Chapitre 64

Wango teti mungo pardon

PEUT-ÊTRE Jésus angba na ya ti mbeni da na Capernaüm lo na abazengele ti lo. Na ndo so, lo fa na ala lege ti leke tene na popo ti aita. Pierre ahunda na lo: “Seigneur, ita ti mbi alingbi sala ye ti sioni na mbi lege oke, si mbi mu pardon na lo?” Ngbanga ti so amokonzi ti vorongo nzapa ti aJuif atene a lingbi mu pardon lege ota, tongaso Pierre atene na be ti lo so a yeke nzoni mingi tongana lo hunda na Jésus: “Juska lege mbasambala?”

Ye oko, tene ti dikongo ye ti sioni so zo asala na mo ayeke sioni mingi. Jésus agboto me ti Pierre na tene so: “Mbi tene na mo pepee ti mu pardon na lo juska lege mbasambala, me juska lege bale mbasambala na mbasambala.” Lo fa na Pierre so lo lingbi ti diko pepee lege oke lo mu pardon na ita ti lo.

Na lege ti mbeni toli Jésus aye ti fa na adisciple ti lo so a lingbi ala mu pardon. Toli ni asala tene ti mbeni gbia so aye ti leke tene ti nginza na popo ti lo na awakua ti lo. Ala ga na lo mbeni wakua so kota kuda ti adenier 60,000,000 ayeke na li ti lo. Wakua ni ayeke na ye ti futa ni pepee. Gbia ni amu yanga ti ka lo, na wali ti lo, na amolenge ti lo, nga aye ti lo kue, si afuta kuda ni.

Tongana wakua ni ama tene so, lo ti na sese, lo gbu gere ti mveni ti lo na lo tene: “Be ti mo anzee na mbi pepee, na fade mbi futa kue na mo.”

Teti mawa agbu lo, mveni ti wakua so asala be-nzoni na lo kamême so gba ti kuda ayeke na li ti lo. Me gi kete ngoi na pekoni, Jésus atene, wakua ni asigigi lo wara mbeni ndeko ti lo so kuda ti lo nga ayeke na li ti lo gi denier ngbangbo oko senge. Koli so agbu go ti mba ti lo awe lo pete na lo tene: “Kiri na mbi nginza ti mbi kue.”

Me mba ti lo wakua ni ayeke na nginza ni pepee. Tongaso lo ti na sese na lo gbu gere ti wakua so kuda ti lo ayeke na li ti lo, lo tene: “Be ti mo anzee na mbi pepee, na fade mbi futa mo.” Me, nde na mveni ti lo, wakua so asala be-nzoni pepee, na lo bi mba ti lo na da ti kanga.

Tongana ambeni wakua abaa ye so asi, Jésus akiri atene, ala gue afa tene so na mveni ni. Ngonzo agbu lo, na lo hiri wakua ni ti ga. Lo tene na lo: “Mo ngbaa ti sioni, mbi lungula kuda ti mo kue tongana mo gbu gere ti mbi. Lege-oko tongana mbi sala be-nzoni na mo, a lingbi mo sala be-nzoni na mba ti mo pepee?” Ngonzo agbu mveni ti lo awe, tongaso lo bi lo na da ti kanga juska lo futa kuda ti lo kue.

Jésus akonda ti tene ti lo tongaso: “Fade Baba ti mbi na nduzu asala tongaso na i nga, tongana i oko oko kue i mu pardon na aita ti i na be ti i pepee.”

Biani so ayeke mbeni nzoni wango ti mu pardon! Tongana e da be ti e so Nzapa alungula kota kuda ti e so ayeke siokpari, ti haka na ye so, afaute ti aita ti e ayeke gi kete ye biani. Taa tene, Jéhovah Nzapa amu na e pardon lege mingi mingi. Na même lege mingi e hinga pepee so e sala sioni ti ke lo. Tongaso, e lingbi pepee ti mu pardon na akete sioni so aita ti e asala na e ngoi na ngoi? I glisa pepee tene so Jésus afa na Lisoro ti lo na ndo hoto ni, so fade “Nzapa amu pardon na akuda ti e lege-oko tongana e mu pardon na awakuda ti e nga”. Matthieu 18:21-35; 6:12; aColossien 3:13.

▪ Ye nyen apusu Pierre ti hunda lege oke lo lingbi ti mu pardon na ita ti lo, na nga ngbanga ti nyen lo tene na be ti lo so lo sala be-nzoni teti lo sala ni lege mbasambala?

▪ Kangbi wa ayeke na popo ti salango ye ti gbia na mbage ti wakua ti lo so agbu gere ti lo ti hunda lo ti sala be-nzoni na lo na ye so wakua ni asala na mbeni mba ti lo?

▪ E manda nyen na toli ti Jésus?