Chapitre 96
Jésus na mokonzi ti mosoro so angba pendere
TONGANA Jésus angba ti tambela na ndo lege so ahon na ya kota kodoro ti Pérée ti gue na mbage ti Jérusalem, mbeni pendere koli aga gi na loro na lo kuku na gbe ti lo. Azo ahiri koli so mokonzi, so aye ti tene peut-être lo yeke na kota ndo na ya mbeni synagogue ti kodoro ni wala lo yeke membre ti Sanhédrin. Lo yeke nga na mosoro mingi. Lo hunda: “Nzoni wafango ye, a lingbi mbi sala nyen ti wara fini ti lakue lakue?”
“Teti nyen mo hiri mbi nzoni zo?” Jésus akiri tene na lo. “Gi oko ayeke nzoni, Nzapa.” Pendere koli so atene “nzoni” peut-être lege-oko tongana mbeni iri, me Jésus afa na lo so iri tongaso alingbi gi na Nzapa.
Jésus akiri atene na lo: “Me tongana mo ye ti si na fini, mo bata akomandema lakue.”
“Komandema nyen?” koli so ahunda na lo.
Jésus afa na lo ambeni komandema oku na popo ti Akomandema Bale Oko, lo tene na lo: “Mo fa zo pepee, mo sala lango sioni pepee, mo sala nzi pepee, mo sala tene ti témoin ti wataka pepee, mo yekia baba na mama ti mo.” Na lo fa mbeni komandema so ayeke kota mingi ahon, lo tene: “Mo ndoyee zo so ayeke ndulu na mo lege-oko tongana mo ndoyee mo mveni.”
Koli ni atene na lo na be ti lo kue: “Mbi bata aye so kue lakue so mbi de gi molenge, ye nyen angba?”
Tongana lo ma hundango tene ti pendere koli so agi be ti lo Jésus ayeke na ndoyee na mbage ti lo. Me tongana lo baa lege so pendere koli so andoyee mosoro mingi, lo tene na lo: “Mbeni ye oko angba: Mo gue, mo ka ye ti mo kue, mo mu nginza na azo ti mawa, na fade mo wara ande mosoro mingi na yayu; na pekoni, mo ga, mo mu peko ti mbi.”
Mawa asala Jésus tongana lo baa pendere koli ni alondo na lo gue na vundu na be ti lo. Mosoro ti lo akanga lege na lo ti hinga kota ngere ti taa mosoro. Jésus atoto: “A yeke ngangu na zo ti mosoro ti li na ya royaume ti Nzapa!”
Be ti adisciple ado na tene so. Me be ti ala ado mingi ahon tongana Jésus amu kpengba tene so: “Lingo ti zo ti mosoro na ya royaume ti Nzapa ayeke ngangu ahon lingo ti chameau na du ti sua.”
“Tongaso zo wa alingbi so kua?” adisciple aye ti hinga.
Jésus abaa ala na lo tene: “A yeke mbeni ye so ayeke ngangu mingi na azo, me na Nzapa pepee, teti Nzapa alingbi sala ye kue.”
Ti fa so lo na ambeni disciple asala ye nzoni ahon mokonzi ti mosoro so angba pendere, Pierre atene: “Baa! E zia ye kue si e mu peko ti mo.” Na lo hunda tene so: “Tongaso fade e wara nyen?”
“I so i tambela na peko ti mbi, na la ti kiri ti sala ye kue fini, Jésus amu zendo so, tongana Molenge ti zo aduti na trône ti gloire ti lo, fade i duti nga na trône bale oko na ndoni use ti fa ngbanga ti amara bale oko na ndoni use ti Israël.” Jésus afa so fade asala si aye ti sese akiri aga pendere lege-oko tongana aye so ayeke na yaka ti Eden kozoni giriri. Na la ni ka, fade Pierre na ambeni disciple awara futa ti ala: ala komande lege-oko na Christ na ndo Paradis so ayeke mu ande le sese kue. Biani, mara ti futa tongaso ayeke nzoni ahon sadaka kue so zo alingbi sala!
Me adisciple awara futa ti ala fade fadeso nga lege-oko tongana so Jésus afa tongana lo tene: “Azo kue so azia da, wala aita ti koli wala ti wali, wala baba, wala mama, wala amolenge, wala yaka, teti mbi nga teti nzo tene, na ngoi ti fadeso fade lo wara da, na aita ti koli na ti wali, na amama, na amolenge, na ayaka; fade lo wara ye so kue lege ngbangbo oko, me fade ye ti ngangu aga na lo nga. Na fade lo wara fini ti lakue lakue na ngoi so ayeke ga.”
Lege-oko tongana Jésus aze, na ndo kue so adisciple ti lo alingbi gue da, fade ala duti nzoni na afo ala achrétien mingi ahon lege so ala lingbi duti na sewa ti ala mveni. Peut-être pendere koli so ayeke mokonzi nga zo ti mosoro aglisa lege ti wara futa so nga ti wara fini ti lakue lakue na ya Royaume ti Nzapa so ayeke na yayu.
Jésus akiri atene nga: “Me azo mingi so ayeke laso azo ti li ni, fade ala ga azo ti ndani, na azo ti ndani aga azo ti li ni.” Lo ye ti tene nyen?
Lo ye ti tene so azo mingi na popo ti azo so ayeke na “li ni” ti wara amatabisi ti kusala na lege ti vorongo nzapa, lege-oko tongana pendere koli so ayeke mokonzi nga na mosoro mingi, alingbi pepee ti li na Royaume. Ala yeke ga “azo ti ndani”. Nde na ala, azo mingi, na popo ti ala adisciple ti Jésus so ayeke na be-ti-molenge, azo so aFarizien so asala baba mingi abaa ala tongana “azo ti ndani” — lege-oko tongana azo ti sese, wala ‛am ha’arets—, ayeke ga “azo ti li ni”. Tongana ala ga “azo ti li ni” aye ti tene fade ala wara matabisi ti komande lege-oko na Christ na ya Royaume. Marc 10:17-31; Matthieu 19:16-30; Luc 18:18-30.
▪ Pendere koli so ayeke na mosoro mingi ayeke mara ti mokonzi wa?
▪ Ngbanga ti nyen Jésus ake si azo ahiri lo nzoni zo?
▪ Na lege wa salango ye ti pendere koli so ayeke mokonzi afa so ti duti zo ti mosoro alingbi ga na ye ti sioni?
▪ Jésus aze ti mu futa wa na adisciple ti lo?
▪ Na lege ti nyen azo so ayeke na li ni aga azo so ayeke na ndani, na azo so ayeke na ndani aga azo so ayeke na li ni?