Salango tënë na lege ti alettre

ALETTRE asala si fini nga na salango ye ti azo kutu mingi aga nzoni ahon ti kozo. Mingi ti abuku ti Mbeti ti Nzapa so aChrétien asû na yanga ti Grec ayeke lani alettre na tongo nda ni. Laso, e lingbi ti sû alettre ti kpengba afini wamabe, ti ngbâ ti bata songo na akamarade, ti kpengba aita-koli na aita-wali so ato nda ti yô ambeni kungba so ayeke nde, ti mû ngangu na ala so ayeke na gbele akpale nga ti mû asango so a hunda ti duti na ni teti akusala ti kongregation.​—1 aThes. 1:1-7; 5:27; 2 Pi. 3:1, 2.

Sungo lettre ayeke nga mbeni nzoni lege ti fa na tënë. Na ambeni ndo, a lingbi ti duti ngangu na e ti fa tënë na yâ ambeni kete kodoro nga ambeni ndo so a kanga lege na azo ti gue dä kirikiri. Mingi ni, ambeni zo ayeke na yanga-da ti ala pëpe, na tongaso e yeke wara ala pëpe tongana e yeke fa tënë da na da. Ti ambeni zo ni, ala lango na ando so ayo mingi.

Kobela, ngu-nzapa wala couvre-feu alingbi na mbeni ngoi ti sala si e ngbâ gi na da. Mo lingbi ti sû lettre ti kiri ti fa tënë na mbeni sewa wala na mbeni zo so mo fa lani tënë na lo na lege kue so azi? Mbeni oko ti azo so mo manda Bible na ala ague na mbeni ndo nde? Peut-être lettre ti mo ayeke mbeni ye so lo yeke na bezoin ni ti ngbâ ti bata nzara ti lo teti aye ti yingo. Wala peut-être mo lingbi ti fa mbeni tënë ti Bible, so alingbi, na azo so asala mariage, adû molenge wala so mbeni sewa ti ala so ala ndoye mingi akui ade ti ninga pëpe.

Fango tënë na lege ti lettre

Tongana mo yeke sû mbeti ti fa tënë na mbeni zo so mo tingbi na lo lâ oko pëpe, fa tele ti mo kozoni. Mo lingbi ti fa so mo yeke mû mbage ti mo na mbeni kusala so azo na yâ akodoro nde nde ayeke sala na bê ti ala mveni. Tongana a lingbi ti sala tongaso, fa so mo yeke mbeni Témoin ti Jéhovah. Fa na zo ni ngbanga ti nyen mo yeke sû mbeti na lo ahon ti gue ti bâ lo mo mveni. Sû mbeti ni mo bâ mo tene mo yeke sala tënë na zo ni lê na lê. Ye oko, ti sala ye alingbi na wango ti ‘duti na ndara tongana angbo, na ti duti na be-sioni-pepe tongana abungu’, gbu li nzoni na ndo wungo ti asango so a lingbi mo fa na ndo mo mveni.​—Mat. 10:16.

Zia na yâ lettre ni ye so mo yeke tene na zo ni tongana mo lingbi fade ti tingbi na lo lê na lê. Mo lingbi ti sala kusala na akozo tënë ti buku Lege ti To Nda na ti Ngbâ ti Sala Lisoro, wala mbeni fango ye so mo mû na yâ mbeni ndangba Kusala ti Royaume. Mo lingbi ti hunda mbeni tënë, na ti wa zo ni ti gbu li dä. Ambeni wafango tënë afa gi so e yeke na mbeni programme ti kiringo tënë na ahundango tënë ti Bible so e yeke sala ni senge senge; na pekoni, ala yeke fa ali ti achapitre ti mbeni oko ti abuku ti e ti manda na ye. Mbeni tapande ti lettre so a sû ti fa na tënë ayeke na lembeti 73. A lingbi ti fa na mo tongana nyen ti sala atënë ti mo, me a yeke nzoni ti gbian yâ ti tënë ni, tongaso pëpe azo alingbi ti wara na mbeni ngoi gi oko lettre fani mingi.

Ambeni zo aye pëpe ti diko mbeni yongoro lettre so alondo na mbeni wande. Tongaso, a yeke peut-être lege ti ndara ti sala lettre ti mo ni ndulu. Hunzi lettre ti mo kozoni ti tene zo ni anze ti diko ni. A lingbi ti duti na lege ni ti zia na yâ ni mbeni mbeti ti tisango zo na abungbi na Da ti Royaume. Mo lingbi ti zia na yâ ni tract, brochure, Tour ti Ba Ndo wala Réveillez-vous! na fa na lo so lo lingbi ti wara ambeti so lakue tongana lo ye. Peut-être mo lingbi ti hunda na lo wala mo lingbi ti gue ti bâ lo na da ti lo ti sala ambeni tënë na ndo ye so mo fa na lo.

Ndulu tënë na ndo kode ti salango ni

Bâ fadeso tapande ti lettre ni. Bâ aye so: (1) Zo ni asû ni pendere na lo leke atënë ti yâ ni na peko ti tele nzoni. (2) Même tongana lo tokua mbeti ni na adresse ti mbeni zo nde, zo so awara ni ayeke ande lakue na iri nga na adresse ti zo so atokua ni. (3) Lo fa polele gi na kozo paragraphe ni nda ni so lo sû lettre ni. (4) Lo fa ngbongboro tënë oko na yâ ti paragraphe oko. (5) A lingbi na ye so lo tokua lettre ni ndali ni, tënë ti yâ ni ane zo nga lo fa ni pëpe na kota kode.

Na yâ ti mbeni lettre so a tokua na mbeni kota ndo, na tapande lettre so mbeni secrétaire atokua na filiale, a yeke zia iri ti kongregation ni dä, legeoko na iri ti secrétaire ni, adresse ti lo nga na lango ni. A lingbi a zia nga na ndo ni iri na adresse ti zo wala bungbi so ayeke wara ande lettre ni. Balao aga na pekoni. Ti hunzi lettre ni, a yeke zia atënë tongana “mbi zia ala awe” wala “ala ngbâ nzoni” kozoni si a sû maboko na gbe ti mbeti ni.

Na yâ lettre oko oko kue, sala kue ti sû agere ti mbeti ni na lege ni, ti kpe andia ti yanga ti kodoro ni na ndo kode ti sungo agere ti mbeti, ti kangbi popo ti atënë ni na lege ni nga ti sû ni pendere. Salango tongaso ayeke sala si zo ane lettre ti mo nga na tënë so ayeke na yâ ni.

Na ndo ti enveloppe ni, a yeke nzoni ti zia lakue mbeni adresse so a lingbi ti kiri na lettre ni dä tongana mbeni ye asi. A yeke nzoni a duti adresse ti mo mveni. Ye oko, tongana mo bâ so a yeke lege ti ndara pëpe ti zia adresse ti mo mveni tongana mo yeke fa tënë na awande, hunda na a-ancien ti bâ wala ala yeda ti tene mo zia adresse ti Da ti Royaume ti mo. A lingbi a sala kusala lâ oko pëpe na adresse ti filiale ndali ti ye so, teti salango tongaso alingbi ti fa so a yeke filiale si atokua mbeti ti mo ni, na aye alingbi ti ga kirikiri. Tongana mo zia na ndo ni pëpe adresse ti tene a kiri na lettre ni dä, nga tongana mbeti ti e ayeke na yâ ni, ye so alingbi nga ti fa so filiale si atokua lettre ni.

Gi ti hinga so ngele ti timbre so mo zia na ndo ni alingbi, mbilimbili tongana mo zia mbeti ti e na yâ ni. Dabe mo so na yâ mingi ti akodoro, tongana a zia mbeni brochure wala périodique na yâ enveloppe, ngele ti timbre ni ayeke hon ngele ti so ayeke ti senge lettre.

Tënë ti yâ ni

Tongana mo hunzi ti sala lettre ti mo ni awe, diko ni ti bâ tënë ti yâ ni. A yeke tongana nyen? Mo sala atënë ti mo na nzobe nga na kode? Ndoye nga na nzobe ayeke na popo ti aye so a lingbi e sala ngangu ti fa ni na gigi na yâ asalango ye ti e na azo (aGal. 5:22, 23). Tongana mo bâ mbeni ye na yâ ni so aye ti duti sioni wala afa so mo bâ ndo na nzoni lê pëpe, leke yâ ni si tënë ni aga nzoni.

Lettre alingbi ti gue na ndo so mo lingbi ti gue dä pëpe. Gi ye so oko asala si a yeke mbeni kpengba gbakuru ti kusala na fango tënë. Teti so lettre ti mo asala tënë na place ti mo nga ayeke fa aye so mo bâ na nene ni, gbu li nzoni na ndo ye so lo tene, tongana nyen mo fa ni nga tënë ti yâ ni ayeke tongana nyen. A lingbi ti duti gi ye so mbeni zo so ayeke na ngele mingi na lê ti Jéhovah ahunda ti to nda ti mû lege ti fini, wala ti kpengba lo na ti wa lo na ndo lege ni.