Nzo Tene so Ala Ye Mo Mä

NA NGOI SO Jésus ayeke la ni na sese, adisciple ti lo aga ahunda lo: “Fade fä ti singo ti mo, na hunzingo ti aye ti sese so, ayeke nyen?” Lo kiri tene so fade a yeke ba bira na popo ti amara mingi, boma, kobela ti futi kodoro, yengingo ti sese, mbeni guengo na li ni ti kengo-ndia, awafango ye ti lege ti vorongo ti wataka so ahanda azo mingi, kengo na salango ngangu na atâ disciple ti lo, na ndoye ti azo mingi teti mbilimbili ayeke dë. Tongana aye so ayeke to nda ti si, a yeke fa so Christ asi awe na mbeni lege so lê aba pepe, na Royaume ti yayu ayeke ndulu. Ye so ayeke mbeni sango, mbeni nzo tene! Tongaso, Jésus azia atene so dä tongana mbeni mbage ti fä ni: “Fade a fa nzo tene ti royaume so na sese kue so azo ayeke dä, tongana tene ti témoin na amara kue; na pekoni, fade nda ni aga.”—Matthieu 24:3-14, NW.

Biani, aye so ayeke si na ndo sese ade ti ninga pepe ayeke sioni, me ye so ala duti fä ni ayeke nzoni, mbilimbili singo ti Christ. Aye so afa ni na nduzu ge ato nda ti ga polele na ngu 1914, so kozoni a fa tene na ndo ni mingi! A fa hunzingo ti Angoi ti Amara, na tongo nda ti ngoi ti gbiango ye so alondo na komandema ti azo ti si na Komandema ti Ngu Saki Oko ti Christ.

A fa polele na Psaume 110 aversê oko na use, nga na Apocalypse 12:7-12 so ngoi ti gbiango ye ayeke dä. Na yâ aversê so, a fa so fade Christ ayeke duti na koti ti Nzapa na yayu juska na ngoi so lo yeke ga Gbia. Na pekoni, bira na yayu ayeke hunzi na tombango Satan na ndo sese, ye ti gango na vundu na sese, na Christ ayeke komande na popo ti awato ti lo. Hunzingo ti aye ti sioni kue ayeke duti ande na lege ti mbeni “kota ye ti vundu” so ayeke hunzi na bira ti Har–Maguédôn; na pekoni, Komandema ti Ngu Saki Oko ti siriri ti Christ ayeke to nda ni.—Matthieu 24: 21, 33, 34, NW; Apocalypse 16:14-16.

Bible atene: “Me hinga ye so, na lâ ti nda ni fade ngoi ti kpale na ti ngangu asi. Teti fade azo aga azo so andoye tele ti ala mveni, azo so andoye nginza, azo ti fandara, azo ti baba, awazonga, azo so amä yanga ti ababâ na mama pepe, azo so akiri singila pepe, azo so ayeke be-biani pepe, azo so andoye asongo ti ala pepe, azo so aye pepe ti leke tene, azo so adiko sioni tene na ndo zo, azo so akanga nzala ti tele pepe, azo so asala pasi na mba ti ala, azo so andoye nzoye pepe, azo so akä aita ti ala, azo ti kpengba-li, azo so baba asi bê ti ala, azo so andoye ngia mingi ahon ti ndoye Nzapa, a ba ala tongana azo so abata dutingo ndulu na Nzapa me ala ke ngangu ni awe; mo vi peko na azo tongaso.”—2 Timothée 3:1-5, NW.

Ambeni zo alingbi ti tene so aye so asi kozoni awe na yâ mbaï ti azo, me tâ tene ni ayeke so ala si lâ oko pepe na mara ti ngangu tongaso. Tongana ti so awasungo mbaï na awafango tene asala tene ni, a wara lâ oko pepe mbeni ngoi na ndo sese tongana ti ngoi so ato nda ni na ngu 1914. (Ba lembeti 7.) Avundu ni ayeke kota mingi ahon vundu kue so asi kozo. Na ndo ni, ti ambeni mbage ti fä ti Christ ti lâ ti nda ni, a yeke nzoni ti ba aye so: Fango tene na ndo sese kue ti singo ti Christ na Royaume ti lo amu ndo na mbeni lege so ade ti si kozoni pepe na yâ mbaï. Salango ngangu na azo teti fango tene ahon lâ oko pepe ti so a yeke sala na aTémoin ti Jéhovah. A fâ azo ngbangbo mingi na popo ti ala na yâ akando ti pasi ti aNazi. Juska laso, a kanga lege na aTémoin ti Jéhovah na ambeni ndo; nga na ambeni ndo nde, a gbu ala, a bi ala na da ti kanga, a sala pasi na ala, na a fâ ala. So kue ayeke na popo ti fä so Jésus amu.

Tongana ti so a fa ni kozoni na Apocalypse 11:18, “aGentil ayeke na ngonzo” na mbage ti aTémoin be-ta-zo ti Jéhovah, na ye so afa so Jéhovah ayeke fa ande “ngonzo” ti lo na mbage ti amara so. Oko versê so atene fade Nzapa ayeke “futi ala so afuti sese.” Giriri, a wara lâ oko pepe na yâ mbaï ti azo, mbeni ngoi so ngangu ti sese ti bata fini aduti na yâ kota kpale. Ye oko, fadeso a yeke nde! Awasenda-ye mingi agboto mê so tongana zo angbâ ti buba sese, fade a yeke ga mbeni ndo so zo alingbi ande pepe ti lango dä. Me Jéhovah ‘aleke sese so si azo alingbi duti dä,’ na fade lo yeke lungula azo ti futingo sese kozoni si ala hunzi kusala ti ala ti futingo sese.—Esaïe 45:18.

ADEBA NZONI NA NDO SESE NA GBE TI ROYAUME

So azo ayeke ngbâ na fini na gbe ti Royaume ti Nzapa alingbi ti duti tongana mbeni tene ti ndima teti awamabe mingi ti Bible so atene azo kue so ayeke wara salut ayeke gue ande na yayu. Bible atene so gi wungo ti azo kete si ayeke gue na yayu, na ala so ayeke duti ande teti lakue lakue na ndo sese ayeke azo mingi so asi singo, so zo alingbi pepe ti fa wungo ti ala. (Psaume 37:11, 29; Apocalypse 7:9; 14:1-5) Na yâ mbeni prophétie ti buku ti Bible ti Daniel, a fa so Royaume ti Nzapa na gbe ti Christ ayeke mu ndo ti sese kue na a yeke komande na ndo ni.

Na yâ prophétie so, a haka Royaume ti Christ na mbeni tênë so alondo na kota yanga-ti-komande ti Jéhovah so ayeke tongana hoto. Lo pika na lo futi mbeni yanda so ayeke fä ti angangu mara ti ndo ti sese, ‘na tênë ni apika yanda ni aga kota hoto na a si sese kue.’ Prophétie akiri atene: “Na lâ ti agbia so, fade Nzapa ti yayu ayä royaume so afuti lâ oko pepe, na Lo zia royaume ni na tïtî ambeni zo nde pepe; me fade royaume so afâ mbeni royaume so kue ndulu ndulu, na a sala si royaume nde nde so kue awe; na fade royaume so angbâ lakue lakue.”—Daniel 2:34, 35, 44, NW.

A yeke Royaume so na beku so aluti na ndo Bible ti fini ti lakue lakue na ndo mbeni sese, so a sukula ni na a sala ni pendere, si aTémoin ti Jéhovah aye ti sala tene na ndo ni na mo. Azo kutu mingi so ayeke na fini laso, na ala kutu mingi mingi so laso ayeke na yâ dukua ayeke wara ande lege ti duti lakue lakue na ndo ni. Na pekoni, na gbe ti Komandema ti Ngu Saki Oko ti Christ Jésus, ngbele ye so Jéhovah aleke na bê ti lo, ti leke sese na ti zia kozo koli na kozo wali na ndo ni, ayeke ga ande tâ tene. Fade paradis so ayeke ga lâ oko pepe ye so bê ti zo anze na ni. Legeoko tongana ti so a mu la ni na Adam kusala na yâ yaka ti Éden, azo ayeke wara ande akota kusala ti batango sese, na akeke na anyama so ayeke na ndo ni. “Fade ala wara ngia na kusala ti maboko ti ala teti lâ mingi.”—Esaïe 65:22; Genèse 2:15.

A lingbi ti sala kusala na aversê mingi ti fa aye so ayeke duti ande na ngoi so sambela so Jésus afa na e aga tâ tene: “Zia royaume ti mo aga. Zia a sala na sese ye so bê ti mo aye legeoko tongana a sala ni na yayu.” (Matthieu 6:10, NW) Ye oko, zia versê so alingbi ti fadeso: “Mbi mä mbeni ngangu go so alondo na trône, a tene: ‘Ba! Tente ti Nzapa ayeke na azo, na fade lo duti na ala, na ala ga azo ti lo. Na fade Nzapa mveni ayeke na ala. Nga fade lo mbô ngule kue na lê ti ala, na fade kui ayeke mbeni pepe, fade mua wala wuluwulu wala pasi ayeke mbeni pepe. Angbele ye ahon awe.’ Na Lo so aduti na ndo trône atene: ‘Ba! Mbi yeke sala ye kue fini.’ Nga, lo tene: ‘Sû ni na mbeti, teti atene so ayeke biani na tâ tene.’”—Apocalypse 21:3-5, NW.

[Akete tene na lembeti 15]

“Ngoi ti kpale na ti ngangu,”

ME “fade nda ni aga”

[Foto na lembeti 18]

Pays-Bas

[Foto na lembeti 18]

Nigéria