Chapitre 27

Lo hiri Matthieu

KETE NA peko ti so lo sava wazin, Jésus alondo na Capernaüm na lo gue na yanga ti ngu ti Galilée. Ka azo mingi akiri aga na lo, na lo tonda ti fa ye na ala. Na hongo ni, lo baa Matthieu, so ahiri lo nga Lévi, lo duti na da ti lapo. Jésus amu na lo hiringo ndo so: “Ga na peko ti mbi.”

Pierre, André, Jacques na Jean ama afango tene ti Jésus kozoni na la ni so ahiri ala, na kite ayeke pepee so ti Matthieu ayeke tongaso nga. Lege-oko na ala nga, Matthieu ayeda fade fade na hiringo ndo so. Lo londo, lo zia kungba ti lo ti zo ti mu nginza ti lapo, na lo mu peko ti Jésus.

Na pekoni, wala ti sala matanga ti hiringo lo, Matthieu asala kota matanga na ya da ti lo. Na ndo ti Jésus na adisciple ti lo, angbele kamarade ti Matthieu aga nga. Ambeni Juif abaa ala tongana anzoni zo pepee, teti ala mu lapo teti amokonzi ti Rome so aJuif ake ala. Na ndoni, fani mingi ala sala ye na lege ni pepee, ala hunda na azo ti kodoro nginza ahon taa nginza ti lapo ni.

Tongana ala baa Jésus ayeke na matanga so na tele ti amara ti azo tongaso, aFarizien ahunda na adisciple ti lo: “Ngbanga ti nyen wafango ye ti ala ayeke te kobe na wamungo lapo na awasiokpari?” Jésus ama ala, lo kiri tene na aFarizien: “Azo so ayeke na nzoni tele si aye ti baa wanganga pepee, me a yeke gi azo so ayeke na kobela. Ala gue, ala gi nda ti tene so: ‘Mbi ye be-nzoni, me mbi ye sadaka pepee.’ Teti mbi ga ti hiri azo ti mbilimbili pepee, me awasiokpari.”

Matthieu ahiri biani awamungo lapo na da ti lo ti tene ala ma Jésus si ala sava na lege ti yingo. Jésus abungbi na ala ti mu maboko na ala ti sala nzoni songo na Nzapa. Jésus abaa ala tongana asenge zo pepee, tongana aFarizien so asi singo na mbilimbili ti ala mveni asala. Nde na so, mawa ti ala asala lo na lo sala ye na mbage ti ala tongana zo ti kaïngo kobela ti yingo.

Tongana Jésus asala be-nzoni na mbage ti awasiokpari a ye ti tene pepee so lo kanga le ti lo na ndo asiokpari ti ala, me lo baa mawa ti ala lege-oko tongana lo sala na azo so ayeke na kobela ti mitele. Da be ti mo, tongana tapande, na la ni so lo baa mawa ti zo ti buruma na lo yoro maboko ti lo na lo ndu lo, lo tene: “Mbi yeda. Zia mo ga nzoni.” Lege-oko na lo, e lingbi ti fa be-nzoni na lege ti mungo maboko na ala so ye ayeke na ala pepee, na kozoni kue na lege ti yingo! Matthieu 8:3; 9:9-13; Marc 2:13-17; Luc 5:27-32.

▪ Jésus abaa Matthieu na ndo wa?

▪ Kusala ti Matthieu ayeke so wa, na ngbanga ti nyen ambeni Juif abaa tongana sioni zo azo so asala ni?

▪ Tene wa si ala tene na Jésus, na lo kiri tene wa?

▪ Ngbanga ti nyen Jésus abungbi na awasiokpari?