Chapitre Bale-oko na Osio
Jéhovah ayeke fa lege na bungbi ti lo tongana nyen?
1. Bible afa nyen na ndo bungbi ti Jéhovah, na ngbanga ti nyen a yeke kota ye mingi teti e?
NZAPA ayeke na mbeni bungbi? Bible atene na e so lo yeke na ni biani. Na yâ Tënë ti lo, lo fa na e mbeni kete mbage ti kpengba bungbi ti lo so ayeke na yayu (Ezéchiel 1:1, 4-14; Daniel 7:9, 10, 13, 14). Atâa so e lingbi pëpe ti bâ mbage ni so ayeke na yayu, a yeke sala ngangu laso mingi na ndo atâ wavorongo (2 aGbia 6:15-17). Mbeni mbage ti bungbi ti Jéhovah so lê abâ ayeke nga dä, ge na sese. Bible amû maboko na e ti hinga ni nzoni, nga tongana nyen si Jéhovah ayeke fa lege na ni.
Hingango mbage ni so lê abâ
2. Nzapa aleke lani mbeni fini kongregation wa?
2 Teti angu 1 545, mara ti Israël ayeke lani kongregation ti Nzapa (Kusala 7:38). Me Israël abata pëpe andia ti Nzapa, na lo ke Molenge ti Nzapa mveni. Ye ti pekoni ayeke so, Jéhovah ake kongregation so, na lo zia ni. Jésus atene lani na aJuif: ‘Bâ, a zia da ti i na i awe!’ (Matthieu 23:38). Na pekoni Nzapa aleke mbeni fini kongregation, so lo te mbeni fini mbele na lo. A lingbi lani azo 144 000, so Nzapa asoro ala ti duti oko na Molenge ti lo na yayu, si aduti na yâ kongregation so.—Apocalypse 14:1-4.
3. Ye nyen, so asi na Pentecôte ti ngu 33 N.E. afa polele so Nzapa ayeke sala fadeso kusala na mbeni fini kongregation?
3 A sa yingo vulu ti Jéhovah na ndo akozo zo ti fini kongregation so na Pentecôte ti ngu 33 N.E. Na ndo tënë ti kpengba ye so, e diko: “Tongana lâ ti Pentecôte aga awe, ala kue abungbi na ndo oko. Na fade fade toto tongana toto ti kota pupu so aya ngangu alondo na yayu azu, na toto ni alingbi na yâ da kue, na ndo so ala yeke duti dä. Na menga mingi, tongana menga-wa, asi na ala, na menga so akangbi na aduti na ndo ala oko oko kue. Na ala kue asi na Yingo Vulu, na ala komanse ti sala tënë na mbeni yanga nde nde, tongana Yingo amû ngangu na ala ti sala tënë.” (Kusala 2:1-4). Tongaso, yingo ti Nzapa afa polele so Lo, Nzapa mveni, ayeke sala kusala na bungbi ti azo so, so ayeke na gbe ti fango lege ti Jésus so aduti na yayu, ti sala ye so bê ti lo aye.
4. Azo wa laso ayeke na yâ bungbi ti Jéhovah so lê abâ?
4 Laso, gi mbeni tanga ti azo 144 000 si angbâ na ndo sese. Me na yâ gango tâ tënë ti prophétie ti Bible, a ga na “azo mingi so asi singo” ti “ambeni ngasangbaga” kutu mingi, ti bungbi ala oko na tanga ni so a sa yingo na ndo ala. Jésus, Nzo Berger, abungbi ambeni ngasangbaga so na tanga ni so angbâ, si ala kue aga gi kundu oko na gbe ti lo tongana oko Berger ti ala (Apocalypse 7:9; Jean 10:11, 16). Ala kue abungbi ti ga kongregation oko so ayeke na beoko, bungbi ti Jéhovah so lê abâ.
Bungbi so Nzapa afa lege na ni
5. Zo wa ayeke fa lege na bungbi ti Nzapa, na tongana nyen?
5 Tënë ti Bible ‘kongregation ti Nzapa so ayeke na fini’ afa polele zo wa si ayeke fa lege na ni. A yeke Nzapa si ayeke fa lege na ni. Na lege ti Jésus, so lo hiri lo na kusala ti duti Beli so lê abâ pëpe, na ndo ti kongregation, nga na lege ti Tënë ti Lo mveni, Bible so a sû na gbe ti yingo, Jéhovah ayeke fa lege na azo ti lo.—1 Timothée 3:14, 15; aEphésien 1:22, 23; 2 Timothée 3:16, 17.
6. (a) Na lege wa a sigigi polele so yayu ayeke fa lege na kongregation na kozo siècle? (b) Ye nyen afa so Jésus angbâ lakue Beli ti kongregation?
6 Fango lege tongaso asigigi polele na Pentecôte (Kusala 2:14-18, 32, 33). A sigigi lani polele na ngoi so ange ti Jéhovah afa lege na fango nzo tënë ti si na Afrika, tongana lego ti Jésus akomande ti tene Saul ti Tarse achangé lege ti lo, nga na ngoi so Pierre akomanse ti fa nzo tënë na popo ti aGentil (Kusala 8:26, 27; 9:3-7; 10:9-16, 19-22). Me tongana ngoi ayeke hon, a kiri amä mbeni pëpe alego so alondo na yayu, a kiri abâ a-ange mbeni pëpe, na a mû na azo mbeni pëpe matabisi ti yingo ti sala ye ti kpene. Me, Jésus amû zendo: “Bâ, Mbi yeke na i lakue, même juska na nda ti ngoi so.” (Matthieu 28:20; 1 aCorinthien 13:8). Laso, aTémoin ti Jéhovah ayeda na fango lege ti Jésus. Tongana fade Jésus ayeke fa lege pëpe, ka a lingbi pëpe ti fa nzo tënë ti Royaume na gbele ti asioni salango ngangu.
7. (a) Azo wa abungbi aga “ngbâa be-ta-zo na ti ndara”, na ngbanga ti nyen? (b) Kungba wa a mû na “ngbâa” ni?
7 Ngoi kete kozo si lo kui, Jésus asala tënë ti “ngbâa be-ta-zo na ti ndara” na adisciple ti lo. Lo tene so lo mveni, so ayeke Maître ni, ayeke mû ande mbeni kungba so ayeke nde na ngbâa so. “Ngbâa” ni ayeke duti ande dä awe na ngoi so Seigneur alondo ti gue na yayu, na fade ngbâa ni angbâ ti sala kusala na ngoi ti kiringo ti Christ na yâ ngangu ti Royaume, kiringo so lê abâ pëpe. A yeke ngangu ti tene ye so alingbi gi na mbeni zo oko, me a lingbi biani na kongregation ti Christ so a sa yingo na ndo ni. Jésus ahiri ni “ngbâa” ti lo, teti lo vo ni awe na mênë ti lo mveni. Lo mû na azo ti yâ ni kungba ti sala adisciple na ti mû kobe na ala yeke yeke, “ti mû na ala kobe ti ala [ti yingo] na tâ ngoi ni”.—Matthieu 24:45-47, NW; 28:19; Esaïe 43:10; Luc 12:42; 1 Pierre 4:10.
8. (a) Akungba wa bungbi ti ngbâa ni ayeke na ni fadeso? (b) Ngbanga ti nyen salango ye ti e na gbele ye so Jéhovah afa na lege ti bungbi so ayeke kota ye mingi?
8 Teti so bungbi ti ngbâa ni ayeke sala lani kusala ti Maître ti lo na be-biani na ngoi so Maître ni akiri na ngu 1914, kiringo so lê abâ pëpe, aye afa so a kiri amû na ngbâa ni kota kusala mingi na ngu 1919. A to nda ni na ngoi so, angu kue so aga na pekoni ayeke ngoi ti sala tënë ti témoin ti Royaume na ndo sese kue. A yeke bungbi awavorongo Jéhovah mingi so asi singo, ti tene ala sö kuâ na ngoi ti kota ye ti vundu (Matthieu 24:14, 21, 22; Apocalypse 7:9, 10). Ala so nga ayeke na bezoin ti kobe ti yingo, na a yeke bungbi ti ngbâa ni si ayeke mû kobe so na ala. Tongaso, ti nzere na Jéhovah, a lingbi e yeda na fango ye so lo yeke mû na lege ti bungbi so, na e sala ye alingbi na ni.
9, 10. (a) Na kozo siècle, a zia lani nyen na sese ti leke atënë so andu akota tënë ti mabe, na ti fa lege na kusala ti fango nzo tënë? (b) Laso, ye nyen a leke ti sala si akusala kue ti azo ti Jéhovah atambela na lege ni?
9 Ngoi na ngoi, ambeni hundango tënë abâ gigi, na ndo akota tënë ti mabe, nga na ndo kode ti tambelango ti aye. A yeke sala nyen? Kusala ti abazengele chapitre 15 afa na e tongana nyen si a leke lani mbeni kota tënë so andu aGentil so achangé lege ti ala. A gue na tënë ni na gbele abazengele nga na a-ancien na Jérusalem. Ala yeke sala lani kusala tongana wabatango bungbi. Akoli so alingbi nga lani ti girisa lege, me Nzapa asala kusala kamême na ala. Ala gi nda ti aversê so andu tënë ni, na ala bâ nga fä ti kusala so yingo ti Nzapa asala, na zingo lege na mbage ti aGentil. Na pekoni ala mû desizion. Nzapa adeba nzoni ye so ala leke (Kusala 15:1-29; 16:4, 5). Wabatango bungbi so ahiri ambeni zo na kusala, na atokua ala ti gue ti maï tënë ti Royaume.
10 Laso, a yeke aita-koli so a sa yingo na ndo ti ala, so alondo na akodoro nde nde si ayeke na yâ Wabatango Bungbi, ti bungbi ti Jéhovah so lê abâ. Ala kue ayeke place oko na kota ndokua ti aTémoin ti Jéhovah so abâ lege ti kusala na ndo sese kue. Na gbe ti fango lege ti Jésus Christ, Wabatango Bungbi ni ayeke maï vorongo so ayeke na sioni oko pëpe na yâ ti akodoro kue, na lekengo akusala ti fango tënë ti aTémoin ti Jéhovah na yâ ti akongregation ti ala saki mingi. Bango ndo ti azo so ayeke na yâ Wabatango Bungbi so ague oko na ti bazengele Paul, so atene na fon lo Timothée: “E komande mabe ti i pëpe, teti i yeke duti kpô na yâ mabe; me e yeke azo so asala na tele ti i si i wara ngia.”—2 aCorinthien 1:24.
11. (a) A yeke hiri a-ancien nga na aserviteur ti mungo maboko na kusala tongana nyen? (b) Ngbanga ti nyen a lingbi e sala kusala maboko na maboko biani na ala so a hiri ala na kusala?
11 Na ndo sese kue, aTémoin ti Jéhovah abi lê na mbage ti Wabatango Bungbi ti soro aita-koli so ayeke na kode mingi, so na pekoni, a mû na ala kungba ti hiri nga ambeni ita-koli nde ti sala kusala tongana ancien wala serviteur ti mungo maboko, ti bata akongregation. Na yâ Bible, a fa polele aye so a lingbi aita-koli ni asala kozo ti tene a hiri ala na kusala, na a yeda nga so ala yeke mbilimbili-kue pëpe, ala yeke girisa lege. A-ancien so ayeke fa ambeni ita so alingbi na kusala so, nga na ala so na nda ni ayeke hiri aita ni na kusala, ala kue ayeke na kota kungba mingi na gbele Nzapa (1 Timothée 3:1-10, 12, 13; Tite 1:5-9). Ni la, ala yeke sambela ti hunda maboko ti yingo ti Nzapa, na ala gi fango lege ti Nzapa na yâ Tënë ti lo (Kusala 6:2-4, 6; 14:23). Zia e fa bê ti kiri singila teti ‘azo so a mû ala tongana matabisi,’ so ayeke mû maboko na e kue ti tene e ‘ga oko na yâ mabe’.—aEphésien 4:8, 11-16.
12. Na yâ ti aye so lo leke na yâ bungbi ti lo, Jéhovah ayeke sala kusala na awali tongana nyen?
12 Mbeti ti Nzapa afa so a lingbi a duti akoli si abata kongregation. So akiri na awali na peko pëpe, teti so ambeni wali ayeke nga ahéritier ti Royaume ti yayu, na ala yeke sala kota kusala mingi na yâ fango tënë (Psaume 68:12). Nga, na yongo akungba ti ala ti sewa na lege ni, awali ayeke mû maboko ti tene kongregation aduti na nzoni iri mingi (Tite 2:3-5). Me a yeke gi akoli so a hiri ala ti fa ye si ayeke na kungba ti fa ye na yâ kongregation.—1 Timothée 2:12, 13.
13. (a) Bible awa a-ancien ti duti na bango ndo wa na mbage ti kungba ti ala? (b) E kue e lingbi ti mû mbage na yâ matabisi wa?
13 Na yâ sese so, tongana mbeni zo ayeke na kota ndo, a yeke bâ lo na nene ni mingi. Me na yâ bungbi ti Nzapa, lege ti sala ni ayeke so: “Zo so ayeke kete na popo ti i kue, lo so ayeke kota.” (Luc 9:46-48; 22:24-26). Mbeti ti Nzapa awa a-ancien ti duti na donzi si ala komande pëpe tongana mokonzi na ndo azo so ayeke ye ti héritier ti Nzapa. Nde na so, a lingbi ala duti tapande teti kundu ni (1 Pierre 5:2, 3). A yeke pëpe gi ambeni na popo ti ala, me a yeke aTémoin ti Jéhovah kue, koli na wali, si ayeke na matabisi ti sala kusala na iri ti Kota Gbia ti ndagigi kue, ti sala tënë na iri ti lo na be-ti-molenge, nga ti fa tënë ti Royaume ti lo na azo na ndo kue.
14. Na lege ti aversê so, sala lisoro na ndo ahundango tënë so ayeke na hunzingo ti paragraphe ni.
14 A yeke nzoni e hunda tele ti e mveni: ‘Mbi bâ biani na nene ni kode so Jéhovah ayeke sala na kusala ti fa lege na bungbi ti lo so lê aba? Abango ndo ti mbi, tënë ti yanga ti mbi, na akusala ti mbi afa ni na gigi?’ Gbungo li na ndo atënë so ayeke na gbe ni ge alingbi ti mû maboko na e oko oko kue ti gi nda ti ye tongaso.
Tongana mbi yeda biani na Christ tongana Beli ti kongregation, a lingbi mbi sala nyen, tongana ti so a fa na yâ ti aversê so ge? (Matthieu 24:14; 28:19, 20; Jean 13:34, 35).
Mbi yeke yekia zo wa tongana, na bê ti kiri singila, mbi yeda na aye kue ti yingo so aga na lege ti bungbi ti ngbâa ni na Wabatango Bungbi ti lo? (Luc 10:16).
Na yâ ti kongregation, a lingbi zo kue, mbilimbili a-ancien, asala ye na popo ti ala tongana nyen? (aRomain 12:10).
15. (a) Na lege ti bango ndo ti e na mbage ti bungbi ti Jéhovah so lê abâ, e yeke fa nyen na gigi? (b) Alege wa azi na e ti fa so Diable ayeke zo ti mvene, na ti mû ngia na bê ti Jéhovah?
15 Laso, Jéhovah ayeke fa lege na e na lege ti bungbi ti lo so lê abâ, so ayeke na gbe ti Christ. Bango ndo ti e na mbage ti ye so Jéhovah aleke afa na gigi bibe ti e na mbage ti tënë ti kota yanga-ti-komande (aHébreu 13:17). Satan atene so e yeke bi bê kozoni kue gi na ndo e mveni. Me tongana e sala kusala tongana ti so a hunda na e, na e kpe ti sala aye so agboto lê senge senge na ndo e mveni, e yeke fa so Diable ayeke zo ti mvene. Tongana e ndoye na e yekia ala so ayeke mû li ni na popo ti e, na e kpe ti ‘gonda ala ahon ndo ni, ti wara futa na pekoni,’ e yeke mû ngia na Jéhovah ( Jude 16; aHébreu 13:7). Na dutingo be-biani na bungbi ti Jéhovah, e yeke fa so Jéhovah ayeke Nzapa ti e, na so e yeke beoko na yâ vorongo lo.—1 aCorinthien 15:58.
Lisoro ti dango bê
• Laso, bungbi ti Jéhovah so lê abâ ayeke nyen? Nda ti bungbi ni so ayeke ti sala nyen?
• Beli ni so a hiri lo na kusala na ndo kongregation ayeke zo wa? Na lege ti aye wa, so a leke ge na sese, Beli ni ayeke fa lege na e na ndoye?
• Anzoni bango ndo wa a lingbi e gi ti duti na ni na mbage ti azo so ayeke na yâ bungbi ti Jéhovah?
[Afoto na lembeti 133]
Jéhovah afa lege na e na lege ti bungbi ti lo so lê abâ, so ayeke na gbe ti Christ