A-ange ayeke azo wa?

GBIA ti mbeni ngangu kodoro-togbia abâ lani mbeni ye so asara si li ti lo akpe. A bi akoli ota na yâ four ti wâ, me mbeni zo aga azi ala na yâ ti kuâ! Zo ni so a zi ala so ayeke zo wa? Gbia ni mveni asara tënë na akoli ota so, lo tene: “Sara tënë nzoni na Nzapa ti [i], Lo so ato ange ti Lo, Lo zi aboi ti Lo so bê ti ala ayeke na Lo.” (Daniel 3:28). Gbia ti Babylone so aduti lani na fini ahon fadeso ngu 2 000 awe abâ na lê ti lo tongana nyen mbeni ange asö azo. Azo kutu mingi giriri amä na bê so a-ange ayeke dä. Laso, azo mingi amä na bê so a-ange ayeke dä nga so peut-être a-ange ayeke sara ye ndali ti ala. A-ange ayeke azo wa, na ala londo na ndo wa?

Bible afa so a-ange ayeke ayingo, tongana ti so Nzapa ayeke Yingo (Psaume 104:4; Jean 4:24). Ala yeke gbani, kutu mingi mingi (Apocalypse 5:11). Nga ala kue ayeke “ngangu” mingi (Psaume 103:20). Atâa so a-ange ayeke tongana azo na lege so ala yeke na asarango ti ala mveni nga ala lingbi ti soro ye so bê ti ala aye, ala yeke kozoni azo pëpe si ala ga a-ange. Biani, Nzapa asara a-ange aninga awe si lo ga ti sara azo. Lo sara ala même kozoni si lo leke sese. Bible atene so tongana Nzapa ‘asara gere ti sese’, “atongoro ti ndapre [a-ange] asara bia, na amolenge ti Nzapa kue adekongo na ngia.” (Job 38:4, 7). Teti so Nzapa la asara a-ange, a iri ala amolenge ti Nzapa.

Nzapa asara lani a-ange ngbanga ti nyen? Ala sara mbeni kusala na yâ mbaï ti azo? Ala yeke sara ye ndali ti e laso? Teti so ala yeke na ngangu ti soro ye so ala ye, ambeni ange asoro lani ti mû peko ti Satan Zabolo na ti ga wato ti Nzapa? Bible amû atâ kiringo tënë na ahundango tënë so.