Zo alingbi ti bâ azo ti yingo?

BÂ NDO na lê ti nduzu aninga tongana ti so bê ti mo aye, mo yeke bâ mbeni zo ti yingo pëpe. Dengi mê ti mo, mo yeke mä ande go ti zo oko pëpe. Me, hinga so azo ti yingo ayeke dä. Ala hinga ye mingi, ala yeke na ngangu mingi, iri ti ala nga na sarango ye ti tere ti ala ayeke nde nde. Ambeni aye ti mû maboko na e, me ambeni aye ti ala ti sara sioni na e. Ala kue ayeke pensé na e.

Tâ Nzapa ayeke mbeni Yingo (Jean 4:24). Lo yeke na mbeni iri so gi lo oko la ayeke na ni nga iri ni so asara si lo yeke nde na tanga ti gbâ ti anzapa ti wataka. Iri ti lo ayeke Jéhovah (Genèse 22:14). Mbeni wasungo psaume atene: “[Jéhovah, FD] ayeke kota, na a lingbi azo asepela Lo mingi. A lingbi azo akpe mbeto ti Lo ahon anzapa kue. Biani, anzapa kue ti amara ayeke ayanda senge, me [Jéhovah, FD] asara ayayu. Gloire na yango-iri ayeke na gbele Lo, ngangu na gloire ayeke na yâ Ndo ti Nzoni-kue ti Lo.”​—Psaume 96:4-6.

Asuma so na yâ ni a fa tâ Nzapa

Bible atene so “mbeni zo ade abâ Nzapa lâ oko pëpe.” (Jean 1:18). Pendere nga na zango ti tere ti lo ahon gbungo nda ti ye ti e legeoko tongana ti mbeni zo so a dü lo waziba tongaso dungo na so lo lingbi ti hinga nzoroko ti mbeni ye pëpe. Me tongana ti so mbeni nzoni wafango ye ayeke fa na awamandango ye aye so ayeke ngangu mingi ti gbu ndani na mbeni lege so akpengba pëpe, na lege ti Bible, Nzapa afa na e aye so e lingbi pëpe ti bâ ni na lege ti aye so e lingbi ti bâ. Na lege ti asuma so Jéhovah amû na awakua be-ta-zo ti lo ti giriri, lo mû maboko na e ti bâ aye so ayeke na yayu na ti hinga songo so ayeke na popo ti e na azo so ayeke kâ.

Na tapande, na yâ ti mbeni suma so prophète Ezéchiel awara, a haka gloire ti Jéhovah na mbeni wâ, mbeni ye so aza mingi, tênë ti saphir nga na kongö. Na yâ ti mbeni suma nde, bazengele Jean abâ Jéhovah na ndo ti trône ti lo na Jean atene so “tere ti lo akpa tênë so a iri ni jaspe nga mbeni tênë ti nginza mingi so ayeke bengba bengba”. Lo kiri lo tene so “mbeni kongö angoro tere ti trône ni si na bango ni kongö ni akpa mbeni tênë so a iri ni émeraude.” Aye so afa na e so tere ti Jéhovah ayeke tâ pendere mingi na mara ni ayeke dä pëpe nga ndo so lo duti dä ayeke ndo so siriri ayeke dä.​—Apocalypse 4:2, 3; Ezéchiel 1:26-28.

Prophète Daniel nga kue awara mbeni suma na ndo ti Jéhovah so na yâ ni lo bâ “[a-ange saki] bale-oko lege [saki] bale-oko aluti na gbele [Jéhovah ].” (Daniel 7:10). Ti bâ ye ni tongaso ayeke dö bê ti zo mingi! Ti bâ mbeni ange oko, même na yâ ti suma, ayeke dö bê mingi, me tara ti bâ tongana a yeke anzoni ange gbani gbani!

Na yâ ti Bible, a sara tënë ti a-ange ahon 300 nga na popo ti ala a yeke wara aséraphin na achérubin. Mbupa ti Grec na ti Hébreu so a kiri pekoni na yâ ti Bible na “ange” ndani ayeke “watokua.” Ni la, a-ange alingbi ti sara lisoro na amba ti ala nga giriri ala sara lisoro na azo. A-ange ayeke pëpe azo so ayeke ândö na sese. Jéhovah acréé azo ti yingo so angu mingi mingi kozoni si lo créé zo.​—Job 38:4-7.

Na yâ ti suma ti Daniel, lo bâ a-ange mingi mingi abungbi ti bâ mbeni kpengba ye. Daniel abâ “zo oko tongana Molenge Ti Zo” aga nduru na trône ti Jéhovah ti tene a mû na lo “ngangu ti komande, na gloire, na royaume, si azo kue, amara kue, na azo ti yanga nde nde kue, asara na Lo”. (Daniel 7:13, 14). “Molenge Ti Zo”, so ayeke na kota ndo na yayu, ayeke Jésus Christ so azingo na kuâ na so a mû lo ti komande na ndo ti sese kue. Na yâ ti kete ngoi, komandema ti lo ayeke mû place ti akomandema kue ti azo na ayeke sara si kobela, vundu, sarango pasi na zo, yere na même kuâ ayeke hunzi.​—Daniel 2:44.

Biani ziango Jésus na ndo ti mbata ti gbia amû ngia mingi na gbâ ti a-ange so ayeke be-ta-zo so aye nzoni ti azo. Me, ye ti mawa ni ayeke so, a yeke pëpe a-ange kue la ayeke na ngia.

Awato ti Nzapa nga na ti azo

Gi na tongo nda ti mbaï ti azo, mbeni oko ti a-ange so aye ti tene a voro lo alondo ti ke yanga ti Jéhovah na lo sara si lo wani lo ga Satan so aye ti tene “Zo ti kengo yanga.” Satan ayeke tâ sioni mingi na lo yeke tâ nde mingi na Jéhovah so aye ti lo azo mingi. Ambeni ange nga kue amû peko ti Satan. Bible airi ala asioni yingo. Legeoko na Satan, asioni yingo nga aga asioni wato ti azo. Ala la asara si apasi, asarango ye ti kirikiri, akobela, yere nga na abira ayeke na ndo ti sese.

A yeke sara tënë mingi mbeni pëpe na ndo ti Satan na yâ ti a-eglize mingi, me mbeti ti Job afa asarango ye ti tere ti ange ti kpengba-li so nga na ye so apusu lo ti sara ye. Versê ni atene: “Tënë asi tongaso, na lâ ni so amolenge ti Nzapa aga ti luti na gbele L’Éternel, Satan aga na popo ti ala nga.” Na yâ ti lisoro so aga na pekoni, Satan atene tënë ti mbana lo tene so Job ayeke sara na Nzapa gi ngbanga ti so lo yeke wara ye na pekoni. Ti fa so tënë ti lo ayeke tâ tënë, Satan abi kota ye ti vundu na ndo ti Job, lo fâ anyama ti Job nga na amolenge ti lo bale-oko kue. Na pekoni, lo sara si akä ti sanzo amû tere ti Job kue. Aye kue so Satan asara so atï na ngu.​—Job 1:6-19; 2:7.

Jéhovah ayeke na anzoni raison ti zia lege na Satan aninga, me lo yeke zia lo tongaso teti lakue lakue pëpe. Na yâ ti kete ngoi lo yeke futi Zabolo. Lo sara ambeni ye so a hunda ti sara ni awe na a fa ni na yâ ti mbeti ti Apocalypse. Mbeti ti Apocalypse afa nga na e polele mbeni kpengba ye so asi na yayu so e lingbi fade ti bâ ni pëpe. Versê ni atene: “Bira alondo na yayu: Michel [Jésus Christ so azingo na kuâ] na a-ange ti lo atiri bira na sioni nyama so akpa ngbo so [Satan], na sioni nyama ni na a-ange ti lo nga atiri na ala, me sioni nyama ni asö benda pëpe, nga ndo angbâ mbeni pëpe ndali ti ala na yayu. Tongaso a bi kota sioni nyama so akpa ngbo so, ngbo ti giriri, lo so a iri lo Zabolo na Satan, lo so ayeke handa sese kue so azo ayeke dä; a bi lo na sese, na a bi nga a-ange ti lo ni legeoko na lo.”​—Apocalypse 12:7-9.

Bâ so a tene so Satan “ayeke handa sese kue so azo ayeke dä”. Lo handa azo na yango na nduzu amvene ti abungbi ti vorongo nzapa tongaso si ala gue yongoro na Jéhovah nga na aye so ayeke na yâ ti Bible. Mbeni mvene ni ayeke so a tene zo kue so akui ayeke gue na ndo ti ayingo. Azo afa tënë so na alege nde nde. Na tapande, na Afrika nga na Asie azo mingi amä na bê so azo so akui ayeke gue na ndo ti ayingo so akotara ti ala ayeke dä. Atënë ti purgatoire na ti enfer ti wâ aluti na ndo ti tënë so atene zo ayeke na fini na peko ti kuâ ti lo.

Zo ayeke na fini na yayu na peko ti kuâ ti lo?

Azo kutu mingi na yâ ti dunia amä na bê so anzoni zo kue ayeke gue na yayu. Tënë so ayeke ti lo tongana nyen? Tâ tënë, ambeni zo ayeke gue na yayu, me wungo ti ala ayeke gi kete tongana a haka ni na azo ngbundangbu mingi so akui. Bible afa so a yeke ‘vo ande na ndo ti sese’ azo 144 000 na ala yeke sara ande kua tongana “aprêtre” nga na “agbia na ndo ti sese.” (Apocalypse 5:9, 10; 14:1, 3). Ala yeke bungbi ande oko na Jésus Christ, Molenge Ti Zo, ti komande na yâ ti ngorogbia ti yayu so ayeke Royaume ti Nzapa. Royaume so ayeke futi ande Satan na asioni yingo ti lo na ayeke sara si sese aga paradis. Mingi ti azo so akui ayeke kiri ande na fini na beku ti ngbâ na fini teti lakue lakue na yâ ti Paradis so na ndo ti sese.​—Luc 23:43.

Na nduru tënë, azo mingi ayeke na ndo ti ayingo. Lo so lo yeke kota mingi na popo ti ala kue ayeke Jéhovah Nzapa, lo so asara aye kue so ayeke na fini. A-ange gbani gbani so ayeke be-ta-zo ayeke sara na lo. Ambeni ange ni so amû peko ti Satan ake yanga ti Jéhovah na ala yeke sara kue ti handa azo. Na ndo ni, a yeke wara mbeni kete wungo ti azo so “a vo” wala a soro ala na ndo ti sese ti gue ti sara ambeni kota kusala na yayu. So e hinga ye so awe, zia e bâ fadeso azo so ayeke na ndo ti ayingo so e lingbi ti sara lisoro na ala nga tongana nyen e lingbi ti gi ti sara lisoro na ala.