Alege so Ala Sala na Kusala ti Fa Nzo Tene
A MU yanga na aChrétien ti “sala si azo na popo ti amara kue aga adisciple,” me so aye pepe ti tene a lingbi ala sala ngangu na ndo azo wala ti sala adisciple na ngangu. Tokua ti Jésus la ni ayeke ti “tene nzo tene na azo ti bê ti-molenge,” ti “sala si bê ti zo so afâ awe aga nzoni,” ti “lungula vundu ti azo kue so atoto na vundu.” (Matthieu 28:19, NW; Esaïe 61:1, 2, NW; Luc 4:18, 19) A-Témoin ti Jéhovah ayeke gi ti sala tongaso na fango nzo tene so alondo na Bible. Tongana prophète Ézékiel ti giriri, aTémoin ti Jéhovah laso ayeke tara ti wara “ala so atoto teti ye kue ti sioni mingi so azo asala.”—Ezéchiel 9:4.
Lege so azo ahinga ni nzoni, so ala yeke sala kusala na ni ti wara ala so ayeke na yâ vundu teti aye so ayeke si laso, ayeke guengo da na da. Na lege so, ala yeke sala mbeni nzoni ngangu ti ndu azo kue, tongana ti so Jésus asala la ni na ngoi so ‘lo yeke tambela na akota kodoro na akete kodoro ti fa tene, na ti mu na azo nzo tene ti Royaume ti Nzapa.’ Akozo disciple ti lo asala tongaso nga. (Luc 8:1; 9:1-6; 10:1-9) Laso, na ndo so lege ayeke dä, aTémoin ti Jéhovah ayeke sala ngangu ti fa tene na da oko oko fani mingi na yâ ngu oko, na gingo ti sala lisoro na zo ti da ni teti akete penze-ngbonga na ndo mbeni ye so asi na kodoro ni wala na ndo sese, na so agbu bê ti lo. Peut-être a yeke diko aversê oko wala use, na tongana zo ni asala nzala ti tene ni, Témoin ni alingbi ti leke ti kiri ti ga na mbeni ngoi so alingbi ti sala lisoro mingi ahon. A yeke mu lege na wamango tene ni ti wara aBible na ambeti so ayeke fa nda ti Mbeti ti Nzapa, na tongana zo ti da ni aye, a yeke manda ni na lo na yanga-da, na hundango pepe na lo ti futa mbeni ye. A yeke mu li ni lakue na ya amandango Bible kutu mingi ti mu maboko na azo nga na asewa na ndo sese kue.
Mbeni lege nde ti fa “nzo tene ti royaume” na azo ayeke abungbi so ayeke sala ni na yâ aDa ti Royaume ti ndo ni. A-Témoin ayeke sala abungbi dä yenga na yenga. Mbeni bungbi ni oko ayeke diskur so amu na gbele azo kue na ndo mbeni tene so agbu bê ti azo mingi; na pekoni, a yeke mandango ye na ndo mbeni li ti tene ti Bible wala mbeni prophétie, na Tour ti Ba Ndo ayeke mbeti so a luti na ndo ni ti sala lisoro. Mbeni bungbi ni nde ayeke mbeni ekole ti fango lege na aTémoin si ala fa nzo tene nzoni ahon; na pekoni, a yeke mbeni mbage so a mu ni teti lisoro na ndo lege ti salango tene ti témoin na yâ territoire ti ndo ni. Nga, fani oko na yâ yenga oko, kete wungo ti aTémoin ayeke bungbi na yâ ambeni da ti azo teti amandango Bible.
Abungbi so kue ayeke teti azo kue. A yeke hunda nginza oko pepe. Amara ti bungbi tongaso ayeke teti nzoni ti azo kue. Bible atene: “Zia e bi bê na ndo mba na popo ti e ti wa tele ti duti na ndoye nga na anzo kusala, na ziango pepe ti bungbi tele ti e, tongana ti so ambeni ayeke sala lakue, me na wango tele na popo ti e, na i sala tongaso mingi ahon teti i ba lango ni aga ndulu.” Mandango Bible zo mveni na gingo nda ti aye ayeke kota ye mingi, me bungbingo oko na ambeni zo ayeke ye ti mungo ngangu: “Win asala si yanga ti win aza; tongaso zo asala si lê ti ndeko ti lo aza.”—aHébreu 10:24, 25, NW; aProverbe 27:17.
A-Témoin nga ayeke sala nzoni kusala na alege so azi na ala ti sala tene na ndo nzo tene tongana ala yeke sala lisoro na ambeni zo lâ oko oko. A lingbi ti duti ambeni kete lisoro na zo so ayeke ndulu na ala, wala mbeni zo so ague na tambela legeoko na ala na yâ bus wala lapara, mbeni yongoro lisoro na mbeni kamarade wala songo, wala mbeni lisoro na mbeni fon ala ti ndo ti kusala na ngoi ti wungo tele. Mingi ti afango tene ti Jésus na ngoi so lo de na sese ayeke tongaso: tongana lo yeke tambela na tele ti ngu, lo duti na tele ti mbeni hoto, lo yeke te ye na da ti mbeni zo, lo yeke gue na matanga ti mariage, wala lo yeke hon na tambela na yâ mangboko ti gbungo asusu na ndo Ngu-ingo ti Galilée. Lo fa tene na yâ asynagogue nga na yâ temple ti Jérusalem. Na ndo kue so lo yeke dä, lo gbu angoi ti sala tene na ndo Royaume ti Nzapa. A-Témoin ti Jéhovah ayeke sala ngangu ti mu peko ti senda ti lo na lege so nga.—1 Pierre 2:21.
FANGO TENE NA LEGE TI TAPANDE
Mbeni oko ti alege ti fango nzo tene so alingbi ti duti kota ye pepe na lê ti mo tongana zo so afa ye ni na mo ayeke sala ye pepe alingbi na afango ye ni. Ti fa mbeni ye na ti sala mbeni ye nde ayeke ndendia, na ndendia ti alege ti vorongo asala si azo kutu mingi avi peko ti ala na Bible. A bi tene na li ti Bible na lege ni pepe. Ascribe na aFarizien ayeke la ni na mbage ti Mbeti ti Nzapa so asala na yanga ti Hébreu, me Jésus afa ala tongana awandendia. Lo sala tene ti dikongo ye ti ala na yâ Ndia ti Moïse, na pekoni, lo tene na adisciple ti lo: “Tongaso, i sala, na i bata ye kue so ala tene na i; me i sala na lege ti kusala ti ala pepe, teti ala tene ye, me ala sala pepe.” (Matthieu 23:3) Dutingo mbeni tapande ti salango ye na lege ti mbilimbili ti mbeni Chrétien asala tene ngangu mingi ahon gbâ ti angbonga mingi ti fango tene. A sala tene ti ye so la ni na awali Chrétien so akoli ti ala amä na bê pepe: “A lingbi ti wara ala na tene oko pepe, me na lege ti tambela ti awali ti ala teti so ala ba na lê ti ala mveni nzo tambela ti i.”—1 Pierre 3:1, 2, NW.
Tongaso, aTémoin ti Jéhovah ayeke sala ngangu ti fa nzo tene na azo na lege so nga: na dutingo tapande na yâ tambela ti ala ti Chrétien so ala wa ambeni zo ti duti na ni. Ala yeke tara ti ‘sala na azo ye kue so ala ye azo asala na ala.’ (Matthieu 7:12) Ala sala ngangu ti sala tongaso na azo kue, gi pepe na afon ala Témoin, andeko ti ala, azo so ayeke ndulu na ala, wala azo ti sewa. Teti ala yeke mbilimbili-kue pepe, ala yeke sala ye kue pepe na lege ni. Me, a yeke nzala ti bê ti ala ti sala ye ti nzoni na mbage ti azo kue, pepe gi na fango na ala nzo tene ti Royaume, me nga na mungo maboko na ala tongana lege ayeke dä.—Jacques 2:14-17.
[Foto na lembeti 19]
Hawaii
[Foto na lembeti 19]
Venezuela
[Foto na lembeti 19]
Yougoslavie
[Afoto na lembeti 20]
A-Da ti Royaume, so a leke ni alingbi na ni, ayeke ando ti salango lisoro na ndo Bible
[Afoto na lembeti 21]
Na yâ dutingo ti ala na sewa, nga na lege ti lisoro na ambeni zo, aTémoin ayeke tara na bê ti ala kue ti sala aye so ala yeke wa ambeni zo ti sala