Chapitre 105

Lango so ayeke ngangu mingi atondani

TONGANA lo londo na Jérusalem na lundi na la kui, Jésus ague na kodoro ti Béthanie so ayeke na to ti hoto ti Oliviers. Jésus asi na nda ti lango use ti ndangba ti kusala ti lo na Jérusalem. Jésus ague peut-être ti lango mbeni na da ti kamarade ti lo Lazare. Na peko ti so lo londo na Jéricho ti gue na Béthanie na vendredi, a yeke bi osio ni so lo lango na kodoro so.

Laso ayeke mardi lango 11 ti Nisan. Jésus na adisciple ti lo alondo na ndapelele ti gue. Laso ayeke mbeni lango so ayeke ngangu mingi, a yeke lango so Jésus ayeke na kusala mingi ti sala. A yeke tanga ti lango so lo si na temple. A yeke ndangba lango ti kusala so lo yeke sala ni kozoni si ague na lo na ngbanga na afa lo.

Ti gue na Jérusalem, Jésus na adisciple ti lo akiri amu lege so ahon na hoto ti Oliviers. Na tele ti lege so ague na Béthanie, Pierre abaa keke ti fige so Jésus azonga ni biri na lo tene: “Wafango ye, baa! keke ti fige so mo zonga ahule awe.”

Me, ngbanga ti nyen Jésus afa keke so? Lo fa nda ti tene ni tongaso: “Biani mbi tene na i, tongana i yeke na mabe na i dekite pepee, fade i sala gi ye so mbi sala na keke ti fige so pepee, me même tongana i tene na hoto so [ti Oliviers so ala luti na ndoni]: ‘Londo, mo ti ka na ya ngu ti ingo’, fade a ga tongaso. Na ye kue so i hunda na mabe na lege ti sambela, fade i wara ye so.”

Tongana lo sala si keke ti fige so ahule, Jésus afa na adisciple ti lo so a lingbi ala ma na be na Nzapa. Tongana lo tene: “Ye kue so i hunda na lege ti sambela, a lingbi i ma na be so i wara ye ni awe, na fade ye ni aga ti i.” So ayeke mbeni kpengba tene so adisciple alingbi ti bata ni teti atara ti ngangu ayeke si na ala ande! Ye oko, e lingbi nga ti baa so mbeni kamba ayeke na popo ti keke so ahule na mabe.

Lege-oko tongana keke ti fige so, mara ti Israël asala ye so ahanda zo. Kamême so mara ni ate mbele na Nzapa, na asala ye ti bata andia ti Nzapa na le ti azo, a fa na gigi so a yeke na mabe pepee na a le lengo ti nzoni pepee. Teti so a yeke na mabe pepee, mara ti Israël ayeke ndulu ti ke Molenge ti Nzapa mveni! Ni laa, tongana Jésus asala si keke ti fige so ale pepee ahule, lo mu mbeni kota tapande so afa na gigi ye so ayeke si na mara so aduti be-taa-zo pepee na ale lengo nga pepee.

Ngoi kete na pekoni, Jésus na adisciple ti lo ali na Jérusalem. Lege-oko tongana ala sala lakue, ala li na temple, na ndo so Jésus atonda ti fa ye. Akota prêtre na a-ancien ti azo, ala so angba ti bi be ti ala na ye so lo sala biri na azo ti sanzengo nginza, ahunda na lo: “Na ngangu ti nyen si mo yeke sala ye so? Zo wa amu na mo lege ti sala ye so?”

Ti kiri tene na ala Jésus atene: “Mbi nga mbi ye ti hunda i na mbeni tene oko. Tongana i kiri pekoni na mbi, fade mbi tene na i na ngangu ti nyen si mbi yeke sala ye so: Batême ti Jean, alondo na ndo wa? Na yayu wala na azo?”

Aprêtre na a-ancien atonda ti sala tene na popo ti ala na ndo lege ti kiri tene na Jésus. “Tongana e tene: ‘Na yayu’, fade lo tene na e: ‘Tongaso, ngbanga ti nyen i ma na be na lo pepee?’ Me tongana e tene: ‘Na azo’, e yeke na mbito ti azo so ayeke mingi, teti azo ni kue atene Jean ayeke mbeni prophète.”

Amokonzi ahinga lege ti kiri tene pepee. Tongaso ala tene na Jésus: “E hinga pepee.”

Jésus atene na ala nga: “Mbi kue fade mbi tene na i pepee na lege ti nyen si mbi sala ye so.” Matthieu 21:19-27; Marc 11:19-33; Luc 20:1-8.

▪ Ye nyen ayeke nde na lege ti mardi, lango 11 ti Nisan?

▪ Jésus afa akpengba tene wa tongana lo sala si keke ti fige ahule?

▪ Jésus akiri tene tongana nyen na azo so ahunda lo na ngangu ti nyen lo sala ye so?