Mbilimbili lutingo na ndo akota tënë ti aversê

TONGANA mo yeke sala tënë na azo na ndo aye so Nzapa aleke ti sala, atâa gi mo na azo ni wala na ndo ti estrade, a lingbi tënë ti mo aluti na ndo ye so ayeke na yâ Tënë ti Nzapa. Mingi ni, ye so andu dikongo aversê ti Bible so a lingbi zo adiko ni nzoni.

Mbilimbili lutingo na ndo akota tënë ahunda ti fa atënë ti bê. A lingbi mo zia atënë so a londo na bê na yâ dikongo aversê ti mo. Bâ atapande so. Tongana mo yeke diko Psaume 37:11 na kota go, a lingbi go ti mo afa so mo yeke ku kungo na ngia ti wara siriri so a mû zendo ni na yâ ni. Tongana mo yeke diko Apocalypse 21:4 na ndo tënë ti hunzingo ti pasi na kui, a lingbi go ti mo afa na gigi kota singila so mo yeke na ni ndali ti zingo vundu so ayeke tâ pendere ye, so a sala tënë ni. A lingbi mo diko Apocalypse 18:2, 4, 5 na mbeni go so afa atene a lingbi zo asala ye hio. Versê so ahunda na azo ti sigigi na yâ ti “Kota Babylone”, so asiokpari ahon ndo ti lo. Biani, a lingbi mo diko ye ni na atënë so alondo na bê, me sala ye ahon ndo ni pëpe. Versê so mo yeke diko nga lege so mo yeke sala kusala na ni si ayeke mû maboko ti hinga tongana nyen ti fa atënë ti bê alingbi na ni.

Luti na ndo ambilimbili tënë ni. Tongana atënë so mo yeke tene na ndo mbeni versê angoro na ndo ti mbeni mbage ni, a lingbi mo gboto lê ti azo na ndo mbage so na ngoi ti dikongo versê ni. Na tapande, tongana mo yeke diko Matthieu 6:33, mo yeke luti pëpe na ndo tënë “mbilimbili ti Lo” wala “ye so kue” tongana mo ye ti fa ye so ti ‘gi royaume kozoni’ aye ti tene.

Na yâ ti mbeni diskur ti Bungbi ti Kusala, mo lingbi ti leke ti diko Matthieu 28:19. A lingbi mo gboto lê na ndo atënë wa? Tongana mo ye ti wa azo ni ti sala kue ti to nda ti manda Bible na azo, luti na ndo tënë “si ala ga adisciple”. Na mbeni mbage nde, tongana mo ye ti sala tënë na ndo kungba ti aChrétien ti fa tâ tënë na azo ti ambeni kodoro wande so ayeke na yâ ti territoire ti ala, wala mo ye ti wa ambeni wafango tënë ti sala kua na ndo so a hunda awakua mingi, mo lingbi ti luti na ndo “amara kue”.

Mingi ni, a yeke diko mbeni versê ti kiri tënë na mbeni hundango tënë wala ti mû ngangu na mbeni fango nda ti tënë so ambeni zo nde ayeda na ni pëpe. Tongana mo luti na ndo tënë oko oko tongana atanga ni kue, azo ni alingbi ti bâ pëpe kamba so ayeke na popo ti versê ni na hundango tënë ni. A lingbi ti duti polele na lê ti mo, me pëpe na lê ti ala.

Na tapande, tongana mo yeke diko Ezéchiel 18:4, tongana mo gboto lê kue na ndo tënë “so asala siokpari,” zo ti lisoro ti mo alingbi pëpe ti gbu nda ti ye so aye ti kpa ye so ayeke polele, so âme ayeke kui. A lingbi mo luti na ndo atënë “âme . . . a kui.” Ye oko, tongana mo yeke sala kusala na versê so ti fa ngbanga ti nyen zo ayeke kui, a lingbi mo gboto lê na ndo tënë “so asala siokpari”. Legeoko nga, tongana mo yeke sala kusala na Jacques 2:24 ti fa nene ti sala si mabe ague oko na kusala, tongana mo luti mingi na ndo “A diko zo zo ti mbilimbili” ahon ti luti na ndo “kusala,” mo lingbi ti sala si azo so ayeke mä mo ahon yongoro na tele ti tënë ni.

A lingbi ti wara mbeni nzoni tapande tongaso na aRomain 15:7-13. So ayeke mbeni mbage ti mbeti so bazengele Paul ato na mbeni kongregation so aGentil na azo so a dü ala Juif ayeke na yâ ni. Ge, bazengele ni atene so kusala ti Christ aga na aye ti nzoni, pëpe gi na aJuif so afâ ganza, me nga na azo ti amara si ala mû “gloire na Nzapa teti be-nzoni ti Lo”. Na pekoni, Paul afa peko ti aversê osio, na lo gboto lê na ndo lege so azi na amara. Tongana nyen a lingbi mo diko aversê so Paul afa pekoni ti gboto lê na ndo tënë so ayeke na yâ ti li ti lo? Tongana mo ye ti luti na ndo atënë, a lingbi mo gboto lê na ndo “amara” na versê 9, “Amara” na versê 10, “ALA amara kue” nga na “azo ni kue” na versê 11 nga “amara” na versê 12. Tara ti sala legeoko tongaso nga na dikongo aRomain 15:7-13. Na ngoi so mo yeke sala ni, fango nda ti tënë ti Paul ayeke sigigi ande polele na a yeke ngangu pëpe ti gbu nda ni ahon ti kozo.

Akode ti lutingo na ndo atënë. Alege nde nde ayeke dä ti luti na ndo akota tënë ti aversê so afa abibe na gigi. A lingbi kode so mo yeke sala kusala ague oko na versê ni nga na ye so devoir ni ayeke sala tënë na ndo ni. E yeke fa ambeni wango ge.

Yango go na nduzu wala kiringo na ni na gbe ni. Ye so andu gbiango totongo ti go kue so asala si atënë so ayeke fa abibe ni asigigi polele ahon atanga ni kue. Zo alingbi ti sala tongaso na yango go na nduzu wala na kiringo na ni na gbe ni. Na yâ ti ayanga ti kodoro mingi, salango tongaso ayeke gboto lê na ndo akota tënë. Me na yâ ti ambeni yanga ti kodoro, ye so alingbi ti gbian nda ti atënë ni kue. Tongana zo asala tënë yeke na ndo ti akota tënë, ye so ayeke sala si ala ne. Na yâ ti ayanga ti kodoro so lege ayeke dä pëpe ti yä go ti lo na nduzu wala ti kiri ni na gbe ni ti gboto lê na ndo ambeni tënë, a yeke duti ande nzoni ti sala ye kue so azo ayeke sala na ayanga ti kodoro tongaso ti wara aye ti pekoni.

Lutingo kete. Mo lingbi ti sala ye so kozo wala na pekoni so a diko mbeni kota mbage ti versê ni, wala mo lingbi ti sala kusala na akode ni use kue na oko ngoi. Tongana mo luti kete tâ gi kozo ti diko mbeni kota mbage ti mbeni versê, ye so ayeke zingo nzara ti azo ni; tongana mo sala ni na pekoni, a yeke sala ngangu mingi na ndo azo ni. Me tongana mo luti kete fani mingi, ye oko ayeke sigigi polele pëpe.

Kiringo na ndo ti tënë. Mo lingbi ti luti na ndo ti mbeni mbilimbili tënë na salango ye so: mo hunzi dikongo versê ni kue pëpe na mo kiri na ndo mbeni tënë wala bungbi ti atënë ni. Me kode so mingi ni azo aye ayeke ti hunzi versê ni kue awe na ti kiri na ndo ti mbeni kota tënë.

Salango maboko. Mingi ni, salango maboko nga na lê alingbi ti sala si mbeni tënë wala bungbi ti atënë akiri andu bê.

Totongo ti go. Na yâ ti ambeni yanga ti kodoro, ngoi na ngoi a lingbi ti sala si, na dikongo ye, go ti zo atoto na mbeni lege so asala ngangu na ndo nda ti atënë ni na a zia ala nde. Ge nga, a lingbi a sala ye na ndara, mbilimbili tongana a yeke diko ye na mbeni lege so afa hengo ndo.

Tongana ambeni zo si ayeke diko aversê ni. Tongana zo ti lisoro ni si ayeke diko mbeni versê, lo lingbi ti luti pëpe na ndo mbilimbili tënë ni wala lo luti na ndo ye oko pëpe. Tongaso, a lingbi mo sala nyen? Mingi ni, a yeke nzoni ti sala si nda ti tënë ni asigigi polele na fango tongana nyen aversê ni alingbi na tënë so mo yeke fa. Tongana mo sala tongaso awe, mo lingbi ti gboto lê mbilimbili na ndo atënë so afa abibe so ayeke na yâ ti Bible.