A-ange ti Nzapa amû maboko

AMBENI zo atene so ala yeke mä na bê gi na ye so ala lingbi ti bâ. Me so tâ ye ti buba! Aye mingi ayeke dä so e bâ ni lâ oko pëpe na lê ti e mveni. Mo lingbi ti fa mbeni oko?—

Ka ti pupu so e yeke hu, e lingbi ti hinga so e hu ni biani?— Zia maboko ti mo na tele ti yanga ti mo, na hulu pupu na ndo ni. Nyen la a sala na ndo maboko ti mo ni?— Ni la, me mo lingbi ti bâ ni?—

E sala tënë awe na ndo ti azo ti yingo so e lingbi ti bâ ala pëpe. E manda so ambeni ayeke nzoni, na ambeni ayeke sioni. Fa iri ti ambeni nzoni zo ti yingo so e lingbi ti bâ ala pëpe.— Tâ tënë, Jéhovah Nzapa ayeke dä, Jésus ayeke dä, nga na ambeni nzoni ange. Asioni ange ayeke nga dä?— Bible atene so ala yeke dä. Fa na mbi ye so mo manda na ndo ti ala.—

Mbeni ye so e hinga ayeke so anzoni ange na asioni ni kue ayeke ngangu ahon e. Kota Wafango ye ahinga ye mingi na ndo ti ala. A yeke ngbanga ti so lo yeke ândö mbeni ange kozoni si a dü lo tongana mbeni bébé na sese ge. Lo duti na tele ti ambeni ange lani kâ na yayu. Lo hinga ala kutu mingi. A-ange so kue ayeke na iri?—

E manda so Nzapa amû iri na atongoro. Ni la, e lingbi ti tene biani so a-ange nga kue ayeke na iri. E hinga so ala lingbi ti sala tënë na popo ti mba teti so Bible asala tënë na ndo ‘yanga ti a-ange’. (1 aCorinthien 13:1). Ti mo, a-ange ayeke sala tënë na ndo ti aye wa? Ala yeke sala tënë na ndo ti e?—

E hinga so a-ange ti Satan, wala ayingo sioni, ayeke gi lege ti pusu e ti ke yanga ti Jéhovah. Tongaso, ala yeke sala tënë na ndo lege so ala lingbi ti sala ni. Ala ye si e duti tongana ala, si Jéhovah aye tënë ti e mbeni pëpe. Me ti mo, a-ange be-ta-zo ti Nzapa nga kue ayeke sala tënë na ndo ti e?— Biani, ala yeke sala tënë na ndo ti e. Ala ye ti mû maboko na e. Zia mbi fa na mo tongana nyen ambeni ange ti Nzapa amû lani maboko na azo so aye Jéhovah na asala kusala na lo.

Na tapande, mbeni koli ayeke ândö dä, iri ti lo ayeke Daniel. Lo yeke lani na Babylone. Azo mingi ti Babylone aye tënë ti Jéhovah pëpe. Ala sigigi même na mbeni ndia so afâ ngbanga na li ti zo kue so ayeke sambela Jéhovah Nzapa. Me Daniel angbâ ti lo lakue ti sambela Jéhovah. Mo hinga ye so ala sala na lo?—

Biani, asioni zo so asala si a bi Daniel na yâ dû ti abamara. Daniel ayeke gi lo oko kâ na tele ti abamara so nzara ahon ndo ti ala. Mo hinga ye so asi?— Lo tene: ‘Nzapa atokua ange ti lo, na lo kanga yanga ti abamara ni.’ Abamara ni asala sioni na lo oko pëpe! A-ange alingbi ti sala apendere ye teti azo so ayeke sala kusala na Jéhovah.​—Daniel 6:18-22.

E yeke nga na tapande ti Pierre so mbeni lâ a bi lo na da ti kanga. Pierre ayeke lani kamarade ti Kota Wafango ye, Jésus Christ. Tongana Pierre atene na ambeni zo so Jésus ayeke Molenge ti Nzapa, a nzere na ala pëpe. Tongaso, ala bi lo na da ti kanga. Aturugu ayeke bata lani Pierre, si lo kpe pëpe. Mbeni zo alingbi ti zi lo?—

Pierre ayeke lango lani na popo ti aturugu use, na chaîne ayeke na tïtî lo. Me Bible atene: ‘Bâ! Ange ti Jéhovah aga, na wâ ato nda ti za na yâ da ti kanga ni. Ange ni andu Pierre na mbage ti kate ti lo, lo zingo lo, na lo tene, “Londo hio!” ’

Mo ye ti bâ, achaîne so akanga na tïtî Pierre atï! Ange ni atene na lo: ‘Yü bongo na aporo ti mo, na mû peko ti mbi.’ Aturugu ni alingbi ti kanga lege na ala pëpe ngbanga ti so ange ni ayeke mû lani maboko na Pierre. Fadeso ala si na mbeni yanga-da ti kanga ni so a sala na wen. Me mbeni ye ti ndima asi. Yanga-da ni azi na bê ti lo mveni! Ange so azi Pierre ti tene lo fa tënë lakue.​—Kusala 12:3-11.

A-ange ti Nzapa alingbi ti mû nga maboko na e?— Ala lingbi. A ye ti tene so ala yeke sala si sioni asi na e oko pëpe?— Tongaso pëpe, a-ange ayeke kanga lege pëpe ti tene e wara sioni tongana e sala ye ti kirikiri. Me même tongana e sala ye ti kirikiri pëpe, sioni alingbi ti si na e. Nzapa amû yanga na a-ange pëpe ti kanga lege na ni. Me lo mû na ala mbeni kua so ayeke nde.

Bible asala tënë ti mbeni ange so ayeke tene na azo na ndo kue ti voro Nzapa (Apocalypse 14:6, 7). Lo tene ni na ala tongana nyen? Lo ngbâ kâ na yayu si lo yeke dekongo ti tene azo kue amä lo?— Oko pëpe, me adisciple ti Jésus na ndo ti sese ge ayeke fa ye na azo na ndo Nzapa, na a-ange ayeke fa lege na ala na yâ kua ti ala. A-ange ni ayeke sala kue ti tene azo so aye biani ti hinga ye na ndo Nzapa amä tënë ti lo. E lingbi ti mû mbage ti e na yâ kusala ti fango tënë so, na a-ange ayeke mû maboko na e.

Ka tongana azo so aye tënë ti Nzapa pëpe aga na kpale na e? Ka tongana ala bi e na kanga? Fade a-ange ayeke zi e?— Ala lingbi ti zi e. Me a yeke duti lakue tongaso pëpe.

Paul, so ayeke disciple ti Jésus, ayeke lani mbeni zo ti kanga. Lo yeke na yâ ti mbeni ngö tongana mbeni kota ngu apika na pupu. Me a-ange ni azi lo hio pëpe. Senge pëpe, ngbanga ti so ambeni zo ayeke lani dä so a lingbi ala mä tënë ti Nzapa. Mbeni ange atene: “Zia mbito asala mo pëpe, Paul; a yeke ngbanga ti mo ti luti na gbele César.” Biani, a lingbi Paul ague na gbele César, mokonzi ti sese kue, ti fa ye na lo. A-ange ahinga lakue ndo so Paul ayeke dä, na ala mû maboko na lo. Tongana e sala biani na Nzapa, ala yeke mû ande maboko na e nga.​—Kusala 27:23-25.

Mbeni kota kua ayeke nga dä so a-ange ayeke sala ande, na ala ga ndulu ti sala ni awe. Ngoi ti tene Nzapa afuti azo ti sioni aga ndulu mingi. Azo kue so avoro tâ Nzapa pëpe, fade a yeke fâ ala. Ala so atene so ala mä na bê na a-ange pëpe, ngbanga ti so ala lingbi ti bâ ala pëpe ayeke bâ ande na lê ti ala mveni so tënë ti ala ni ayeke tâ na lege ni pëpe.​—2 aThessalonicien 1:6-8.

Tënë so aye ti tene nyen ndali ti e?— Tongana e yeke na mbage ti a-ange ti Nzapa, ala yeke mû ande maboko na e. Me e yeke na mbage ti ala?— Gi tongana e sala na Jéhovah. Na tongana e sala na Jéhovah, e yeke tene na azo ti sala nga na lo.