Chapitre 73

Zo ti Samarie so asala be-nzoni

JÉSUS ayeke peut-être ndulu na Béthanie, kodoro so ayo kilomètre ota na Jérusalem. Mbeni koli so ahinga Ndia ti Moïse mingi aga ti te lo na ahunda na lo: “Wafango ye, fade mbi sala nyen ti wara fini ti lakue lakue?”

Jésus ahinga awe so koli ni, maître ti ndia, lo hunda tene so gi ti manda ye senge pepee, me ti tara lo nga. Peut-être na be ti lo, lo ye si Jésus akiri mbeni tene so alingbi ti so be ti aJuif. Tongaso, Jésus apusu maître ti ndia ti fa tene ti be ti lo tongana lo hunda na lo: “Mbeti ti Nzapa atene nyen? Mo diko tene nyen da?”

Na lege ti ndara, maître ti ndia afa mbeni ndia ti Nzapa so ayeke na Deutéronome 6:5 na Lévitique 19:18, so atene: “‘A lingbi mo ndoyee Jéhovah, Nzapa ti mo, na be ti mo kue, na âme ti mo kue, na ngangu ti mo kue, na bibe ti mo kue’, na, ‘mo ndoyee zo so ayeke ndulu na mo lege-oko tongana mo ndoyee mo mveni.’”

Jésus atene na lo: “Mo kiri tene mbilimbili. Mo ngba ti sala tongaso, na fade mo yeke na fini.”

Me tene ni alingbi pepee na le ti zo ti ndia so, lo ye si Jésus akiri tene mbilimbili ahon so. Lo ye si Jésus ayeda so tene ti bibe ti lo ayeke nzoni, na nga, so lo sala ye na lege ni na azo so ayeke ndulu na lo. Teti tene so, lo hunda Jésus: “Zo so ayeke ndulu na mbi ayeke zo nyen?”

A-Juif atene so “zo so ayeke ndulu” na ala ayeke gi aita ti ala aJuif, lege-oko tongana tene so aga kozo nga na peko ti Lévitique 19:18 alingbi ti fa. Biani, même na pekoni bazengele Pierre atene: “I mveni i hinga Ndia amu lege pepee na zo so ayeke Juif ti sala be-oko na zo ti mbeni mara nde wala ti ga ndulu na lo.” Tongaso, na le ti maître ti ndia so wala nga ti adisciple ti Jésus, ala ma na be so ala sala ye mbilimbili tongana ala sala be-nzoni gi na amba ti ala aJuif, teti atanga ti azo so ayeke Juif pepee ayeke biani pepee zo so ayeke ndulu na ala.

Na lege wa si Jésus alingbi ti fa na ala nda ti tene so mbilimbili, na nga lo so be ti ala pepee? Lo fa na ala mbeni toli so peut-être asi biani. Jésus atene: “Mbeni zo [Juif] alondo na Jérusalem ti gue na Jéricho, na lo ti na ti ti awanzi, ala kamata bongo ti lo kue, ala pika lo, na ala gue, na lo ga ndulu ti kui.”

Jésus akiri atene: “Mbeni prêtre ahon na lege so, na tongana lo baa zo so, lo hon na mbeni mbage ti lege. Na mbeni zo ti mara ti Lévi aga nga, na tongana lo si na ndo ni so na lo baa lo, lo hon na mbeni mbage ti lege. Me, mbeni zo ti Samarie ayeke tambela na lege so, lo baa zo ni na lo sala be-nzoni na lo.”

Mingi na popo ti aprêtre nga azo ti mara ti Lévi so amu maboko na ala na kusala ti temple alango na Jéricho. Tongaso, a hunda na ala na kiringo ti ala na kodoro ti zu na mbeni lege so ayo mètre ngbangbo gumbaya, na nga ti tambela na lege so yongoro ni ayeke ndulu na kilomètre bale ota na so azo ti sioni ayeke da nga. Azo ayeke ku mbeni prêtre na zo ti Lévi ti mu maboko na mbeni mba ti ala Juif so ye ti ngangu asi na lo. Me ala sala ni pepee. A yeke gi mbeni zo ti Samarie si asala ye so. A-Juif ake na be oko azo ti Samarie, ni laa ala zonga Jésus fade ngangu mingi tongana ala di iri ti lo “zo ti Samarie”.

Na lege wa zo ti Samarie amu maboko na Juif so? Jésus atene: “Lo gue na tele ti lo, na lo kanga ale ti ka ti lo, na lo tuku mafuta na vin da. Lo zia lo na ndo ti lele ti lo, na lo gue na lo na ya mbeni hôtel, na lo bata lo ka. Na ndapelele, lo mu denier use [nginza so zo asala kua teti lango use ti wara ni], lo mu na mveni ti da ni, lo tene na lo: ‘Mo bata lo nzoni, na tongana mo futa nginza ahon so, fade mbi mu nginza ni na mo tongana mbi kiri.’ ”

Tongana toli ti lo ahunzi awe, Jésus ahunda na maître ti ndia: “Be ti mo atene zo nyen na popo ti ala ota so asala ye tongana zo so ayeke ndulu na zo ni so ati na maboko ti awanzi?”

Teti so kamela asala lo ti mu gunda na zo ti Samarie, maître ti ndia akiri tene tongaso: “A yeke gi lo so asala be-nzoni na lo.”

Na ndani Jésus atene na lo: “Mo gue, mo sala ye lege-oko tongaso nga.”

Tongana Jésus atene polele na maître ti ndia so azo kue so ayeke Juif pepee ayeke nga azo so ayeke ndulu na lo, ka koli ni alingbi ti yeda pepee, na nga azo so aduti ti ma tene ti ala ayeke yeda na tene ti maître ti ndia ni na ala ke tene ti Jésus. Me ye so alingbi ti si na fini ti azo kue afa na gigi polele so zo so aduti ndulu na e ayeke nga azo so ayeke ti mara wala kodoro ti e pepee. Biani, Jésus ahinga ti fa nda ti tene nzoni mingi! Luc 10:25-37; Kusala 10:28; Jean 4:9; 8:48.

▪ Mara ti hundango tene wa maître ti ndia ahunda na Jésus? Tene wa ayeke na be ti lo tongana lo hunda tene so?

▪ A-Juif atene zo so aduti ndulu na ala ayeke zo wa? Ye nyen afa so même adisciple ti Jésus abaa tene ni tongaso?

▪ Jésus asala nyen ti fa na ala nda ti tene ni mbilimbili si maître ti ndia alingbi ti ke ni pepee?