Chapitre 85

A gi azo so aglisa

JÉSUS agi na wa mingi azo so ayeke na nzala ti sala na Nzapa na taa-be-ti-molenge. Tongaso, lo gue na mbage ti azo kue, même lo gue na mbage ti akota wasiokpari nga ti fa tene ti Royaume na ala. Na ngoi so, a yeke awasiokpari so ayeke ga ndulu na lo ti ma lo.

A-Farizien na amaître ti ndia abaa ye so asi, na ala kasa Jésus teti lo gue ti baa azo so aFarizien na amaître ti ndia so abaa ala senge senge na le ti ala. Ala tene: “Zo so akamata awasiokpari na lo te kobe na ala.” Ala lingbi ti sala ye tongaso la oko pepee! Biani, aFarizien na amaître ti ndia abaa tanga ti azo kue lege-oko tongana pupu-sese ti gbe gere ti ala. Na ala hiri ala na yanga ti hébreu ‛am ha’arets, “azo ti sese”, ti fa so ala ke ala mingi.

Nde na so, Jésus amu zo oko oko na nenee ni, lo fa nzobe na mbage ti ala, na lo baa mawa ti ala. Teti tene so, azo mingi mingi so ayeke na taa-be-ti-molenge, na popo ti ala ayeke azo so asala siokpari mingi, ayeke na kota nzala ti ma lo. Me ye nyen e lingbi ti tene teti demango tele ti aFarizien so be ti ala aso mingi teti ngangu so Jésus asala teti azo so ala diko ala tongana azo ti sioni?

Jésus akiri tene na demango tele ti ala na lege ti mbeni toli. Lo tonda ni na tene ti aFarizien, so adiko ala mveni mbilimbili na ala tene ala duti na ya yangbo ti Nzapa, so ayeke nde na azo ti kirikiri ‛am ha’arets so aglisa lege na ague yongoro na Nzapa. I ma tene ti lo:

“Zo nyen na popo ti i tongana lo yeke na angasangbaga ngbangbo oko, na mbeni oko aglisa na popo ti ala, fade lo zia ambeni ngasangbaga bale gumbaya na ndoni gumbaya na yando ni pepee? si lo gue ti zi mbeni oko so aglisa awe, juska lo wara lo. Na tongana lo wara ngasangbaga ni awe, lo zia lo na ndo go ti lo na ngia. Na tongana lo si na da ti lo, lo hiri andeko ti lo na azo so ayeke ndulu na lo ti bungbi, lo tene: ‘Ga e sala ngia, teti mbi wara ngasangbaga ti mbi so aglisa awe.’”

Jésus afa nda ti tene ti toli ti lo so tongaso: “Mbi tene na i, fade ngia tongaso ayeke na yayu teti wasiokpari oko so agbian be ti lo, même ngia so ahon ngia so ayeke na yayu teti azo ti mbilimbili bale gumbaya na ndoni gumbaya so a yeke ngbanga ti ala ti gbian be ti ala pepee.”

A-Farizien abi be ti ala so ala yeke mbilimbili, na ala tene ahunda ala ti gbian be ti ala pepee. Ngu use kozoni, tongana ambeni zo na popo ti ala asuku na Jésus teti so lo te kobe na azo ti kamata lapo na awasiokpari, lo tene na ala: “Mbi ga pepee ti hiri azo ti mbilimbili, me awasiokpari.” A-Farizien so ayeke na baba mingi teti mbilimbili ti ala, ala so abaa pepee so ala lingbi gbian be ti ala, amu ngia oko pepee na yayu. Me, awasiokpari alingbi mu ngia na yayu tongana ala gbian be ti ala biani.

Jésus amu mbeni toli ti fa polele so a-ange na yayu alingbi duti na ngia mingi na ngoi so mbeni wasiokpari so aglisa lege agbian be ti lo. Lo tene: “Wala wali nyen, so ayeke na nginza ti argent bale oko, tongana mbeni oko aglisa, lo sala wa na lampe, lo balé da, lo gi mingi pepee? juska lo wara. Na tongana lo wara nginza ni awe, lo hiri andeko ti lo na azo so ayeke ndulu na lo ti bungbi, lo tene: ‘Ga, e sala ngia, teti mbi wara nginza ti mbi so mbi glisa awe.’”

Jésus afa mbeni tene na ndo tene so lo tene: “Tongaso mbi tene na i, ngia ayeke na gbele a-ange ti Nzapa teti wasiokpari oko so agbian be ti lo.”

A yeke ye ti dongo be ti baa so a-ange amu na nenee ni kiringo ti mbeni wasiokpari so aglisa lege. Na mingi ahon tongana abaa so ‛am ha’arets so ayeke kozoni azo senge so azo ake ala alingbi wara lege ti ga membre ti Royaume ti Nzapa so ayeke na yayu. Tongaso, ala wara na yayu ndo so ayeke kota ahon ndo ti a-ange! Me, a-ange so asala manda wala ngonzo teti tene so pepee. Ala hinga so awasiokpari so awara na ala hon ndo ti aye ti ngangu so alingbi leke ala ti sala kusala na yayu lege-oko tongana agbia na aprêtre so abaa mawa ti azo na ala sala be-nzoni na azo. Luc 15:1-10; Matthieu 9:13; 1 aCorinthien 6:2, 3; Apocalypse 20:6.

▪ Ngbanga ti nyen Jésus ague ti baa akota wasiokpari? Na lege wa aFarizien adema tele ti ala teti ye so?

▪ A-Farizien abaa azo senge tongana nyen?

▪ Jésus asala tene ti atoli wa? Na ye nyen e lingbi ti manda na lege ti atoli so?

▪ Ngbanga ti nyen a yeke kota ye mingi teti a-ange ti duti na ngia?