Daniel na yâ ti dû ti abamara

YE NI akpa mo bâ mo tene Daniel ayeke na yâ ti kota kpale. Me abamara ni asara ye oko na lo pëpe. Mo hinga ngbanga ti nyen? Zo wa si azia Daniel na yâ ti dû ti abamara so? Zia e bâ.

Gbia ti Babylone fadeso ayeke Darius. Lo ye Daniel mingi ngbanga ti so Daniel ayeke nzoni zo na lo yeke na ndara mingi. Darius amû Daniel ti ga mbeni kota mokonzi na yâ ti royaume ti lo. Ye so asara si ambeni koli na yâ ti royaume ni asara kota bê na tere ti Daniel, na bâ ye so ala sara.

Ala gue atene na Darius: ‘E kue e mû desizion ti tene mo, O gbia, mo sigigi na mbeni ndia so agbanzi azo teti lango 30 ti sambela mbeni nzapa wala mbeni zo nde na mo. Tongana mbeni zo asara ni pëpe, a lingbi a bi lo na yâ ti dû ti abamara.’ Darius ahinga pëpe nda ni so akoli so aye ti tene a sigigi na ndia so. Me lo bâ ti lo so a yeke mbeni nzoni ye, na lo zia ndia ni na mbeti. Ndia ni so, zo alingbi ti changé ni pëpe.

Tongana Daniel amä tënë ti ndia so, lo gue na kodoro, lo sambela, tongana ti so lo yeke sara ka. Asioni koli so ahinga so Daniel ayeke zia ande pëpe ti sambela Jéhovah. Ala ye kuâ ti Daniel, na tere ti ala anzere ngbanga ti so ala bâ ti ala so aye ni ayeke gue ti ga nzoni tongana ti so ala leke ti sara.

Tongana gbia Darius ahinga awe nda ni so akoli so aye si a sigigi na ndia so, vundu asara lo mingi. Me lo lingbi ti changé ndia ni pëpe. Tongaso, a lingbi lo mû yanga ti tene a bi Daniel na yâ ti dû ti abamara. Me gbia ni atene na Daniel: ‘Zia si Nzapa ti mo, lo so mo yeke sara na lo, azi mo na yâ ni.’

Bê ti Darius agi lo mingi si lango akpe na lê ti lo kue na bï ni so. Tongana ndo ahan awe, lo kpe lo gue na dû ti abamara ni. Bâ lo na nduzu ge. Lo dekongo, lo tene: ‘Daniel, wakua ti Nzapa so ayeke na fini! Nzapa so mo voro lo so abata mo si abamara ate mo pëpe?’

Daniel akiri tënë, lo tene: ‘Nzapa atokua ange ti lo, na lo kanga yanga ti abamara si ala sara sioni na mbi pëpe.’

Tere ti gbia ni anzere ngangu. Lo hunda ti tene a sigigi na Daniel na yâ ti dû ni. Na pekoni, lo mû yanga ti tene a bi na yâ ti dû ti abamara ni asioni zo so aye ti fâ Daniel fade. Azo ni angbâ tâ gi na lê ti nduzu, abamara ni agbu ala na afâ yâ ti abio ti ala kue.

Na pekoni, gbia Darius atokua mbeti na azo kue so ayeke na yâ ti royaume ti lo, lo tene: ‘Mbi mû yanga ti tene azo kue akpe mbeto ti Nzapa ti Daniel. Lo sara akota miracle na lo zi Daniel na yanga ti abamara.’