nego, ake ti kuku na gbele yanda ni. Ala hinga so vorongo yanda ni ayeke fa so ala gue nde mingi na yanga so ala mû ti voro gi Jéhovah Nzapa oko (Deutéronome 5:8-10). Tongana a hunda na ala nda ni so ala ke na kuru go ti voro yanda ni, na mbeto pëpe ala tene na Nebucadnetsar: “Bâ, Nzapa ti e, Lo so e sara na Lo, Lo lingbi zi e na yâ four ti wâ so aza ngangu; na fade Lo zi e na tïtî mo, O gbia! Me tongana A zi e pëpe, a lingbi mo hinga, O gbia, fade e sambela nzapa ti mo pëpe, na e sambela yanda ti lor pëpe so mo yä na nduzu.”​—Daniel 3:17, 18.

Na ngoi so a bi aHébreu ota so na yâ four so wâ ni aza ngangu mingi, ala sö kuâ gi na lege ti mbeni miracle. A yeke Nzapa si atokua mbeni ange ti bata awakua be-ta-zo ti lo so. Me ala soro ti ala kozoni awe ti zia fini ti ala na lê ti kuâ ahon ti ke yanga ti Jéhovah.a Ye so aHébreu ota so asara ni ayeke nga mara ti ye so abazengele ti Jésus Christ asara ni angu mingi na pekoni. Na gbele kota da-ngbanga ti aJuif, ala tene: “A yeke ngbanga ti e ti mä Nzapa ahon ti mä azo.”​—Kusala 5:29.

Akpengba ye so e manda dä

Sadrac, Mésac na Abed-Nego ayeke apendere tapande ti mabe, ti mango yanga na ti dutingo be-ta-zo. A-Hébreu ota so aduti na mabe na Jéhovah. Yingo-ti-hinga ti ala so Mbeti ti Nzapa afa lege na ni ake na ala ti mû mbage na yâ ti ye kue so andu vorongo nzapa ti wataka wala tënë ti yengo kodoro. Legeoko tongana ala, aChrétien laso ayeke zia bê ti ala kue na tâ Nzapa. Ala yeke mû gi peko ti yingo-ti-hinga ti ala so Bible afa lege na ni nga ala ke ti mû mbage na yâ vorongo nzapa ti wataka wala amatanga so ague nde na andia nga na akpengba-ndia ti Nzapa.

A-Hébreu ota so ayeke be-ta-zo azia lani bê ti ala kue na Jéhovah na ala ke pëpe ti mä yanga ti lo ti tene ala wara yango-iri, kota ndo wala gloire so Kodoro-togbia ti Babylone aye ti mû na ala. Amaseka-koli so ayeke lani nduru ti bâ pasi na ti kui ahon ti buba songo ti ala na Nzapa. Legeoko tongana Moïse so aga kozo na ala, ala ngbâ ti ‘gbu ngangu legeoko tongana ala yeke bâ Lo so zo abâ Lo pëpe.’ (aHébreu 11:27). Atâa Jéhovah ayeke sö ala na yâ ti kuâ ni wala pëpe, azo ota so aleke lani na bê ti ala ti ngbâ be-ta-zo ahon ti changé yanga ti ala ti ngbâ na fini. Âmanke a yeke tapande ti ala si bazengele Paul ayeke sara tënë ni tongana lo sara tënë ti abe-ta-zo so ‘amingo ngangu ti wâ’. (aHébreu 11:34). Laso, awakua ti Jéhovah ayeke fa na gigi mara ti mabe nga na ti mango yanga tongaso na ngoi so ala wara atara so andu dutingo be-ta-zo ti ala.

Na ndo ye so asi lani na Sadrac, Mésac na Abed-Nego e manda nga so Nzapa ayeke futa azo so aduti be-ta-zo na lo. Wasungo psaume atene: ‘Azo ti Lo ti nzobe [wala abe-ta-zo ti lo], L’Eternel azia ala pëpe.’ (Psaume 37:28). Laso, e lingbi pëpe ti ku ti tene Jéhovah asara ye ti kpene ti zi e tongana ti so lo sara lani na aHébreu ota so. Ye oko, e lingbi ti duti na mabe so atâa ye ti ngangu wa asi na e, Babâ ti e so ayeke na yayu ayeke mû maboko na e. Nzapa alingbi peut-être ti zi kpale ni, ti kpengba e si e ngbâ ti gbu ngangu wala ti zingo e na kuâ tongana e kui be-ta-zo (Psaume 37:10, 11, 29; Jean 5:28, 29). Na ngoi kue so e wara tara so andu be-biani ti e nga e soro ti mä Nzapa ahon ti mä azo, mabe, mango yanga nga na dutingo be-ta-zo ayeke hon na ngangu.

[Kete tënë na gbe ni]

[Encadré/Foto na lembeti 9]

MO HINGA AYE SO?

• A-Hébreu ota so ayeke tomba lani ngu 30 na ngoi so ala wara tara so andu be-biani ti ala.

• Biani, a sara si four ni amû wâ mingi.​—Daniel 3:19.