Chapitre 107

Toli ti matanga ti mariage

NA LEGE ti atoli use, Jésus afa na gigi nda ti awafango ndia na akota prêtre, na ala ye ti fa lo. Me Jésus angba lakue ti fa nda ti ala na gigi. Lo mu na ala mbeni fini toli, lo tene:

“Royaume ti yayu ayeke tongana mbeni gbia so aleke matanga ti mariage teti molenge ti lo. Lo to angbaa ti lo ti tene na ala so lo hiri ala na matanga ti mariage ti ga, me ala ye ti ga pepee.”

Jéhovah Nzapa ayeke Gbia so aleke matanga ti mariage teti Molenge ti lo, Jésus Christ. Na ndani, fade fini-wali ti adisciple 144 000 so asa yingo na ndo ala ayeke bungbi na Jésus na yayu. Azo so aduti na gbe ti Gbia ni ayeke aIsraélite, so tongana ala duti na ya mbele ti Ndia atondani na ngu 1513 kozoni na ngoi ti e, ala wara lege ti ga “royaume ti aprêtre”. A yeke na ngoi so si Nzapa ahiri azo ti Israël ti ga na matanga ti mariage.

Ye oko, kozo hiringo ndo ti hiri ala ti ga na matanga ti mariage atondani na ngu 29 ti ngoi ti e, tongana Jésus na adisciple ti lo (angbaa ti gbia) alondo ti sala kusala ti ala ti fa tene ti Royaume. Me, aIsraélite ti mitele so ama hiringo ndo ti angbaa so atondani na ngu 29 ti si na ngu 33 ti ngoi ti e ake ti ga. Nzapa akiri amu lege na mara so ahiri ni ti ga na matanga ti mariage so. Jésus afa nda ti tene ni tongaso:

“Lo kiri lo to ambeni ngbaa, lo tene: ‘I tene na ala so mbi hiri ala: “Baa! Mbi leke matanga ti mbi awe, ala fa abagara na anyama so ayeke na mafuta, na ala leke ye kue awe. I ga na matanga ti mariage.”’” A tonda ti hiri azo mbeni ti ga na matanga ti mariage, hiringo ndo ti fani use ni nga na ti ndani, na la ti Pentecôte ti ngu 33, na la ni so asa yingo ti nzoni-kue na ndo adisciple ti Jésus. Hiringo ndo so ague juska na ngu 36.

Ye oko, ambeni Juif mingi ake nga hiringo ndo so. Jésus atene: “Ala ma tene so tongana ye senge, ala gue na lege ti ala mveni. Mbeni zo ague na yaka ti lo, mbeni ague na mbeni ndo ti ka ye ti lo; na atanga ni agbu angbaa ti lo, ala sala ye ti kamela na ala, na ala fa ala.” “Ye oko”, Jésus akiri atene, “ngonzo agbu gbia so, na lo to aturugu ti lo, lo fa awafango zo so, na lo zo kodoro ti ala.” Ye asi tongaso na ngu 70 ti ngoi ti e, tongana aturugu ti Rome afuti Jérusalem na afa awafango zo so.

Na pekoni, Jésus afa nda ti ye so asi: “Tongaso [gbia ni] atene na angbaa ti lo: ‘Ala leke matanga ti mariage awe, me ala si mbi hiri ala kozoni, ala lingbi pepee. Tongaso, i gue na sangbi-lege, i hiri azo kue so i wara ala ti ga na matanga ti mariage so.’” Na angbaa asala tongaso, na “da ti matanga ti mariage asi na agene”.

A tonda ti bungbi azo so awara ala na kota lege so ayeke na gigi ti kodoro ti azo so ahiri ala ti ga na matanga ti mariage na ngu 36 ti ngoi ti e. Mokonzi ti aturugu ti Rome Corneille na sewa ti lo ayeke akozo zo na popo ti azo so ayeke Juif pepee so afa nganza pepee ti bungbi ala. Kusala ti bungbi azo so ayeke Juif pepee, ala kue so amu ndo ti akozo zo so ake hiringo ndo ni, ague juska na ngoi ti e laso.

Da ti matanga ti mariage asi na azo na ngoi ti e. Jésus afa ye so asi na pekoni, lo tene: “Tongana gbia aga na ya da ti baa agene so, lo baa mbeni zo ka so ayu bongo ti mariage pepee. Lo tene na lo: ‘Ndeko, teti nyen mo ga na ndo so tongana mo yu bongo ti mariage pepee?’ Na lo yeke na tene ti kiri pepee. Tongaso gbia atene na angbaa ti lo: ‘I kanga ti ti lo na gere ti lo, i bi lo na bingo ti gigi. Fade azo atoto na ngule, na ala te pembe ti ala ka.’”

Zo so ayu bongo ti mariage pepee ayeke fa ti achrétien ti wataka ti chrétienté. Nzapa ahinga ala la oko pepee tongana ataa Israélite ti yingo. Nzapa asa yingo ti lo ti nzoni-kue na ndo ala la oko pepee si ala lingbi ti ga ahéritier ti Royaume. Tongaso, a bi ala na bingo ti gigi na ndo so ala wara futingo da.

Jésus akonda ti toli ti lo tongaso: “Teti ahiri azo mingi, me akamata gi azo oko oko.” Biani, ahiri azo mingi na popo ti aIsraélite ti mitele ti ga membre ti fini-wali ti Christ, me akamata gi azo oko oko na popo ti ala. Azo mingi na popo ti agene 144 000 so awara matabisi ti gue na yayu ayeke azo so ayeke Juif pepee. Matthieu 22:1-14; Exode 19:1-6; Apocalypse 14:1-3.

▪ Ahiri azo wa kozoni ti ga na matanga ti mariage? Ala wara hiringo ndo so lawa?

▪ Lawa azo ama ti fani oko hiringo ndo ti ga na matanga ti mariage? Azo nyen ayeke angbaa so ato ala ti sala kusala so?

▪ Lawa ahiri azo ti fani use ni ti ga na matanga ti mariage? Na pekoni, ahiri azo wa?

▪ Koli so ayu bongo ti mariage pepee ayeke fa ti azo wa?

▪ Azo mingi so ahiri ala ayeke azo nyen? Azo wa nga ayeke azo oko oko so akamata ala?