Chapitre 124

Amu lo na ala na ala gue na lo

LEGE SO Jésus angba ti ne tele ti lo na ya ti pono mingi andu be ti Pilate, na lo kiri lo gi lege ti zi lo, ye oko, akota prêtre asala ngonzo mingi ahon. Ala bi be ti ala so ye oko ayeke kanga lege na ala pepee ti sala sioni ye so ala leke ti sala. Tongaso ala kiri adekongo ngangu: “Fa lo na keke ti pasi! Fa lo na keke ti pasi!”

Pilate atene na ala: “I mveni i kamata lo i fa lo na keke ti pasi.” (Nde na kozo tene ti ala, peut-être aJuif ayeke na ngangu ti fa azo ti sioni tongana ala sala mbeni kota ye so ake lege ti vorongo nzapa.) Na pekoni, ti fani oku ni, Pilate atene lo wara ye ti sioni na Jésus pepee, lo tene: “Teti mbi wara tene ti ngbanga na li ti lo pepee.”

A-Juif, tongana ala baa so tene ti poroso so ala diko na li ti Jésus asala ye pepee, akiri atene lo zonga Nzapa, tene oko so ala ga na ni kozoni tongana ague na Jésus na ngbanga na gbele Sanhédrin. Ala tene: “E yeke na ndia, na lege ti ndia so, a lingbi lo kui teti lo tene lo mveni lo yeke Molenge ti Nzapa.”

Tene so ayeke fini tene na gbele Pilate, na a sala si mbito agbu lo mingi. Lo hinga awe so Jésus ayeke mbeni senge zo pepee, lege-oko tongana suma so wali ti lo abaa na kota ngangu ti dutingo ti Jésus afa na gigi. Me “molenge ti Nzapa”? Pilate ahinga so Jésus alondo na Galilée. Ye oko, wala lo duti na fini ando giriri? Pilate akiri na lo na ya ti da ti gbia na lo hunda na lo: “Mo londo na ndo wa?”

Jésus aduti kpo. Kozoni lo tene na Pilate so lo yeke gbia me so Royaume ti lo ayeke ti sese so pepee. Ti fa ndani nzoni ahon ayeke sala mbeni ye oko fadeso pepee. Ye oko, be ti Pilate aso tongana lo ke ti kiri peko ti tene ni na lo, na lo sala tene ngangu na Jésus: “Mo ke ti sala tene na mbi? Mo hinga pepee mbi yeke na ngangu ti zi mo na mbi yeke na ngangu ti fa mo na keke ti pasi?”

Jésus akpe mbito ti lo tongana lo kiri tene so na lo: “Mo lingbi sala ye oko na mbi pepee, tongana amu na mo pepee ngangu so alondo na yayu.” Lo sala tene ti ngangu so Nzapa amu na ambeni zo ti komande aye na ndo sese. Jésus akiri atene: “Teti tene so, zo so azia mbi na ti ti mo ayeke na siokpari ti kota ahon.” Biani, tene ayeke na li ti Caïphe, mokonzi ti aprêtre, na azo ti lo nga na Judas Iscariote, teti ye ti kirikiri so azo asala na Jésus mingi ahon tene so ayeke na li ti Pilate.

Tene ti Jésus apika be ti Pilate mingi ahon, na lo yeke na mbito so peut-être Jésus alondo na Nzapa, tongaso Pilate akiri agi lege ti zi lo. A-Juif angba ti ke tene ti Pilate. Ala kiri adiko tene ti poroso na li ti Jésus, na lege ti mayele ala mu mbito na be ti Pilate: “Tongana mo zi zo so, mo yeke ndeko ti César pepee. Zo so atene lo mveni lo yeke gbia, lo ke César.”

Ataa tene ni aga ngangu, Pilate akiri aga na Jésus na gigi. Lo kiri lo tene na ala: “Baa! Gbia ti i!”

“Mu lo! Mu lo! Fa lo na keke ti pasi!”

Ye ni ahon ndo ti Pilate na lo kiri lo hunda: “I ye mbi fa gbia ti i na keke ti pasi?”

A-Juif aduti na ngonzo na gbe ti komandema ti azo ti Rome. Biani, ala ke na ngangu komandema ti Rome! Ye oko, na lege ti ndendia, akota prêtre atene: “E yeke na mbeni gbia pepee, gi César oko.”

Mbito ti glisa kota ndo ti lo na nzoni iri ti lo asala si Pilate ayeda na ndani na ye so aJuif ahunda lakue. Lo mu Jésus na ala. Aturugu azi bongo ti pourpre na tele ti Jésus, na ala yu lo na bongo ti lo ti ndoni. Tongana ague na Jésus ti fa lo na ndo ti keke, amu na lo keke ti pasi ti lo mveni ti yo ni.

Fadeso na ndapelele ti vendredi aga ndulu ti hunzi, lango 14 ti Nisan; peut-être a ga ndulu na bikombite. Jésus azingo na lango na kota na ndapelele ti jeudi, na pekoni lo lango mbeni pepee me ye ti pono nde nde asi na lo. Ni laa, a ninga pepee na ngangu ti lo ahunzi na gbe ti nengo ti keke ni. Tongaso agbu mbeni zo so ahon na lege, Simon ti kodoro ti Cyrène na Afrika, ti yo keke ni teti lo. Tongana ala yeke hon na lege azo mingi mingi ague na peko ti lo, na awali ayeke na popo ti ala nga, ala pika libe ti ala na vundu na ala toto teti Jésus.

Jésus abaa ndo na mbage ti awali so na lo tene: “Amolenge wali ti Jérusalem, i toto teti mbi pepee. Nde na so, i toto teti i mveni na teti amolenge ti i; teti, baa! la ni ayeke ga, so fade ala tene: ‘Ngia ayeke na awali so ayeke ngombo, na ya so adu molenge pepee, na me so molenge ade anyon la oko pepee!’ . . . Teti tongana ala sala ye so na fini keke, fade ala sala nyen na kuru keke?”

Jésus asala tene ti keke ti mara ti aJuif, so angba na fini na ya ni teti Jésus angba na popo ti ala na mbeni tanga ni ama na be na lo. Me tongana alungula ala na popo ti mara ni, gi mbeni keke so akui na lege ti yingo ayeke ngba, biani, mbeni kuru mara. Fade ala toto biani tongana aturugu ti Rome, so asala kusala teti Nzapa, afuti mara ti aJuif! Jean 19:6-17; 18:31; Luc 23:24-31; Matthieu 27:31, 32; Marc 15:20, 21.

▪ Tongana tene ti poroso so ala diko na li ti Jésus asala nzoni kua pepee amokonzi ti nzapa adiko tene wa na li ti lo?

▪ Ngbanga ti nyen mbito agbu Pilate mingi ahon?

▪ Azo wa ayo kota siokpari teti ye so asi na Jésus?

▪ Na ndani, aprêtre asala nyen ti pusu Pilate ti mu na ala Jésus si ala fa lo?

▪ Jésus atene nyen na awali so atoto teti lo, na lo ye ti tene nyen tongana lo sala tene ti “fini” keke so ahule na pekoni?