Ye so a-ange ayeke sara ndali ti e

TONGANA lo yeke fa peko ti suma so na yâ ni lo bâ a-ange ti Nzapa, prophète Daniel atene: ‘A-ange saki mingi ti asaki mingi mingi ayeke sara na Nzapa, na saki bale-oko lege saki bale-oko aluti na gbele Lo.’ (Daniel 7:10). Versê so afa ngbanga ti nyen Nzapa asara a-ange. Kua ti ala ayeke ti sara kusala na Nzapa na ala luti na gbele lo, nduru ti sara ye so kue lo tene na ala ti sara.

Nzapa ayeke tokua a-ange ti sara ambeni ye ndali ti azo. E yeke bâ tongana nyen Nzapa ayeke sara kusala na a-ange ti gue ti kpengba azo ti lo na ti bata ala, ti tene na ala atokua nga ti ga na ngbanga na ndo azo ti sioni.

A-ange akpengba azo na abata ala

A-ange angbâ lakue ti bi bê mingi na azo ngbene ye na ngoi so ala bâ sarango sese so nga na kozo koli na kozo wali. Kozoni si lo ga lani na sese, Jésus Christ, so a sara tënë ti lo tongana ndara so ayeke sara tënë, atene: “Mbi wara ngia na popo ti amolenge ti azo.” (aProverbe 8:31). Na ndo ni, Bible afa na e so “a-ange aye mingi ti bâ nda ti ye so” andu Christ nga gigi ti kekereke so a fa tënë ni na aprophète ti Nzapa.​—1 Pierre 1:11, 12.

Tongana ngoi ayeke hon, a-ange abâ lani so mingi ti azo ti sese ayeke sara pëpe na Walekengo ala, Nzapa so asara ye na ndoye. Ye so alingbi biani gi ti so bê ti a-ange so ayeke be-ta-zo na Nzapa! Ye oko, na ngoi kue so mbeni wasiokpari agbian bê ti lo na lo kiri na Jéhovah, “ngia ayeke na gbele a-ange”. (Luc 15:10). Tënë ti nzoni duti ti ala so asara na Nzapa agbu bê ti a-ange ngangu mingi, na lege mingi Jéhovah atokua ala ti kpengba na ti bata awakua be-ta-zo ti lo na ndo sese (aHébreu 1:14). Zia e bâ ambeni tapande ni.

A-ange use amû lani maboko na Lot na amolenge ti lo ti wali ti sö kuâ na lege so ala gbu maboko ti ala ti sigigi na ala na yâ ti kodoro ti Sodome na Gomorrhe so a yeke futi ni (Genèse 19:1, 15-26).a Ngu mingi na pekoni, atâa so a bi Daniel na yâ dû ti abamara, ala sara sioni na lo pëpe. Ngbanga ti nyen? Daniel atene: “Nzapa ti mbi ato ange ti Lo, lo kanga yanga ti abamara.” (Daniel 6:22). A-ange amû lani maboko na Jésus na tongo nda ti kusala ti lo na sese (Marc 1:13). Nga, kete kozoni na kuâ ti Jésus, mbeni ange asi na lo, “na lo sara si Lo wara ngangu.” (Luc 22:43). Maboko so ange so amû lani na Jésus akpengba lo biani na yâ ngangu ngoi ti fini ti lo so. Mbeni ange azi nga bazengele Pierre na da ti kanga.​—Kusala 12:6-11.

A-ange ayeke bata e laso? Tongana e voro Jéhovah alingbi na ti so Bible afa, e yeke na beku so angangu ange ti lo so e bâ ala pëpe ayeke bata e. Mbeti ti Nzapa amû zendo so: “Ange ti L’Eternel ase kando ti ngoro ala so akpe mbeto ti Lo, na Lo sö ala.”​—Psaume 34:8.

Ye oko, a lingbi e hinga so a yeke kua ti Nzapa si a-ange ayeke sara kozoni, me ti azo pëpe (Psaume 103:20, 21). Ala yeke sara ye so Nzapa si afa na ala, me pëpe aye so zo ahunda na ala ti sara. Tongaso, zo so a lingbi e iri lo ti wara mungo maboko ayeke Jéhovah, me pëpe a-ange (Matthieu 26:53). Biani, teti so e yeke bâ a-ange pëpe, e lingbi pëpe ti hinga lege so Nzapa ayeke sara kusala na ala ti mû maboko na azo na yâ ti aye nde nde. Me e hinga so Jéhovah ayeke “fa ngangu ti Lo teti ala so bê ti ala ayeke mbilimbili na Lo.” (2 Chronique 16:9; Psaume 91:11). Na e yeke na beku so “tongana e hunda ye na lege ti ye so Lo ye, Lo [Nzapa, lo yeke] mä e.”​—1 Jean 5:14.

Mbeti ti Nzapa atene nga na e so a lingbi e tene asambela ti e gi na Nzapa oko na e voro gi lo oko (Exode 20:3-5; Psaume 5:2, 3; Matthieu 6:9). A-ange so ayeke be-ta-zo awa e ti sara tongaso. Na tapande, tongana lani bazengele Jean aye ti voro mbeni ange, ange so asuku na lo, lo tene: “Bata nzoni, mo sara so pëpe! . . . Sambela Nzapa.”​—Apocalypse 19:10.

A-ange atene atokua ti Nzapa

Iri “ange” aye ti tene “watokua”; tongaso mbeni lege so a-ange ayeke sara na Nzapa ayeke so ala yeke awatokua ti lo na tere ti azo. Na tapande, “Nzapa ato [lani] ange Gabriel na mbeni kodoro ti Galilée, so iri ni ayeke Nazareth”. Ti sara nyen? Ti tene lo tene na mbeni masia so iri ti lo Marie, so fade lo më ngo, na lo yeke dü mbeni molenge-koli so iri ti lo ayeke duti Jésus (Luc 1:26-31). A tokua nga mbeni ange na aberger so ayeke na benyama ti tene na ala so a dü “Christ Seigneur.” (Luc 2:8-11). Legeoko nga, a-ange atene atokua ti Nzapa na Abraham, na Moïse, na Jésus nga na ambeni zo nde so a sara tënë ti ala na yâ Bible.​—Genèse 18:1-5, 10; Exode 3:1, 2; Luc 22:39-43.

Laso, tongana nyen a-ange ayeke sara kua tongana awatokua ti Nzapa? Zia e bâ kua so Jésus atene adisciple ti lo ayeke sara ni ande kozoni si aye ti sese so ahunzi. Lo tene: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Matthieu 24:3, 14). Ngu oko oko, aTémoin ti Jéhovah ayeke mû angbonga ahon ngbundangbu oko ti fa nzo tënë ti Royaume ti Nzapa. Me mo hinga so a-ange nga ayeke mû maboko na kua so? Tongana lo yeke fa peko ti mbeni suma so lo bâ, bazengele Jean atene: “Mbi bâ mbeni ange . . . , lo yeke na Tene-nzoni ti lakue lakue ti fa na azo so asara kodoro na ndo sese, na ti fa na amara kue, akete mara kue, azo ti yanga nde nde kue, na azo nde nde kue.” (Apocalypse 14:6, 7). Aversê so afa tâ kota kusala so a-ange ayeke sara ndali ti azo laso.

A-Témoin ti Jéhovah abâ biani fango lege ti a-ange na yâ kusala ti fango tënë da na da. Fani mingi, ala yeke si na ndo ti azo so alondo fade ti sambela ti tene mbeni zo amû maboko na ala ti hinga aye so Nzapa aye ti sara. Fango lege so a-ange ni amû nga na kusala ti aTémoin ni mveni asara si ngu oko oko, azo saki ngbangbo use wala ahon ni ayeke wara lege ti hinga Jéhovah. Mo kue mo lingbi ti wara nzoni na lege ti kusala so ayeke sara ni na gbe ti fango lege ti a-ange, kusala so ayeke sö fini ti zo.

A-ange aga na ngbanga ti Nzapa na ndo azo

Atâa so a mû lege na a-ange pëpe ti fâ ngbanga ti azo, ala yeke bâ ni gi bango na lê pëpe (Jean 5:22; aHébreu 12:22, 23). Teti so ala yeke azo so ayeke sara ye ti peko ti ngbanga so Nzapa adë ni awe, giriri a-ange aga na ngbanga ti Nzapa na ndo azo. Na tapande, Nzapa asara kusala na a-ange ti tiri na azo ti Egypte ti giriri so agbu lani azo ti Israël na ngbâa (Psaume 78:49). Nga, na mbeni bï oko “Ange ti L’Eternel” afâ aturugu saki ngbangbo oko na bale-miombe na ndo ni saki oku na yâ ti kando ti mbeni wato ti azo ti Nzapa.​—2 aGbia 19:35.

Nga, na yâ ti angoi so ayeke ga, a-ange ayeke ga ande na ngbanga ti Nzapa na ndo azo. Jésus ayeke ga ande na “a-ange ti ngangu ti Lo na yâ menga-wa, tongana Lo ga ti futa kula na azo so ahinga Nzapa pëpe, na ala so ake ti mä Tene-nzoni.” (2 aThessalonicien 1:7, 8). Ye oko, a yeke futi gi azo so ake tënë so a yeke fa ni laso na ndo sese kue na so a-ange ayeke mû maboko dä. Me azo so agi Nzapa na asara ye alingbi na afango ye ti Bible, sioni ayeke wara ande ala pëpe.​—Sophonie 2:3.

E kiri singila mingi na a-ange so angbâ be-ta-zo, na so ayeke sara lakue aye so Nzapa afa na ala. Jéhovah ayeke sara kusala na ala ti mû maboko na awakua ti lo na sese na ti bata ala. So ayeke ye ti dengo bê mingi teti e ndali ti so ambeni sioni yingo ayeke dä so a iri ala adémon na ala ye ti sara sioni na e.

Adémon ayeke azo wa?

Na yâ ti angu 1 500 so aga na peko ti so Satan ahanda Eve na yaka ti Eden, a-ange ti Nzapa abâ lani so, ti zia nde ambeni be-ta-zo tongana Abel, Hénoc na Noé, Satan Zabolo awara lege ti pusu azo kue yongoro na Nzapa (Genèse 3:1-7; aHébreu 11:4, 5, 7). Ambeni ange nga amû peko ti Satan. Bible atene so ala yeke ayingo so ake yanga “na lâ ti Noé”. (1 Pierre 3:19, 20). Tongana nyen a bâ lani ngangu-li ti ala ni polele?

Na ngoi ti Noé ambeni ange ti ngangu-li so e hinga wungo ti ala pëpe azia place ti ala na tere ti Nzapa na yayu kâ, ala mû tere ti zo na ala ga na sese. Ngbanga ti nyen? Ala maï na yâ bê ti ala nzara ti langongo na awali. Na pekoni ala dü na ala amolenge so a iri ala aNéphili (wala aNephilim), so ala yeke lani azo ti sarango ngangu na azo, na ala yo mingi. Na ndo ni, “sioye ti zo ayeke kota na sese; lakue, suma kue ti bibe ti bê ti zo ayeke gi sioni.” Ye oko, Nzapa azia si sioni ti azo ague gi na li ni tongaso pëpe. Lo sara si mbeni kota ngu-nzapa apika amû sese kue na afuti azo ti sioni na aNephilim ni kue. Azo so asö kuâ lani ayeke gi awakua be-ta-zo ti Nzapa.​—Genèse 6:1-7, 17; 7:23.

A-ange ti ngangu-li so asigigi ti ala zê na yâ kota ngu-nzapa ni. Ala zia tere ti ala ti zo ni na ala kiri na ndo ti ayingo. Na pekoni, a iri ala adémon wala ayingo sioni. Ala mû peko ti Satan Zabolo, so a iri lo “mokonzi ti ayingo sioni.” (Matthieu 12:24-27). Legeoko tongana mokonzi ti ala, ayingo sioni aye mingi si azo avoro ala.

Adémon ayeke sioni mingi, me a lingbi e sara mbeto ti ala pëpe. Ala lingbi ti sara ye kue pëpe. Lâ ni so a-ange so ake yanga akiri na yayu, a yeda na ala ti kiri na popo ti a-ange be-ta-zo ti Nzapa pëpe. Nde na so, a gbanzi ala na lumière ti Nzapa, tongaso ala yeke na nzoni beku teti gigi ti kekereke pëpe. A kanga ala na yâ ti kota bingo na lege ti yingo so iri ni ayeke Tartare (2 Pierre 2:4). Jéhovah akanga ala na yâ “zingiri ti lakue lakue”. Nga, fadeso ala lingbi mbeni pëpe ti mû tere ti zo.​—Jude 6.

A yeke nzoni mo sara nyen?

Ayingo sioni angbâ ti sara ngangu na ndo ti azo? En, na ala yeke sara ni na lege ti “mayele” tongana ti mokonzi ti ala Satan Zabolo (aEphésien 6:11, 12). Ye oko, tongana e bata wango ti Mbeti ti Nzapa, ala lingbi ti wara e pëpe. Nga, azo so aye Nzapa, angangu ange ti lo ayeke bata ala.

A yeke biani kota ye ti tene mo manda ti hinga aye so Nzapa ahunda na so a wara na yâ Mbeti ti lo nga ti sara ye alingbi na ni. Mo lingbi ti hinga aye mingi na ndo aye so Bible afa; tongaso, bâ aTémoin ti Jéhovah ti ndo so mo yeke dä wala tokua mbeti na azo so asigigi na mbeti so mo yeke diko so. A yeke nzere ande mingi na aTémoin ti Jéhovah ti manda Bible na mo senge senge nga na mbeni ngoi so alingbi na programme ti mo.

[Kete tënë na gbe ni]

[Encadré na lembeti 6]

LEGE SO A LEKE NA BUNGBI TI A-ANGE

Jéhovah ayeke na gbâ ti a-ange so a leke bungbi ti ala tongaso:

Ange so ngangu ti lo na komandema ti lo ahon ti atanga ni kue ayeke archange Michel, wala Jésus Christ (1 aThessalonicien 4:16; Jude 9). Aséraph wala aséraphin, achérub wala achérubin na atanga ti a-ange ayeke na gbe ti lo.

Na yâ ti ye so Nzapa aleke, aséraph ayeke na kota ndo. Ala yeke sara na Nzapa na tere ti trône ti lo. Na tapande, mbeni kua ti ala ayeke ti gonda dutingo nzoni-kue ti Nzapa na ti bata azo ti lo nzoni-kue na lege ti yingo.​—Esaïe 6:1-3, 6, 7.

Achérub ayeke na tere ti trône ti Nzapa na ala yeke gonda kota ti Jéhovah.​—Psaume 80:2; 99:1; Ezéchiel 10:1, 2.

Atanga ti ange ni ayeke sara kua na iri ti Jéhovah, na ala yeke sara ye so lo ye ala sara.

[Foto na lembeti 4]

A-ange ague na Lot na amolenge ti lo ti wali na nzoni ndo

[Foto na lembeti 5]

Lâ ni so bazengele Jean aye ti voro mbeni ange, ange ni atene na lo: “Mo sara so pëpe!”

[Foto na lembeti 6]

A-ange aga na ngbanga ti Nzapa na ndo azo

[Foto na lembeti 7]

Mo yeke wara nzoni na lege ti fango tënë so ayeke tambela na gbe ti fango lege ti a-ange