Chapitre 103

A li na ya temple mbeni

JÉSUS na adisciple ti lo ayeke kozoni na Jéricho si ala ga na Béthanie na ala sala fadeso bi ota na kodoro so awe. Ala mu lege ti gue na Jérusalem na ndapelele ti lundi, lango 10 ti Nisan. Nzala asala Jésus. Tongana lo baa mbeni keke ti fige so akugbe ni ale mingi, lo gue na tele ni ti baa wala le ni ayeke da.

Akugbe ti keke ti fige so ako hio! Fige ayeke tonda ti le na nze ti juin, me fadeso, e yeke na nda ti nze ti mars. Me teti so akugbe ti fige so ako hio, Jésus abi be ti lo so fige ni alingbi ti le nga. Me lo wara ye oko na ya keke ni pepee. Akugbe so asala si keke ti fige ni ahanda zo. Tongaso, Jésus ahiri tene sioni na ndo keke ti fige ni, lo tene: “Zo akiri ti te lengo ti mo mbeni pepee.” Ndade na ndapelele azo abaa nda ti ye so Jésus asala na ye so a ye ti tene.

Jésus na adisciple ti lo angba ti tambela, na ngoi kete na pekoni ala si na Jérusalem. Lo li na ya temple, so lo baa ni biri awe na peko ti midi. Laso, lo londo ti sala ye, lege-oko tongana so lo sala ngu ota kozoni awe, na la ni so lo ga ti sala matanga ti Pâque ti ngu 30 ti ngoi ti e. Jésus atomba azo so ayeke ka ye na azo so avo ye na ya temple na lo kinda atable ti azo ti sanzengo nginza na ndo ti duti ti azo so aka abungu. Lo zia zo oko ti yo ye ti hon na ni na ya temple pepee.

Lo zingo na azo so asanzé nginza na ala so aka nyama na ya temple, lo tene: “Mbeti ti Nzapa atene pepee: ‘Fade ala di iri ti da ti mbi da ti sambela teti amara kue’? Me i sala si da ni aga ndo ti hondengo tele ti azo ti nzi.” Azo so ayeke awanzi teti so ala hunda nginza mingi na azo so alingbi pepee ti ke ti vo anyama so aka ni ka ti mu na sadaka. Jésus abaa lege ti dengo buze ti azo so tongana mbeni mayele ti gbu ye na ngangu wala ti sala nzi.

Tongana akota prêtre, awafango ye na akota zo na popo ti azo ama tene ti ye so Jésus asala, ala kiri agi lege ti fa lo. Tongaso, ala fa na gigi polele so ala lingbi ti gbian lege ti ala mbeni pepee. Ye oko, ala hinga pepee tongana nyen ala lingbi ti fa Jésus, teti azo kue angba ti duti na tele ti lo ti ma tene ti lo.

Nde na aJuif ti mitele, aGentil aga ti sambela na la ti Pâque nga. Ala yeke azo so agbian ti ma na be na lege ti vorongo nzapa ti aJuif. Fadeso ambeni Grec so agbian ti ga Juif, asi na Philippe na ala hunda ti baa Jésus. Philippe ague na André, peut-être lo ye ti hunda tongana a yeke nzoni ti bungbi na ala. Jésus angba na ya temple, na ndo so aGrec alingbi ti baa lo.

Teti so lo hinga la ti lo angba gi kete, Jésus amu mbeni toli ti sala tene ti ye so ayeke si ande na lo: “Ngoi asi awe, si Molenge ti zo alingbi wara gloire. Biani, biani, mbi tene na i: tongana le ti blé ati na sese na akui pepee, le ni angba gi oko; me tongana le ni akui, ale mingi.”

Gi le ti blé oko ayeke ye ti ngere ngangu pepee. Me ye nyen alingbi ti si tongana alu ni na ya sese na “akui”, na tongaso a ngba le ti kobe mbeni pepee? Le ti blé so atonda ti ko, na ngoi ni, le ti blé so aga keke na a du ambeni le ti blé mingi. Lege-oko tongana so nga, Jésus lo oko ayeke zo ti mbilimbili kue. Me, tongana lo duti be-taa-zo na Nzapa juska na la ti kua ti lo, lo ga lege ti mu fini ti lakue lakue na azo so ayeke be-taa-zo, azo so ayeke na bibe ti ke tele ti ala lege-oko tongana lo. Ni laa, Jésus atene: “Zo so andoyee âme ti lo, fade lo futi ni, me zo so ake âme ti lo na sese so, fade lo bata ni teti fini ti lakue lakue.”

Jésus abi be ti lo gi na lo mveni pepee, teti na pekoni lo tene: “Tongana mbeni zo aye ti sala na mbi, a lingbi lo tambela na peko ti mbi, na ndo so mbi yeke, fade wakua ti mbi ayeke ka nga. Tongana mbeni zo asala na mbi, fade Baba ayaa iri ti lo.” So ayeke mbeni nzo matabisi teti azo so amu peko ti Jésus na asala na lo! Matabisi ni ayeke so fade Baba ayaa iri ti zo so ti duti na tele ti Christ na ya Royaume ni.

Tongana lo bi be ti lo na aye ti pono na kui ti ngangu so ayeke ku lo, Jésus atene: “Fadeso âme ti mbi agi mbi, fade mbi tene nyen? Baba, zi mbi na ngoi so.” Tongana lo lingbi ti kpe ye so aku lo! Nde na so, lo tene: “Me a yeke teti tene so si mbi si na ngoi so.” Jésus ayeda na ye kue so Baba ti lo aleke, même kui ti lo tongana sadaka. Matthieu 21:12, 13, 18, 19; Marc 11:12-18; Luc 19:45-48; Jean 12:20-27.

▪ Ataa so ngoi ti afige ade, ngbanga ti nyen Jésus aduti na beku ti wara le ti fige?

▪ Ngbanga ti nyen Jésus ahiri azo so aka ye na ya temple “awanzi”?

▪ Na lege wa Jésus ayeke tongana mbeni le ti blé so akui?

▪ Jésus abaa aye ti pono na kui so ayeke ku lo tongana nyen?