Chapitre Bale Oko na Mbasambala

Awande Abungbi na Da ti Sambela ti Nzapa

Esaïe 56:1-12

1, 2. A sala pendere tene wa na ngu 1935, na ye so ayeke mbeni mbage ti nyen?

NA VENDREDI, lango 31 ti nze ti mai ngu 1935, Joseph F. Rutherford amu diskur na gbele azo mingi na mbeni kota bungbi na Washington D.C. Lo sala tene na ndo hingango “azo mingi so asi singo,” so bazengele Jean aba ala na yâ ye so a ba tongana suma. Na kota mbage ti diskur ti lo, Ita Rutherford ahunda: “Zia azo kue so ayeke na beku ti duti teti lakue lakue na ndo sese alondo.” Na lege ti tene ti mbeni oko ti azo so aga, “azo so wungo ti ala ahon ndambo ti azo kue so aga alondo.” Na pekoni, wamungo diskur ni atene: “Ba! Azo mingi so asi singo!” Mbeni zo so aduti nga dä la ni adabe lo: “Na tongo nda ni, ndo adë, me na pekoni dekongo ti ngia alondo, nga pikango maboko ni ayeke ngangu na aninga.”​—Apocalypse 7:9.

² A yeke la ni mbeni pendere ngoi na yâ gango tâ tene ti mbeni prophétie so a sû na mbeti ndulu na angu 2 700 kozoni awe, na so a yeke na yâ Bible ti e tongana Esaïe chapitre 56. Legeoko tongana ti ambeni prophétie nde mingi na yâ Esaïe, a wara nga na yâ ni azendo so adë bê, nga angangu gbotongo mê. Na yâ kozo gango tâ tene ni, a yeke sala tene na azo so Nzapa ate mbele na ala ti ngoi ti Isaïe mveni, me gango tâ tene ti lo ahon asiècle mingi ti si na ngoi ti e.

Ye so A Hunda ti Wara Salut

3. Tongana aJuif ayeke gi salut na mbage ti Nzapa, a lingbi ala sala nyen?

³ Esaïe chapitre 56 ato nda ni na gbotongo mê teti aJuif. Ye oko, a lingbi atâ wavorongo kue abata ye so prophète ni asû na mbeti. E diko: “L’Eternel atene tongaso, I fâ ngbanga mbilimbili, na i sala ye ti mbilimbili, teti salut ti Mbi aga ndulu, na mbilimbili ti Mbi aga ndulu ti si na lê ti azo. Ngia ayeke na zo so asala ye so, na molenge ti zo so agbu ye so ngangu; lo so abata sabbat si a ga sioni pepe, na lo bata maboko ti lo si a sala sioye pepe.” (Esaïe 56:1, 2) A lingbi awakodoro ti Juda so ayeke gi salut na mbage ti Nzapa ayeda na Ndia ti Moïse, na salango ye alingbi na mbilimbili nga na dutingo na fini so ayeke na lege ni. Ngbanga ti nyen? Ngbanga ti so Jéhovah mveni ayeke mbilimbili. Azo so atomba peko ti mbilimbili ayeke na ngia so aga ndali ti so Jéhovah ayeda na ala.​—Psaume 144:15b.

4. Ngbanga ti nyen batango Sabbat ayeke kota ye na Israël?

⁴ Prophétie ni agboto lê na ndo batango Sabbat teti so a yeke mbeni kota mbage ti Ndia ti Moïse. Biani, mbeni oko ti nda ti atene so ngbanga ni awakodoro ti Juda ague na ngba na nda ni ayeke so ala ba Sabbat na nene ni pepe. (Lévitique 26:34, 35; 2 Chronique 36:20, 21) Sabbat ayeke mbeni fä ti songo, so ayeke nde, na popo ti Jéhovah na aJuif, na azo so abata Sabbat afa so ala yekia songo so. (Exode 31:13) Na mbage, batango Sabbat ayeke dabe ti azo so ayeke na ngoi ti Isaïe so Jéhovah ayeke Wasalango ye. Mara ti batango ye tongaso ayeke dabe nga na abe-nzoni ti lo na mbage ti ala. (Exode 20:8-11; Deutéronome 5:12-15) Na nda ni, batango Sabbat ayeke mu mbeni lekengo ye so ayeke lakue, so atambela nzoni, teti vorongo Jéhovah. Hungo tele fani oko na yâ yenga oko na lege ti kusala ti ala ayeke mu lege na awakodoro ti Juda ti sambela, ti manda ye, na ti gbu li.

5. Ti ba ni biani, tongana nyen aChrétien alingbi ti sala ye alingbi na wango ti bata Sabbat?

⁵ Ye oko, ti aChrétien ayeke tongana nyen? Wango ti bata Sabbat andu ala nga? Polele pepe, teti aChrétien ayeke na gbe ti Ndia pepe na tongaso a hunda na ala pepe ti bata Sabbat. (aColossien 2:16, 17) Ye oko, bazengele Paul atene so “mbeni hungo tele ti sabbat” ayeke dä teti aChrétien be-ta-zo. “Hungo tele ti sabbat” so andu dutingo na mabe na yâ sadaka ti kota ngele ti Jésus teti salut, nga ziango lege ti luti gi na ndo akusala. (aHébreu 4:6-10, NW) Tongaso, atene ti prophétie ti Isaïe na ndo Sabbat adabe awakua ti Jéhovah laso na kota ti dutingo na mabe na yâ ye so Nzapa aleke teti salut. A yeke nga mbeni pendere dango bê na ndo nene ti gi ti lë mbeni kpengba songo na Jéhovah na ti ngbâ ti voro lo lakue.

Dengo Bê Teti Awande nga A-Eunuque

6. Fadeso a gboto lê na ndo abungbi use wa?

⁶ Jéhovah ayeke sala tene fadeso na abungbi use so aye ti voro lo, me so na gbe ti Ndia ti Moïse alingbi pepe ti ga na yâ kongrégation ti aJuif. E diko: “Wande so asala beoko na L’Eternel, zia lo tene pepe, Biani, fade L’Eternel alungula mbi na popo ti azo ti Lo; na zia eunuque atene pepe, Ba, mbi yeke kuru keke.” (Esaïe 56:3) Mbito ti wande ayeke so fade a lungula lo na popo ti Israël. Gingo bê ti eunuque ayeke so fade lo yeke wara lâ oko pepe amolenge ti bata iri ti lo. A lingbi abungbi use so kue aduti na bê so akpengba. Kozoni si e ba nda ni, zia e ba dutingo wa ala yeke na ni na gbe ti Ndia so andu mara ti Israël.

7. Akatikati wa Ndia azia na ndo awande na Israël?

⁷ A kanga lege na awande so afâ ganza pepe ti mu mbage na yâ vorongo legeoko na Israël. Na tapande, a zi lege na ala pepe ti mu mbage na Pâque. (Exode 12:43) Awande so adoro polele pepe andia ti kodoro ni ayeke duti na yâ mbilimbili na a yamba ala, me ala yeke pepe na songo so aninga lakue na mara ni. Biani, ambeni ayeda kue na Ndia ni, na ti fa ni na gigi, akoli ni afâ ganza. Na pekoni ala ga aprosélyte, na matabisi ti voro na yâ sedu ti da ti Jéhovah na a ba ala tongana mbeni mbage ti kongrégation ti Israël. (Lévitique 17:10-14; 20:2; 24:22) Ye oko, même aprosélyte ayeke azo so amu mbage kue pepe na yâ mbele ti Jéhovah na Israël, na ala yeke pepe na ye ti héritier na Sese ti Zendo. Ambeni wande alingbi bi lê na mbage ti temple ti sambela, nga a ba so ala lingbi ti mu asadaka na lege ti bungbi ti aprêtre na ngoi kue so asadaka ni alingbi na Ndia. (Lévitique 22:25; 1 aGbia 8:41-43) Me a lingbi azo ti Israël abungbi ndulu mingi na ala pepe.

A-Eunuque Awara Iri Teti Ngoi so A Diko Nda ni Pepe

8. (a) Na gbe ti Ndia, a ba a-eunuque tongana nyen? (b) Tongana nyen a yeke sala kusala na a-eunuque na yâ amara ti apaïen, nga ngoi na ngoi tene “eunuque” alingbi ti ndu nyen?

⁸ Atä aJuif si adü ala, a ke na a-eunuque ti duti mbage kue ti mara ti Israël.a (Deutéronome 23:1) Na popo ti ambeni mara ti apaïen ti ngoi so a sû na Bible, a zia a-eunuque yamba teti mbeni kusala so ayeke nde, na a yeke ye so asala ka lakue ti fâ korobo ti ambeni molenge so a gbu ala na ngba na yâ bira. A zia a-eunuque tongana akapita na yâ asedu ti gbia. Mbeni eunuque alingbi ti duti “zo ti bata awali,” mbeni “zo so abata awanda,” wala mbeni zo so amu maboko na gbia-wali. (Esther 2:3, 12-15; 4:4-6, 9) Ye oko afa pepe so azo ti Israël asala ye tongaso, wala la ni a yeke gi a-eunuque mbilimbili ti sala kua na agbia ti Israël.b

9. Atene ti dengo bê wa Jéhovah atene na atâ eunuque na lege ti mitele?

⁹ Na ndo ti so ala lingbi la ni ti mu mbage na yâ vorongo tâ Nzapa gi na yâ mbeni katikati, atâ eunuque na lege ti mitele na Israël ayeke na kota kamela teti ala lingbi pepe ti ga ababâ ti amolenge si a bata iri ti sewa ti ala. Tongaso, atene ti prophétie so aga na pekoni ayeke biani ye ti dengo bê! E diko: “L’Eternel atene tongaso, A-eunuque so abata sabbat ti Mbi, na ala ye ti sala ye so amu ngia na Mbi, na ala bata tene ti mbele ti Mbi nzoni, fade Mbi mu na ala mbeni ndo na iri na yâ da ti Mbi na yâ gbagba ti Mbi, ndo ni so na iri ni so ayeke nzoni ahon iri ti amolenge-koli wala amolenge-wali; fade Mbi mu na ala iri ti lakue lakue so alingbi ti hon pepe.”​—Esaïe 56:4, 5.

10. Dutingo ti a-eunuque agbian lawa, na a to nda ni na ngoi ni so lege ti matabisi wa a zi na ala?

¹⁰ Tâ tene, fade mbeni ngoi ayeke ga so même dutingo mbeni tâ eunuque na lege ti mitele ayeke pepe mbeni ye so akanga lege na zo ti tene a yeda na lo kue tongana wakua ti Jéhovah. Tongana ala mä yanga, fade a-eunuque ayeke wara “mbeni ndo,” na yâ da ti Jéhovah nga mbeni iri, so ayeke nzoni ahon amolenge-koli na amolenge-wali. Ye so asi lawa? Pepe juska na peko ti kuâ ti Jésus Christ. Na ngoi ni so, a zia na place ti mbele ti Ndia ti giriri mbeni fini mbele, nga a zia “Israël ti Nzapa” na place ti Israël ti mitele (aGalate 6:16) A to nda ni na ngoi ni so, azo kue so afa na gigi mabe awara lege ti mu vorongo so alingbi na Nzapa. Akangbi nga dutingo ti zo na lege ti mitele ayeke kota ye mbeni pepe. Azo so agbu ngangu, atä dutingo ti ala na lege ti mitele ayeke tongana nyen, ayeke wara ande “iri ti lakue lakue so alingbi ti hon pepe.” Fade Jéhovah aglisa ala pepe. A yeke sû ande iri ti ala na yâ “mbeti ti dabe” ti lo, nga na ngoi so Nzapa adiko, fade ala wara fini ti lakue lakue.​—Malachie 3:16; aProverbe 22:1; 1 Jean 2:17.

Awande Avoro Legeoko na Azo ti Nzapa

11. Ti wara adeba nzoni, a hunda na awande ti sala nyen?

¹¹ Ye oko, ti awande ayeke tongana nyen? Fadeso prophétie ni akiri na ndo azo so, na Jéhovah ayeke na akota tene ti dengo bê teti ala. Isaïe asû na mbeti: “Awande nga, ala so asala beoko na L’Eternel ti sala kusala na Lo, na ti ndoye iri ti L’Eternel, na ti ga aboi ti Lo, azo oko oko kue so abata sabbat, na ala sala si sabbat ni aga sioni pepe, na ala bata tene ti mbele ti Mbi nzoni; même ala so, fade Mbi ga na ala na Hoto ti Mbi ti nzoni-kue, na fade Mbi sala si ala wara ngia na yâ da ti sambela ti Mbi; fade Mbi kamata offrande ti ala so azo-na-wa, na sadaka ti ala, na ndo balaga ti Mbi; teti fade ala di iri ti da ti Mbi da ti sambela teti azo kue.”​—Esaïe 56:6, 7.

12. Tongana nyen a gbu la ni nda ti prophétie ti Jésus na ndo “ambeni ngasangbaga”?

¹² Na ngoi ti e, “awande” aba gigi yeke yeke. Kozoni na kozo bira so amu sese kue, a bi bê so kota wungo ti azo so ayeke wara salut ahon wungo ti ala so ayeke na beku ti komande na yayu legeoko na Jésus, azo so e hinga ala laso tongana Israël ti Nzapa. Awamandango Bible ahinga la ni atene ti Jésus so a fa ni na Jean 10:16: “Mbi yeke na ambeni ngasangbaga nga, so ayeke ti yangbo so pepe. A yeke ngbanga ti Mbi ti ga na ala nga, na fade ala mä yanga ti Mbi; fade kundu ayeke oko, na Berger ayeke oko.” A hinga la ni “ambeni ngasangbaga” so tongana bungbi ti azo so ayeke na beku ti ngbâ na sese. Me mingi ti awamandango Bible abi bê so ambeni ngasangbaga ni ayeke ba gigi ande na ngoi ti Komandema ti Ngu Saki Oko ti Jésus Christ.

13. Ngbanga ti nyen a fa la ni so a lingbi angasangbaga ti Matthieu chapitre 25 aba gigi na ngoi ti hunzingo ti aye ti fadeso?

¹³ Na nda ni, a wara gbungo nda ti ye nzoni ahon na ndo mbeni versê so ague legeoko na ni, so a sala tene ti angasangbaga. Na Matthieu chapitre 25, a sala tene ti toli ti Jésus ti angasangbaga na angasa. Na lege ti toli so, angasangbaga awara fini ti lakue lakue teti ala mu maboko na aita ti Jésus. Tongaso, ala yeke mbeni bungbi so ayeke nde na aita ti Christ so a sa yingo na ndo ti ala. Na ngu 1923, na ngoi ti mbeni kota bungbi na Los Angeles, Californie, Amérika, a fa polele so angasangbaga so ayeke ba gigi, pepe na ngoi ti Komandema ti Ngu Saki Oko, me na ngoi ti hunzingo ti aye ti fadeso. Ngbanga ti nyen? Ngbanga ti so Jésus amu toli ni tongana mbeni mbage ti kiringo tene ti lo na hundango tene: “Fade ye so aga lawa na fade fä ti singo ti mo, na hunzingo ti aye ti sese so, ayeke nyen?”​—Matthieu 24:3, NW.

14, 15. Tongana nyen gbungo nda ti dutingo ti ambeni ngasangbaga aga nzoni ahon na lâ ti nda ni?

¹⁴ Na yâ ti angoi so ato nda ni na ngu 1920, ambeni zo so abungbi la ni na aWamandango Bible aga ti ba na nda ni so yingo ti Jéhovah ayeke sala pepe tene ti témoin na ala so ayeke na hiringo ndo ti yayu. Ye oko, ala yeke awakua so ayeke na wâ, ti Nzapa ti Nduzu Ahon Kue. Na ngu 1931, a gbu nzoni ahon nda ti dutingo ti azo so tongana a sigigi na buku Justification. Tongana mbeni mbage ti lisoro versê na versê ti buku ti Ezékiel so ayeke na yâ Bible, Justification afa nda ti ye so a ba tongana suma ti “zo” so ayeke na encre ti wasungo ye. (Ezéchiel 9:1-11) A ba “zo” so na guengo na yâ Jérusalem nga na ziango marque na ndole ti azo so abima na atoto na ndo asioni so a yeke sala dä. “Zo” ni aduti fä ti aita ti Jésus, tanga ti aChrétien so a sa yingo na ndo ti ala, so ade na fini na ndo sese na ngoi ti fango ngbanga na ndo Jérusalem ti laso, so ayeke fä ti Chrétienté. Azo so a zia marque na ndo ala ayeke ambeni ngasangbaga so ayeke na fini na ngoi ni so. Na yâ ye so a ba tongana suma, a bata ala nde tongana awasalango ye alingbi na fango ngbanga ti Jéhovah aga ti futa kula na ndo gbata so ake tene ti mabe.

¹⁵ Na ngu 1932, mbeni nzoni gbungo nda ti drame ti prophétie ti Gbia Yéhou na Yehonadab, mbeni zo so ayeke Juif pepe so amu maboko na Yéhou, afa tongana nyen ambeni ngasangbaga amu maboko na aita ti Christ so a sa yingo na ndo ti ala, legeoko tongana ti so Yehonadab ague legeoko na Yéhou nga lo mu maboko na lo na yâ futingo vorongo Baal. Na nda ni, na ngu 1935, a hinga ambeni ngasangbaga so ayeke na fini na ngoi ti hunzingo ti aye ti fadeso tongana azo mingi so asi singo, so bazengele Jean aba na yâ ye so a ba tongana suma. A fa nda ti ye so ti fani oko ni na kota bungbi so a sala tene ni na tongo nda ni, na Washington D.C., tongana Joseph F. Rutherford afa azo so ayeke na beku ti duti na sese tongana “azo mingi so asi singo.”

16. Amatabisi na akungba wa “awande” ayeke na ni?

¹⁶ Na lege so, a ba yeke yeke so “awande” ayeke na mbeni kota kusala na yâ aye so Jéhovah aleke ti sala na ngoi ti lâ ti nda ni so. Ala ga na Israël ti Nzapa ti voro Jéhovah. (Zacharie 8:23) Legeoko na mara ti yingo so, ala mu asadaka so anzere na Nzapa na ala lï na yâ sabbat ti hungo tele. (aHébreu 13:15, 16) Nga, ala yeke voro na yâ temple ti Nzapa ti yingo, so, legeoko tongana temple na Jérusalem, ayeke “da ti sambela teti amara kue.” (Marc 11:17) Ala fa na gigi mabe na yâ sadaka ti kota ngele ti Jésus Christ, na ‘sukulango bongo ti ala nga na salango si bongo ti ala avulu na lege ti mênë ti Molenge Ti Ngasangbaga.’ Na ala yeke sala na Jéhovah lakue, “ala sala na lo kusala ti nzoni-kue lâ na bï.”​—Apocalypse 7:14, 15, NW.

17. Tongana nyen awande ti laso abata fini mbele?

¹⁷ Awande ti laso abata fini mbele na lege so ala bungbi legeoko na Israël ti Nzapa, ala wara aye ti nzoni nga adeba nzoni so aga ndali ti fini mbele ni. Atä so ala yeke mu mbage pepe na yâ fini mbele so, ala yeda na bê ti ala kue na andia so ague legeoko na ni. Tongaso, ndia ti Jéhovah ayeke na yâ bê ti ala, nga na nda ni ala hinga Jéhovah tongana Babâ ti ala ti yayu na Gbia ti kota ahon kue.​—Jérémie 31:33, 34; Matthieu 6:9; Jean 17:3.

18. Kusala wa ti bungbingo zo ayeke tambela na ngoi ti lâ ti nda ni?

¹⁸ Prophétie ti Isaïe angbâ ti gue: “Seigneur L’Eternel, Lo so abungbi azo ti Israël so azo atomba ala giriri, Lo tene, Fade Mbi bungbi ambeni zo na tele ti ala so a bungbi ala awe.” (Esaïe 56:8) Na ngoi ti lâ ti nda ni, Jéhovah abungbi awe “azo ti Israël so azo atomba ala giriri,” tanga ti ala so a sa yingo na ndo ti ala. Na ndo ni, lo yeke bungbi ambeni zo nde nga, azo mingi so asi singo. Na ndo oko, ala voro na yâ siriri nga na beoko na gbe ti fango lege ti Jéhovah na ti Gbia so lo zia na ndo mbata, Christ Jésus. Ndali ti be-biani ti ala na mbage ti ngorogbia ti Jéhovah so Jésus ayeke na li ni, Nzo Berger ni abungbi ala oko na yâ kundu so ayeke beoko nga na ngia.

Asinziri so Ayeke Awaziba, Ambo so Adekongo Pepe

19. Tisango ndo wa a mu na anyama ti ngonda na ti benyama?

¹⁹ Na peko ti apendere tene so akpengba zo, so a hon ge, mbeni ye nde so apika lê, so a lingbi ti tene a yeke sioni, aga. Jéhovah ayeke ndulu ti sala ye na be-nzoni na mbage ti awande na a-eunuque. Me a bi tene na li ti azo mingi so atene ala yeke ti kongrégation ti Nzapa, na ngbanga ayeke ku ala. A hon so, ala lingbi même pepe ti tene a lu kuâ ti ala na lege ni na ala lingbi gi ti tene asioni nyama ti ngonda ate ala. Na lege so, e diko: “I anyama kue ti benyama, na i anyama kue ti ngonda, i ga, i te!” (Esaïe 56:9) Anyama ti ngonda so ayeke sala ande matanga na ndo ti nyen? Fade prophétie ni afa nda ni. Na salango tongaso, a lingbi ti dabe e na ye so ayeke ku azo so ake Nzapa na ngoi ti bira ti Har–Maguédôn so ayeke ga, so a zia kuâ ti ala na andeke ti yayu ti te ni.​—Apocalypse 19:17, 18.

20, 21. Awokongo wa asala si amokonzi ti lege ti vorongo aga awafango lege so ayeke ye senge?

²⁰ Prophétie ni angbâ ti tene: “Asinziri ti Israël ayeke awaziba, ala kue ahinga ye oko pepe; ala kue ayeke ambo ti buburu so alingbi dekongo pepe; ala ba suma, ala lango na sese, ala ndoye lango. Biani, ambo ni so ayeke na nzala mingi, ala wara kobe alingbi na ala pepe; ala yeke aberger so ahinga nda ti ye pepe; ala kue ague na lege ti ala mveni, ala oko oko kue agi ye ti ala mveni, ala kue asala tongaso. Ala tene, I ga, zia e ga na vin, na fade e nyon samba juska yâ ti e asi; na fade e sala tongaso kekereke nga, même a hon so.”​—Esaïe 56:10-12.

²¹ Amokonzi ti lege ti vorongo ti Juda atene ala voro Jéhovah. Ala tene ala yeke “asinziri” ti Lo. Me na lege ti yingo ala yeke awaziba, ala dekongo pepe, na ala yeke lango. Tongana ala lingbi pepe ti bata na ti fa tene ti sioni so ayeke ga, ye ti nzoni wa ala ga na ni? Mara ti asinziri ti lege ti vorongo tongaso agbu nda ti ye oko pepe, na ala lingbi oko pepe ti mu fango lege ti yingo na azo so ayeke tongana angasangbaga. Na ndo ni, lege ti ala ayeke kirikiri. A lingbi pepe ti kaï anzala ti mitele so ala yeke na ni. A hon ti mu peko ti fango lege ti Jéhovah, ala gi lege ti ala mveni, ala tomba peko ti faïda ti kirikiri, ala nyon ngangu samba ahon ndo ni, na ala wa ambeni zo nde ti sala tongaso. Teti ala bi bê oko pepe na ngbanga ti Nzapa so ayeke ga, ala yeke tene na azo so fade ye kue ayeke tambela nzoni.

22. Tongana nyen amokonzi ti lege ti vorongo ti ngoi ti Jésus ayeke tongana ala ti Juda ti giriri?

²² Kozoni na yâ prophétie ti lo, Isaïe asala kusala na mara ti tapande so ti fa amokonzi ti lege ti vorongo ti Juda so ayeke be-ta-zo pepe, so na lege ti yingo samba asala ala, ala yeke lango, na ala gbu nda ti ye pepe. Ala zia nengo kungba ti angobo ti salango ye ti azo na ndo go ti azo ni, ala fa tene ti mvene ti lege ti vorongo, na ala zia bê kue na Assyrie ti mu maboko na ala, a hon ti bi lê na mbage ti Nzapa. (2 aGbia 16:5-9; Esaïe 29:1, 9-14) A yeke polele so ala manda ye oko pepe. Mawa ni ayeke so, mara ti amokonzi tongaso ayeke dä la ni na kozo siècle. A hon ti tene ala yeda na nzo tene so Molenge ti Nzapa mveni aga na ni na ala, ala ke Jésus na ala gbe lingo ti sala si a fâ lo. Jésus ahiri ala polele “awaziba so aye ti fa lege na azo,” na lo kiri lo tene so tongana “waziba afa lege na waziba, fade ala use kue atï na yâ dû.”​—Matthieu 15:14, NW.

Asinziri ti Laso

23. Prophétie wa ti Pierre na ndo amokonzi ti lege ti vorongo aga tâ tene awe?

²³ Bazengele Pierre agboto mê so awafango ye ti wataka ayeke londo nga ti handa aChrétien. Lo sû na mbeti: “Aprophète ti wataka aduti nga la ni na popo ti azo ni [ti Israël], legeoko tongana ti so fade awafango ye ti wataka ayeke duti na popo ti i. Fade azo so ayeke sigigi na asioni secte na lege ti mayele na fade ala ke même mveni ti ala so avo ala, na salango si futingo aga hio na ndo ala mveni.” (2 Pierre 2:1, NW) Ye wa aga na peko ti afango ye ti wataka nga na peko ti asecte so mara ti awafango ye ti wataka tongaso aga na ni? Chrétienté, so amokonzi ni laso ayeke sambela ti wara deba nzoni ti Nzapa na ndo akamarade ti ala ti lege ti poroso, nga so na pekoni amu zendo ti pendere gigi ti kekereke. Amokonzi ti lege ti vorongo ti Chrétienté afa so ala yeke awaziba, azo so adekongo pepe, na ayeke lango na ndo aye ti yingo.

24. Beoko wa ayeke na popo ti Israël ti yingo na awande?

²⁴ Ye oko, Jéhovah ayeke ga na awande kutu mingi ti voro lo legeoko na tanga ti azo ti Israël ti Nzapa na yâ kota da ti lo ti sambela na lege ti yingo. Awande so, atä so ala londo na amara, akete mara, na ayanga mingi, ayeke beoko na popo ti ala nga beoko na Israël ti Nzapa. Ala hinga na bê kue so salut alingbi ti londo gi na Jéhovah Nzapa na lege ti Jésus Christ. Teti ndoye ti Jéhovah apusu ala ti sala ye, ala bungbi oko na aita ti Christ so a sa yingo na ndo ti ala na yâ fango na gigi mabe ti ala. Na bê ti ala adë mingi ndali ti atene so bazengele ni asû na gbe ti yingo: “Tongana mo tene na gigi na yanga ti mo so Jésus ayeke Seigneur, na tongana mo mä na bê ti mo so Nzapa ayä Lo na popo ti awakinda, fade mo wara salut.”​—aRomain 10:9.

[Akete tene na gbe ni]

[Foto na lembeti 250]

Sabbat ayeke mu lege ti sambela, ti manda ye, na ti gbu li

[Afoto na lembeti 256]

A fa polele nda ti dutingo ti ambeni ngasangbaga na mbeni kota bungbi na Washington, D.C., na ngu 1935 (foto ti batême na gbe ni, mbeti-kapa na koti)

[Foto na lembeti 259]

A tisa anyama ti ngonda ti ga na matanga

[Afoto na lembeti 261]

Awande na Israël ti Nzapa ayeke beoko na popo ti ala