Chapitre 121
Na gbele Sanhédrin, na pekoni na gbele Pilate
BI AGA ndulu ti hunzi. Ti lege ota ni Pierre abele Jésus, na azo ti Sanhédrin ahunzi sioni tene ti ngbanga ti ala na ala kangbi nde nde. Me, na vendredi na ndapelele, tongana la asigigi awe, ala kiri abungbi, fadeso na ya da ti Sanhédrin. Ala sala tongaso ti fa so ngbanga so ala fa na bi ayeke na lege ni. Tongana ti so ala sala na bi ti kozoni, tongana aga na Jésus na gbele ala, ala tene: “Tongana mo yeke Christ, tene na e.”
Jésus akiri tene: “Tongana mbi tene na i, fade i ma na be pepee. Na tongana mbi hunda i, fade i kiri tene pepee.” Na mbito pepee, Jésus afa zo so lo yeke, lo tene: “Na peko ti ye so, Molenge ti zo aduti na koti ti ngangu ti Nzapa.”
“Tongaso mo yeke Molenge ti Nzapa?” ala kue aye ti hinga.
Jésus akiri tene: “I mveni atene mbi yeke lo.”
Ti azo so agi lege ti fa lo, kiringo tene so alingbi. Ti ala, lo zonga Nzapa awe. Ala hunda: “E ye mbeni tene ti témoin teti nyen? Teti e mveni, e ma tene ni na yanga ti lo.” Tongaso ala kanga Jésus, ala gue na lo, na ala zia lo na ti ti Ponce Pilate.
Judas, so aka Jésus, lo yeke baa ye kue so asi. Lo ke lege ti lo tongana lo baa ngbanga so ati na ndo Jésus. Lo kiri nginza ti argent bale ota so na akota prêtre na a-ancien, lo tene: “Mbi sala siokpari tongana mbi ka mene ti zo ti mbilimbili.”
Ala baa mawa ti lo pepee tongana ala kiri tene: “Tene ti e ayeke da? So ngbanga ti mo mveni!” Tongaso Judas abi nginza na sese na ya temple na lo gue lo kanga go ti lo na kamba. Ye oko, keke so Judas akanga kamba na ndoni afa, na tele ti lo ati na ndo atene na gbe ni na ya ti lo asuru.
Akota prêtre ahinga pepee ye so ala lingbi ti sala na nginza ti argent. Ala tene: “Ndia amu lege na zo ti zia nginza so na sanduku ti nginza ti temple pepee, teti a yeke ngere ti mene.” Tongana ala wa tele ti ala awe, ala vo sese ti wasongota na nginza so teti ndo ti lu awande. Teti tene so ala di iri ti sese so, “Sese ti Mene”.
A ngba na ndapelele tongana ala gue na Jésus na da ti zo ti komande. A-Juif so ague na tele ti lo aye pepee ti li na ya da ni, teti na le ti ala ti ga ndulu na aGentil tongaso asala si ala ga sioni. Ni laa, Pilate ague na gigi na gbele ala, lo tene: “I klame zo so ngbanga ti nyen?”
Ala kiri tene: “Tongana zo so ayeke zo ti sioni pepee, ka e zia lo na ti ti mo pepee.”
Pilate aye pepee ti wara tene na lo tene na ala: “I mveni i kamata lo, i fa ngbanga ti lo na lege ti ndia ti i.”
A-Juif afa na gigi siobe ti ala, ala tene na lo: “Ndia amu lege na i ti fa zo pepee.” Biani, tongana ala fa Jésus na ngoi ti matanga ti Pâque, fade azo asala ye ti wusuwusu, teti mingi abaa Jésus na nenee ni. Ala ye si azo ti Rome afa lo ngbanga ti tene ti poroso, tongaso na le ti azo ala yeke na ngbanga na li ti ala pepee.
Tongaso amokonzi ti nzapa, so aye pepee ti fa na gigi ngbanga so ala fa na ndo Jésus kozoni atene lo zonga Nzapa, agi ti leke mbeni tene nde. Ala bi tene ota na li ti Jésus: “E wara zo so, [1] lo yeke fa lege ti kirikiri na mara ti e, [2] lo gbanzi azo ti futa lapo na César, na [3] lo tene, lo mveni lo yeke Christ, mbeni gbia.”
A yeke tene ti wataka so Jésus aye ti ga gbia si agbu be ti Pilate mingi. Lo li na da ti gbia mbeni, lo hiri Jésus na lo hunda lo: “Mo yeke gbia ti aJuif?” So ti tene, mo ke ndia na lege ti so mo tene mo yeke ga gbia na peko ti César?
Jésus aye ti hinga tene so Pilate ahinga na ndo lo, na lo hunda lo: “Mo sala tene so na be ti mo mveni, wala ambeni zo asala tene so na mo na iri ti mbi?”
Pilate aye ti fa so lo hinga ye oko na ndo lo pepee, me lo gi ti hinga taa tene. Lo tene: “Mbi yeke Juif? A yeke mara ti mo na akota prêtre so azia mo na ti ti mbi. Mo sala nyen?”
Jésus agi pepee ti kpe kiringo tene na ndo tene ti komandema ti lo. Na kiringo tene ti Jésus fadeso ado be ti Pilate. Luc 22:66–23:3; Matthieu 27:1-11; Marc 15:1; Jean 18:28-35; Kusala 1:16-20.
▪ Teti ye nyen Sanhédrin akiri abungbi na ndapelele?
▪ Judas akui tongana nyen, ye nyen asala na nginza ti argent bale ota?
▪ Ngbanga ti nyen aJuif mveni aye pepee ti fa Jésus me ala ye si azo ti Rome afa lo?
▪ A-Juif abi asioni tene wa na li ti Jésus?