Mbeni zo ti mosoro amû sioni desizion
MASEKA so, so ayeke mbeni mokonzi nga mbeni kota zo ti mosoro, ayeke sara ye na lege ni, lo yeke bata ndia nga lo ye aye ti yingo mingi. Lo ga lo tï na gbe ti Jésus, lo tene: “Maître nzoni, a lingbi mbi sara nyen ti wara fini ti lakue lakue?”
Jésus akiri tënë lo tene so ti wara fini ti lakue lakue a yeke nzoni lo bata akomandema ti Nzapa. Tongana koli so ahunda Jésus ti fa na lo mbilimbili ye so a lingbi lo sara, Jésus atene: “A lingbi mo fâ zo pëpe, A lingbi mo sara lango-sioni pëpe, A lingbi mo sara nzi pëpe, A lingbi mo sara tënë ti témoin ti wataka pëpe, A lingbi mo yekia babâ na mama ti mo, na, A lingbi mo ndoye zo so ayeke nduru na mo legeoko tongana mo ndoye mo mveni.” So ayeke akota komandema ti Ndia so Nzapa amû na Moïse. Na pekoni koli ni atene: “Mbi bata tënë so kue lakue, ye nyen amanke mbi?”—Matthieu 19:16-20.
Jésus ‘andoye lo’ na lo tene na lo: “Mo manke gi ye oko, mo gue, mo kä ye so ayeke na mo, mo mû nginza ni na awanzinga, na fade mo yeke na mosoro na yayu. Na mo ga mo tambela na peko ti Mbi.”—Marc 10:17-21.
Gi hio tongaso, kota desizion atï na gbele mokonzi so ade maseka. Lo yeke sara ande nyen? Lo yeke yeda na bê ti lo kue ti dö ande mosoro ti lo ti zia na ti ga mbeni disciple ti Jésus, wala lo yeke hule gi na ndo ti aye so lo yeke na ni? Lo yeke gi ande ti wara mosoro na ndo ti sese, wala lo yeke gi ti wara mosoro na yayu? A yeke biani lani mbeni ngangu desizion ndali ti lo. A yeke polele so lo ye lani aye ti yingo ndali ti so lo yeke bata Ndia na lo hunda ambeni ye so a lingbi lo sara ti nzere na lê ti Nzapa. Desizion wa la lo mû lani? “Lo gue na vundu, teti lo yeke na mosoro mingi.”—Marc 10:22.
Desizion so mokonzi so ade maseka amû lani ayeke nzoni pëpe. Tongana lo ga lani mbeni disciple ti Jésus so ayeke be-ta-zo, lo lingbi fade ti wara ye so lo yeke gi, so ayeke fini ti lakue lakue. A fa na e pëpe ye so asi na maseka so. Ye oko, e hinga so angu bale-osio tongaso na pekoni, aturugu ti Rome afuti Jérusalem nga mbeni kota mbage ti Judée. A-Juif mingi agirisa mosoro ti ala nga na fini ti ala.
Nde na mokonzi so ade maseka, bazengele Pierre nga na ambeni disciple amû ti ala anzoni desizion. Ala “zia ye kue” na ala mû peko ti Jésus. Desizion so aga na ala nzoni ye biani! Jésus atene na ala so ala yeke wara ye fani mingi ahon ye so ala zia na peko ti ala. Na ndo ni, ala yeke wara ande fini ti lakue lakue. Desizion ti ala ayeke mbeni desizion so ala yeke wara vundu na pekoni pëpe.—Matthieu 19:27-29.